ସୋରୋ: ଲୁଟ୍ କରିବା ଯୁବକଙ୍କ ଉପରେ ଭାରି ପଡ଼ିଲା । କିନ୍ତୁ ଏମିତି ଭାରି ପଡ଼ିବ ତାହା କେହି କେବେ ସ୍ବପ୍ନରେ ସୁଦ୍ଧା ଭାବିନଥିଲେ । କଥାରେ ଅଛି ଚୋର ଘର ସବୁବେଳେ ଅନ୍ଧାର ହୋଇ ନଥାଏ । ଆଜି ନହେଲେ କାଲି ସାମ୍ନାକୁ ଆସେ । ବର୍ତ୍ତମାନ ସମୟରେ ଚୋରିର ମାତ୍ରା ଏତେ ବଢ଼ି ଗଲାଣି ଯେ ଲୋକେମାନେ ଭୟଭୀତ ହୋଇ ରହିଛନ୍ତି । ଦିନ ରାତି କିଛି ମାନୁ ନାହାଁନ୍ତି ଚୋର । ଯେଉଁ ସମୟରେ ପାରୁଛନ୍ତି ଚୋରି କରିନେଉଛନ୍ତି । କେତେବେଳେ କେଉଁ ସମୟରେ ଅଘଟଣ ଘଟିଯିବ ତାହା କିଛି ଜଣା ନଥାଏ । ଏହାସହ ଅଘଟଣ କାହାକୁ କହିକି ଆସି ନଥାଏ । ଅଚାନକ୍ ଘଟିଥାଏ ଅଘଟଣ । ତେବେ ଏଠି ଆମେ ଏହି କଥା କାହିଁକି କହୁଛୁ ଆସନ୍ତୁ ଜାଣିବା ।
ଚୋରି କରି ଯାଉଥିବା ବେଳେ ଚାଲିଗଲା ଲୁଟେରା ଜୀବନ । ଆଜି ମଧ୍ୟାହ୍ନରେ ସୋର ଅଞ୍ଚଳର ଅନିତା ନାୟକ ଓ ତାଙ୍କ ପୁଅ ଏକ ସ୍କୁଟି ଯୋଗେ ଜିରତାଳ ଅଭିମୁଖେ ଯାଉଥିଲେ । ଏହି ସମୟରେ ଦହିସଡା ନିକଟସ୍ଥ ଶନି ମନ୍ଦିର ନିକଟରେ ଜଣେ ଯୁବକ ଅନିତାଙ୍କ ହାତରୁ ମୋବାଇଲକୁ ଝାମ୍ପିନେଇ ବାଲେଶ୍ବର ଅଭିମୁଖେ ଚାଲିଯାଇଥିଲେ । ପରେ ଅନିତା ଓ ତାଙ୍କ ପୁଅ ଦୁଇଜଣ ମିଶି ଉକ୍ତ ଯୁବକଙ୍କ ପିଛା କରି ଯାଉଥିବା ବେଳେ ଯୁବକ ଜଣକ ମର୍ଡନ ହୋଟେଲ ନିକଟରେ ଭାରସାମ୍ୟ ହରାଇ ଗାଡିରୁ ପଡିଯାଇଥିଲେ ।
ଏଥିରେ ତାଙ୍କ ମୁଣ୍ଡରେ ଗଭୀର କ୍ଷତ ହେବା ସହ ଘଟଣା ସ୍ଥଳରେ ତାଙ୍କର ମୃତ୍ୟୁ ମଧ୍ୟ ହୋଇଥିଲା । ଖବର ପାଇ ପୁଲିସ୍ ଶବ ଜବତ କରି ବ୍ୟବଚେ୍ଚଦ ପାଇଁ ଡାକ୍ତରଖାନାକୁ ନେବା ସହିତ ଘଟଣାର ଅଧିକ ତଦନ୍ତ ଆରମ୍ଭ କରିଛି । ସେହି ମୃତ ଯୁବକ ଜଣକ ହେଉଛନ୍ତି ଗୋପାଳପୁର ଥାନା ମଦାନପୁର ଗ୍ରାମର ଭାଗବତ ମଲିକଙ୍କ ପୁଅ କହ୍ନେଇ ବୋଲି ଜଣା ପଡିଛି ।