ଗଣେଶଙ୍କୁ ବିଦାୟ ଦେବା ସହ ଘର ଲୋକଙ୍କୁ ବି ବିଦାୟ ଦେଲା ପବିତ୍ର, ପୁଅକୁ ହରାଇ ଝୁରୁଛି ପରିବାର
ଗଣେଶ ଭସାଣି ପାଇଁ ଗାଁର ଯୁବକମାନେ ବେଶ ଖୁସି ଥିଲେ । ବାଜା ବାଜଣାରେ କମ୍ପୁଥିଲା ଗାଁ ଦାଣ୍ଡ । ବାଜାର ତାଳେ ତାଳେ ନାଚୁଥିଲେ ସେହି ଗାଁର ଯୁବକ ଦଳ । କିନ୍ତୁ ହଠାତ ସବୁ କିଛି ସ୍ତବ୍ଧ ହେଇଗଲା । ଖୁସିର ମାହୋଲ ଫିକା ପଡିଗଲା । କାହିଁକି ନା ଗାଁର ସମସ୍ତ ଯୁବକ ନାଚୁଥିବାବେଳେ ଘଟିଗଲା ବଡ଼ ଅଘଟଣ । ଗଣେଶଙ୍କୁ ବିଦାୟ ଦେବା ସହ ଘର ଲୋକଙ୍କୁ ବି ବିଦାୟ ଦେଲା ପବିତ୍ର ।
ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ବ୍ରାହ୍ମଣଶାସନ(ଜଗନ୍ନାଥପୁର)ଗାଁରେ ମର୍ମାହତ କଲା ଭଳି ଦୁଃଖଦ ଘଟଣା ଘଟିଛି । ଗଣେଶ ପୂଜା ଭସାଣୀ ସମୟରେ ପବିତ୍ର ନାମକ ଜଣେ ଯୁବକଙ୍କ ଜୀବନ ଯାଇଛି । ବଡ ଧୁମଧାମରେ ପ୍ରୋସେସନ ଚାଲିଥିଲା । ଏହି ସମୟରେ ଏକ ସର୍ଭିସ ତାର ଡିଜେ ଗାଡ଼ିରେ ଲାଗିଗଲା । ଆଉ ଚାହୁଁ ଚାହୁଁ ସେହି ଗାଡ଼ି ପାଖରେ ଥିବା ତିନି ଜଣ ଯୁବକଙ୍କୁ କରେଣ୍ଟ ଲାଗିଗଲା । ତୁରନ୍ତ ସେମାନଙ୍କୁ ହସ୍ପିଟାଲ ଆଣିଥିଲେ । ସ୍ଥାନୀୟ ମେଡିକାଲରେ ଜଣେ ଯୁବକ ଭଲ ହୋଇଥିବା ବେଳେ ପବିତ୍ର ସାହୁ ନାମକ ଅନ୍ୟ ଜଣେ ଯୁବକଙ୍କୁ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ପବିତ୍ର ସାହୁଙ୍କୁ ମୃତୁ ଘୋଷଣା କରିଥିଲେ ।
ଗଣେଶ ଭସାଣିରେ ଏମିତି ଅଘଟଣ ଘଟୁଥିବା ପ୍ରତିଦିନ ସାମ୍ନାକୁ ଆସୁଛି । କିନ୍ତୁ ଲୋକମାନେ ସତର୍କ ହେଉ ନାହାନ୍ତି । ଆଉ ଅବେଳରେ ଏମିତି ଅନେକ ଲୋକଙ୍କ ଜୀବନ ଯାଉଛି । ପୂଜା କର ଭସାଣି କର ମନା ନାହିଁ । କିନ୍ତୁ ନିଜ ଜୀବନକୁ ଏମିତି ବିପଦରେ ପକାନ୍ତୁ ନାହିଁ ।
