ଟଙ୍କା ପାଇଁ ମାମୁଁର ଜୀବନ ନେଇଗଲା ଭଣଜା

ଯାଜପୁର: ଭଣଜା ଭୁଲିଗଲା ରକ୍ତ ସମ୍ପର୍କ । କେଇଟା ଟଙ୍କା ଲୋଭରେ ନେଇଗଲା ମାମୁଁର ଜୀବନ । ଗାଡ଼ି କିଣିବା କଥା କହି ସାଙ୍ଗରେ ଡାକି ନେଇଥିଲା । ଆଉ ସୁବିଧା ସୁଯୋଗ ଦେଖି ମାମୁଁର ଜୀବନ ନେଇ ଫୋପାଡ଼ି ଦେଲା ଜଙ୍ଗଲରେ । କେହି ଯେମିତି ଏକଥା ଟେର୍ ନ ପାଇବେ ମାମୁଁଙ୍କୁ ଖୋଜିବାର ମିଛି ମିଛିକା ନାଟକ କରିଥିଲା ଭଣଜା। କିନ୍ତୁ ଥାନାରେ ଛେଚା ଖାଇବା ପରେ ସବୁ ସତ ଓଗାଳିଥିଲା ।

ମାମୁଁକୁ ଡାକି ନେଇଥିଲା ଚାଲ ଯିବା ଗାଡ଼ି କିଣିବା । ଆଜି ତୁମକୁ ଭଲ ଗାଡ଼ି କିଣି ଦେବି । ମାମୁଁ ମଧ୍ୟ ଭଣଜା କଥାରେ ଭାସିଯାଇ ୬୦ ହଜାର ଟଙ୍କା ନେଇ ବାହାରି ପଡ଼ିଥିଲେ ଗାଡ଼ି କିଣିବା ପାଇଁ । ହେଲେ ରାତି ଅନେକ ହୋଇଥିଲେ ବି ଆଉ ଘରକୁ ଫେରି ନଥିଲେ ମାମୁଁ । ମାଇଁ ଯେତେବେଳେ ବ୍ୟସ୍ତ ହୋଇ ଖୋଜା ଖୋଜା ଖୋଜି ଆରମ୍ଭ କରିଥିଲେ । ସେତେବେଳେ ସବୁ ସତ ସାମ୍ନାକୁ ଆସିଥିଲା । ଭଣଜାର କଳାକାରନାମା ଜଣାପଡ଼ିଥିଲା । ମାମୁଁ ବିଷୟରେ ଯେତେବେଳେ ଭଣଜାକୁ ପଚରା ଯାଇଥିଲା ସେତେବେଳେ ସେ କହିଥିଲା ମାମୁଁକୁ କେତେ ବେଳୁ ଛକରେ ଛାଡ଼ିଦେଇଛି ।

ହଁ ଆଜ୍ଞା, ମାମୁଁ ଟଙ୍କା ଦେଖି ଲୋଭ ହୋଇଥିଲା ଭଣଜାର । ମାମୁଁକୁ ହତ୍ୟା କରି ଟଙ୍କା ନେଇଗଲା I ଯାଜପୁର ଜିଲ୍ଲା ଜେନାପୁର ଥାନା ସମ୍ପାରୁ ପଂଚାୟତ ତୋଟାକଣ ଗ୍ରାମର ଦୁଷ୍ମନ୍ତ ନାୟକଙ୍କୁ ତାଙ୍କ ସମ୍ପର୍କୀୟ ଭଣଜା ହତ୍ୟା କରିଥିବା ନେଇ ଜେନାପୁର ଥାନାରେ ଅଭିଯୋଗ ହୋଇଛି ।

ଗତକାଲି ଗାଡି କିଣାହେବା ପାଇଁ ମାମୁଁ ଦୁଷ୍ମନ୍ତଙ୍କ ଘରକୁ ଭଣଜା ଆସିଥିଲେ । ଦୁହେଁ ଚଣ୍ଡିଖୋଲ ଗାଡି କିଣିବା ପାଇଁ ଯାଇଥିଲେ । ତେବେ ଘରକୁ ଫେରିବା ବିଳମ୍ବ ହେବାରୁ ପରିବାର ଲୋକେ ଭଣଜାକୁ ପଚାରିବାରୁ ଭଣଜା କହିଥିଲା ମୁଁ ବରଡ଼ା ଛକରେ ମାମୁଁକୁ ଛାଡିଦେଇଛି । ତେବେ ରାତି ହେବା ସହ ଘରକୁ ନଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିବା ପରେ ଫୋନ ସୁଇଚ ଅଫ ରହିବା ସହ କୌଣସି ସନ୍ଧାନ ନମିଳିବାରୁ ଜେନାପୁର ଥାନାରେ ଅପହରଣ ଅଭିଯୋଗ କରିଥିଲେ I

ଅଭିଯୋଗ ପରେ ପୋଲିସ ଭଣଜା ଦୁଷ୍ମନ୍ତକୁ ଥାନାକୁ ନେଇ ପଚରା ଉଚରା କରିଥିଲା । ଆଜି ଗଡ଼ମଧୁପୁର ପଂଚାୟତ ନିକଟସ୍ଥ ଜଙ୍ଗଲରୁ ଦୁଷ୍ମନ୍ତଙ୍କ ମୃତ ଦେହ ଠାବ କରିଛି ପୋଲିସ I ପରିବାର ଲୋକଙ୍କୁ ଖବର ଦେବାପରେ ପରିବାର ଲୋକ ଆସି ମୃତ ଶରୀର ଦୁଷ୍ମନ୍ତଙ୍କ ବୋଲି ଚିହ୍ନଟ କରିଛନ୍ତି I ଏନେଇ ଥାନାରେ ପରିବାର ଲୋକେ ହତ୍ୟା ଅଭିଯୋଗ କରିଛନ୍ତି । ଘଟଣା ସ୍ଥଳରେ ଯାଜପୁରରୋଡ଼ ଏସଡିପିଓ, ଜେନାପୁର ଥାନାଧିକାରୀଙ୍କ ସହ ସାଇଣ୍ଟିଫିକ ଟିମ ପହଂଚି ମୃତ ଦେହକୁ ଜବତ କରି ଘଟଣାର ଅଧିକ ତଦନ୍ତ ଜାରି ରଖିଛନ୍ତି । ଏହି ଘଟଣାରେ ପନ୍ତୁରୀ ଗ୍ରାମର ଭଣଜା ଜଗନ ଧଳକୁ ଥାନାରେ ଅଟକ ରଖିବା ସହ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ଏସଡିପିଓ ସୂଚନା ଦେଇଛନ୍ତି ।