ଆପଣଙ୍କ ଶରୀରରେ କୌଣସି ପ୍ରକାରର କ୍ଷତ ହେଲେ ଏହାକୁ ଶରୀରର ରୋଗ ପ୍ରତିରୋଧକ ଶକ୍ତି ଠିକ୍ କରିଥାଏ । କିନ୍ତୁ କ୍ଷତ ଆପେଆପେ ଠିକ୍ ହେବାକୁ ସମୟ ଲାଗେ । କୌଣସି ବ୍ୟକ୍ତିଙ୍କୁ ଡାଇବେଟିସ୍ ହୋଇଥିଲେ ରୋଗପ୍ରତିରୋଧକ ଶକ୍ତି ଠିକ ଭାବେ କାମ କରେ ନାହିଁ । ବେଳେବେଳେ କ୍ଷତ ସଂକ୍ରମିତ ହୋଇ ଶରୀରକୁ ଅଧିକ କ୍ଷତି ପହଞ୍ଚାଏ । ଏହି କ୍ଷତ ଦ୍ୱାରା ଅନ୍ୟ ରୋଗ ହେବାର ମଧ୍ୟ ଆଶଙ୍କା ବଢ଼େ । କିନ୍ତୁ ଏହି ସମସ୍ୟାର ମୁକାବିଲା ପାଇଁ ଅନେକ ଦେଶରେ ‘ସ୍ମାର୍ଟ ବ୍ୟାଣ୍ଡେଜ୍’ ଉପରେ କାମ ଚାଲିଛି । ଯଦି ଶରୀରରେ କ୍ଷତ ବହୁତ ଗଭୀର ହୋଇଥାଏ ତେବେ ରୋଗପ୍ରତିରୋଧକ ଶକ୍ତି କାମ କରେ ନାହିଁ । ଏପରି ପରିସ୍ଥିତିରେ ସ୍ମାର୍ଟ ବ୍ୟାଣ୍ଡେଜ୍ ଆପଣଙ୍କ କ୍ଷତକୁ ଠିକ୍ କରିବ । ଯାହା ଦ୍ୱାରା ଆପଣଙ୍କ ଶରୀର ସଂକ୍ରମିତ ହେବ ନାହିଁ ।
‘ସ୍ମାର୍ଟ-ବ୍ୟାଣ୍ଡେଜ୍’ ହେଉଛି ଏକ ବଢ଼ିଆ ହେଲଥ ଗ୍ୟାଜେଟ୍ । ଯାହାକୁ ନେଇ ଲଗାତାର ଅନୁସନ୍ଧାନ ଚାଲିଛି । ଏହି ବ୍ୟାଣ୍ଡେଜ୍ କ୍ଷତକୁ ଠିକ୍ କରିବାରେ ସିଧାସଳଖ ସାହାଯ୍ୟ କରିଥାଏ । ଏହା ବ୍ୟତୀତ ରୋଗୀର କ୍ଷତ ଏବଂ ସ୍ୱାସ୍ଥ୍ୟ ଅବସ୍ଥା କିପରି ଅଛି ତାହା ଏହି ସ୍ମାର୍ଟ ବ୍ୟାଣ୍ଡେଜ୍ ଦ୍ୱାରା ଜଣା ପଡ଼ିଥାଏ । କୁହାଯାଉଛି ଯେ ଏହା ଆପଣଙ୍କ କ୍ଷତକୁ ଶୀଘ୍ର ଠିକ୍ କରିବାରେ ସାହାଯ୍ୟ କରିବ ଏବଂ ଏଥିରେ ଆପଣଙ୍କର ଖର୍ଚ୍ଚ ବି କମ୍ କରିବ ।
ସ୍ମାର୍ଟ-ବ୍ୟାଣ୍ଡେଜ୍ କିପରି କାମ କରେ?
କାଲଟେକ୍ ରେ ଡେଭଲପ୍ କରାଯାଉଥିବା ଏହି ସ୍ମାର୍ଟ-ବ୍ୟାଣ୍ଡେଜ୍ ଏମବେଡେଡ୍ ଇଲେକ୍ଟ୍ରୋନିକସ ଏବଂ କିଛି ଔଷଧକୁ ନେଇ ପ୍ରସ୍ତୁତ କରାଯାଉଛି । ଏହି ସ୍ମାର୍ଟ ବ୍ୟାଣ୍ଡେଜ୍ ଶରୀରର ୟୁରିକ୍ ଏସିଡ୍ ଏବଂ pH ସ୍ତର କିମ୍ବା କ୍ଷତରେ ଥିବା ତାପମାତ୍ରାକୁ ମନିଟର୍ କରିପାରିବ । ସଂକ୍ରମଣକୁ ସୂଚାଇବା ସହିତ ଡାଇବେଟିଜ୍ ଭଳି ରୋଗର ଚିକିତ୍ସାରେ ଏହି ପ୍ରକାର ବ୍ୟାଣ୍ଡେଜ୍ ଅତ୍ୟନ୍ତ ଲାଭଦାୟକ ପ୍ରମାଣିତ ହେବ ।
ଏହି ବ୍ୟାଣ୍ଡେଜ୍ ଦ୍ୱାରା କ୍ଷତ ଶୀଘ୍ର ସୁସ୍ଥ ହୁଏ । ଏହି ସ୍ମାର୍ଟ ବ୍ୟାଣ୍ଡେଜ ଉପରେ କାମ ଚାଲିଛି ଯାହା ଭିତରେ ଔଷଧ ଭର୍ତ୍ତି କରାଯାଇଛି । ଏହି ବ୍ୟାଣ୍ଡେଜରେ ଛୋଟ କ୍ୟାପସୁଲ ରହିବ, ଯାହା ଆଣ୍ଟିବାୟୋଟିକରେ ଭର୍ତ୍ତି ଥିବ । ଯଦି କୌଣସି ସଂକ୍ରମଣ ହୁଏ, ତେବେ ଡାକ୍ତର ସ୍ମାର୍ଟ-ବ୍ୟାଣ୍ଡେଜକୁ ଦୂରରୁ ହିଁ କ୍ୟାପସୁଲ ଖୋଲିବାକୁ କମାଣ୍ଡ ଦେବେ ଏହା କ୍ଷତରେ ସିଧାସଳଖ ମଲମ ଲଗାଇବ । ଅନେକ ଦେଶରେ ସ୍ମାର୍ଟ ବ୍ୟାଣ୍ଡେଜ୍ ଉପରେ ଗବେଷଣା ଚାଲିଛି ।
ମେଡିକାଲ୍ କନଫେରେନ୍ସ ଏବଂ ଏଗ୍ଜିିଭିସନ୍ ରେ ସ୍ମାର୍ଟ-ବ୍ୟାଣ୍ଡେଜ୍ ର ବିଭିନ୍ନ ଭର୍ସନ ବାହାର କରାଯାଇଥିବା ଦେଖିବାକୁ ମିଳିଛି । ଅଧିକାଂଶ ବ୍ୟାଣ୍ଡେଜରେ ଛୋଟ ଇଲେକ୍ଟ୍ରୋନିକ୍ସ ରହିଛି ଯାହା କ୍ଷତ କିପରି ଠିକ୍ ହେଉଛି ସେ ବିଷୟରେ ଡାକ୍ତରଙ୍କୁ ସୂଚନା ଦେବ । ରିପୋର୍ଟ ଅନୁଯାୟୀ, ବୈଜ୍ଞାନିକ ଟିମ୍ ଆସନ୍ତା ବର୍ଷ ଏହି ବ୍ୟାଣ୍ଡେଜ୍ ର ମାନବ ପରୀକ୍ଷା ଆରମ୍ଭ କରିବେ ବୋଲି କୁହାଯାଉଛି ।