ନବୀନଙ୍କ ଆତ୍ମବିଶ୍ୱାସ : ଶପଥ ଗ୍ରହଣ ଉତ୍ସବକୁ ମୋଦିଙ୍କୁ ନମ୍ରତାର ସହ କଲେ ନିମନ୍ତ୍ରଣ

ଭୁବନେଶ୍ବର(କେନ୍ୟୁଜ୍) : ତିନି ପର୍ଯ୍ୟାୟ ମତଦାନ ପରେ ବିଜେଡିକୁ ବହୁମତ ମିଳି ସାରିଲାଣି। ନମ୍ରତାର ସହ ଶପଥ ଗ୍ରହଣ ଉତ୍ସବରେ ଯୋଗ ଦେବାକୁ ମୋଦିଙ୍କୁ ନିମନ୍ତ୍ରଣ ଦେଲେ ନବୀନ। ଆତ୍ମବିଶ୍ୱାସର ସହ ପ୍ରଧାନମନ୍ତ୍ରୀଙ୍କୁ ଏହି ଜବାବ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଗତକାଲି ନବୀନଙ୍କ ନାଁ ନେଇ ମୋଦି କହିଥିଲେ, ଏଥର ବିଜେଡି ସରକାର ହଟିବ।

ଓଡ଼ିଶା ଆସି ଗତକାଲି ଏ କଥା କହିଥିଲେ ମୋଦି। ଆଜି ନବୀନ ଦେଲେ ଜବାବ। ତୃତୀୟ ପର‌୍ୟ୍ୟାୟ ଭୋଟ ପରେ ଓଡ଼ିଶାବାସୀଙ୍କ ଆଶୀର୍ବାଦରେ ବିଜେଡି ବହୁମତ ପାଇ ସାରିଲାଣି। ବିଜେଡି ସରକାରର ଶପଥ ଗ୍ରହଣ ଉତ୍ସବରେ ଅତିଥି ଭାବେ ଯୋଗ ଦେବାକୁ ମୋଦିଙ୍କୁ ନମ୍ରତାର ସହ ଅନୁରୋଧ କରିଛନ୍ତି ନବୀନ।

ମୋଦି ଚତୁର୍ଥ ପର୍ଯ୍ୟାୟ ପ୍ରଚାର ପାଇଁ ଗତକାଲି ଓଡ଼ିଶା ଆସିଥିଲେ। ପୂର୍ବ ପ୍ରଚାର ଗୁଡିକରେ ନବୀନଙ୍କୁ ସିଧା ଆକ୍ଷେପ କରୁ ନଥିଲେ। ହେଲେ ଗତକାଲି ନବୀନଙ୍କ ନାଁ ନେଲେ। କହିଲେ ଏଥର ବିଜେଡି ସରକାର ହଟୁଛି। ନବୀନ କହିଥିଲେ, ୫ ବର୍ଷରେ ବିଜେପି ଲୋକଙ୍କ ବିଶ୍ୱାସ ହରାଇଛି। କେବଳ କଥାରେ ଦେଶ ନିର୍ମାଣ ହୁଏ ନାହିଁ। ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼, ପଞ୍ଜାବ ସବୁଠି ଡବଲ ଇଞ୍ଜିନ ସରକାର ଥିଲା। ବିଜେପି ଏ ସବୁ ରାଜ୍ୟରେ ହାରିଲା କାହିଁକି? ମୋଦି କହିଥିଲେ ନୂଆ ସରକାର ହେଲେ ଓଡ଼ିଶା ଆସିବେ। ଆଜି ନବୀନ ତାଙ୍କୁ ଶପଥ ଗ୍ରହଣ ଉତ୍ସବରେ ଅତିଥି ଭାବେ ନିମନ୍ତ୍ରଣ କରି ଦେଲେ।