ଯଦି ତୋଫାନରେ ଆପଣଙ୍କ ଗାଡ଼ି ନଷ୍ଟ ହୋଇଯାଇଛି ତେବେ ଏମିତି କରନ୍ତୁ ବୀମା କ୍ଲେମ୍‌, ନଚେତ୍‌ ଠକି ଯାଇ ପାରନ୍ତି

ନୂଆଦିଲ୍ଲୀ : ଭାରତରେ ଗୋଟିଏ ମାସ ମଧ୍ୟରେ ଦୁଇ ଦୁଇଟି ତୋଫାନକୁ ଲୋକେ ସାମ୍ନା କରିଛନ୍ତି । ଏଥିରେ ବହୁତ ଗୁଡ଼ିଏ ଯାନ ବାହନ ମଧ୍ୟ ନଷ୍ଟ ହୋଇଛି । ତେବେ ଉପଯୁକ୍ତ ସୂଚନା ଅଭାବରୁ ଲୋକେ ନଷ୍ଟ ହୋଇଥିବା ଯାନବାହନର ବୀମା କ୍ଲେମ୍‌ କରିପାରୁନାହାଁନ୍ତି । ଯଦି ବା କେହି କ୍ଲେମ୍‌ କରୁଛନ୍ତି, ସେମାନେ ଉପଯୁକ୍ତ ସୂଚନା ଅଭାବରୁ ବୀମା ରାଶି ଠିକ୍‌ ଭାବରେ ପାଇ ପାରୁ ନାହାଁନ୍ତି ।

ଆସନ୍ତୁ ଜାଣିବା କ’ଣ ସବୁ ରହିଛି ନିୟମ ଠିକ୍‌ ଭାବରେ ବୀମା କ୍ଲେମ୍‌ କରିବାରେ । ବୀମା କମ୍ପାନୀ ନିୟମ ଅନୁଯାୟୀ ବାତ୍ୟା, ବନ୍ୟା, ତୋଫାନ, ଭୂମିକମ୍ପ ଆଦି ପ୍ରାକୃତିକ ବିପର୍ଯ୍ୟୟରେ ଯଦି ଆପଣଙ୍କ ଗାଡ଼ି ଆଂଶିକ କିମ୍ବା ସମ୍ପୂର୍ଣ୍ଣ ନଷ୍ଟ ହୁଏ ତେବେ ଆପଣ ବୀମା କ୍ଲେମ୍‌ ପାଇବା ପାଇଁ ହକଦାର । ପ୍ରଥମରେ ଯଦି ଆପଣଙ୍କ ଗାଡି କୈାଣସି ବି ପ୍ରାକୃତିକ ବିପର୍ଯ୍ୟୟ ବେଳେ ନଷ୍ଟ ହୁଏ ।

ତେବେ ଆପଣ ୪୮ ଘଣ୍ଟା ମଧ୍ୟରେ ବୀମା କମ୍ପାନୀକୁ କ୍ଷତି ବିଷୟରେ ଟୋଲ୍‌ ଫ୍ରି ନମ୍ବରରେ ଜଣାଇବେ । ଏଥି ସହ ବୀମା ସମ୍ପର୍କିତ ଓ ଗାଡ଼ିର ସମସ୍ତ କାଗଜପତ୍ର ବୀମା କମ୍ପାନୀକୁ ପଠାଇବେ । ଏଥି ସହ କ୍ଷତିଗ୍ରସ୍ତ ହୋଇଥିବା ଗାଡ଼ିର ଫଟୋ ମଧ୍ୟ ବୀମା କମ୍ପାନୀକୁ ପଠାଇବେ । ସମସ୍ତ ବୀମା କମ୍ପାନୀ ଭାରତରେ ଥିବା ବିଭିନ୍ନ ଗ୍ୟାରେଜ ସହ ସହବନ୍ଧିତ ଥିବାରୁ ଗ୍ୟାରେଜର କେହି ବ୍ୟକ୍ତି ଆସି ଆପଣଙ୍କ ଗାଡି ନେଇଯିବେ ।

ଯଦି ଆପଣଙ୍କ କ୍ଷତିର ପରିମାଣ ୫୦ ହଜାର ଟଙ୍କା ଭିତରେ ତେବେ କୈାଣସି କମ୍ପାନୀ ବ୍ୟକ୍ତିଙ୍କ ସର୍ବେକ୍ଷଣର ଆବଶ୍ୟକତା ନାହିଁ । ଯଦି କ୍ଷତିର ପରିମାଣ ୫୦ ହଜାର ଟଙ୍କାରୁ ଅଧିକ ତେବେ କମ୍ପାନୀ ବ୍ୟକ୍ତି ଏହାର ସର୍ବେକ୍ଷଣ କରିପାରନ୍ତି । ବେଳେ ବେଳେ ବୀମା କ୍ଲେମ୍‌ ଭୁଲ୍‌ ଢ଼ଙ୍ଗରେ କରାଯାଇଥିବାରୁ ବୀମାକାରୀର ସବୁ କାଗଜପତ୍ର ଠିକ୍‌ ଥିଲେ ମଧ୍ୟ ଉପଯୁକ୍ତ ବୀମା ରାଶି ପାଇ ପାରି ନଥାନ୍ତି ।

ତେଣୁ ବୀମା କ୍ଲେମ୍‌ ପାଇବାକୁ ଉପରୋକ୍ତ ବିଷୟ ପ୍ରତି ଧ୍ୟାନ ଦେବାକୁ ହେବ । ଆପଣ ଯଦି ବୀମା ୪୮ ଘଣ୍ଟା ମଧ୍ୟରେ ନକରି ଡେରିରେ କ୍ଲେମ୍‌ କରନ୍ତି କିମ୍ବା କାଗଜପତ୍ର ଠିକ୍‌ ଭାବରେ ନ ଯୋଗାଇଥାନ୍ତି କିମ୍ବା ଗାଡ଼ିର ନିରୀକ୍ଷଣ ପୂର୍ବରୁ ଗାଡ଼ିକୁ ମରାମତ କରନ୍ତି । ଆପଣ ବୀମା କ୍ଲେମ୍‌ରୁ ବଞ୍ଚିତ ହୋଇ ପାରନ୍ତି ।