ଧୁମଧାମରେ ପାଳିତ ହେଲା ମା’ ରାମଚଣ୍ଡୀ ଠାକୁରାଣୀଙ୍କ ଜଳାଶାୟୀ ଉତ୍ସବ, ଏକାଦଶୀ ତିଥିରେ ଅନୁଷ୍ଠିତ ଏହି ପବିତ୍ର ଜଳକ୍ରୀଡା

ପୁରୀ(କେନ୍ୟୁଜ): ମା’ ରାମଚଣ୍ଡୀ ଠାକୁରାଣୀଙ୍କ ଜଳାଶାୟୀ ଉତ୍ସବ ବଡ଼ ଧୁମଧାମରେ ପାଳିତ ହୋଇଯାଇଛି । ମା’ଙ୍କ ଉପରେ ସୁବାଷିତ ପାଣି ଲାଗି କରାଯାଇ ଏହି ଉତ୍ସବ ପାଳନ କରାଯାଇଛି । ଦୋଳମଣ୍ଡପ ସାହି ଜେନାରୀଗଛ ଛକ ସ୍ଥିତ ମା’ ରାମଚଣ୍ଡୀ ଠାକୁରାଣୀଙ୍କ ଜଳାଶାୟୀ ଉତ୍ସବ ପବିତ୍ର ଜଳକ୍ରୀଡା ଏକାଦଶୀ ତିଥିରେ ଅନୁଷ୍ଠିତ ହୋଇଯାଇଛି । ଭୋରରୁ ମା’ଙ୍କ ଦ୍ୱାର ଫିଟିବା ପରେ ମଙ୍ଗଳ ଆଳତି, ଅବକାଶ, ବାଳ ଭୋଗ ଓ ଶଙ୍ଖୁଡି ଭୋଗ ପରେ ମାଙ୍କ ଆସ୍ଥାନରେ ମାଟି ପ୍ରଲେପ କରାଯାଇଥିଲା । ପରେ ଭକ୍ତମାନେ ନିକଟସ୍ଥ କୂଅରୁ ଗରାରେ ଜଳ ଆଣି ମା’ଙ୍କ ଆସ୍ଥାନ ନିକଟରେ ଥୋଇବା ପରେ ମା’ଙ୍କ ପୂଜକମାନେ ଜଳରେ ଅଗୁର, ଚନ୍ଦନ, ଚୁଆ, କେସର ଓ ସୁବାସିତ ପୁଷ୍ପ ମିଶ୍ରଣ କରିଥିଲେ । ପରେ ମା’ଙ୍କ ମସ୍ତକରେ ଜଳ ଲାଗି କରାଯାଇଥିଲା । ମା’ଙ୍କ ନିକଟରେ ପଣା ଭୋଗ କରାଯାଇଥିଲା ।

ସନ୍ଧ୍ୟାରେ ମା’ଙ୍କ ଆସ୍ଥାନରୁ ଜଳ ନିଷ୍କାସନ କରାଯିବା ପରେ ମା’ଙ୍କୁ ଚନ୍ଦନ ବେଶରେ ସଜ୍ଜିତ କରାଯାଇ ସନ୍ଧ୍ୟା ଆଳତି କରାଯାଇଥିଲା । ସ୍ଥାନୀୟ ଅଞ୍ଚଳର ଶ୍ରଦ୍ଧାଳୁମାନେ ମା’ଙ୍କ ଜଳଶାୟୀ ବେଶ ଦର୍ଶନ କରି ଆଶିଷ ଲାଭ କରିଥିଲେ । ରାତିରେ ମା’ଙ୍କ ପାଇଁ ବିଭିନ୍ନ ପ୍ରକାରର ସୁସ୍ୱାଦୁ ବ୍ୟଞ୍ଜନ ପ୍ରସ୍ତୁତ କରାଯାଇ ଭୋଗ କରାଯାଇଥିଲା । ଏହି ଅବସରରେ ମା’ଙ୍କ ମନ୍ଦିରକୁ ଉଜ୍ୱଳ ଆଲୋକମାଳାରେ ସଜ୍ଜିତ କରାଯାଇଥିଲା । ମା’ ରାମଚଣ୍ଡୀ ଠାକୁରାଣୀ ପରିଚାଳନା କମିଟିର ସଦସ୍ୟମାନେ ମା’ଙ୍କ ସମସ୍ତ କାର୍ଯ୍ୟ ସମ୍ପାଦନ କରିଥିଲେ ।

ଭକ୍ତମାନଙ୍କର ମା’ଙ୍କ ଉପରେ ରହିଛି ଅଗାଢ଼ ବିଶ୍ୱାସ ରହିଛି । ମା’ଙ୍କ ନିକଟରେ ଯାହା ବି ପ୍ରାର୍ଥନା କଲେ ତାହା ପୂରଣ ହୁଏ ବୋଲି ଭକ୍ତମାନେ କୁହନ୍ତି । ମା’ଙ୍କ ଏହି ପବିତ୍ର ଉତ୍ସବ ଦର୍ଶନ କରିବା ପାଇଁ ଭକ୍ତମାନେ ମନ୍ଦିରକୁ ଆସିଥିଲେ । ମାଡ଼ଙ୍କ ଠାରୁ ଆଶିଷ ଭିକ୍ଷା କରି ନିଜକୁ ଧନ୍ୟ ମନେ କରିଥିଲେ ଭକ୍ତ ।