ବନ୍ଦ ହେଲା ‘MS ଧୋନି : ଦ ଅନଟୋଲ୍ଡ ଷ୍ଟୋରୀ’ର ସିକ୍ୱେଲ, ସୁଶାନ୍ତଙ୍କ ବିନା ଫିଲ୍ମ ଅଧୁରା

ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ଦେହାନ୍ତରେ ସମସ୍ତେ ଦୁଃଖିତ । ନିଜ ବାନ୍ଦ୍ରା ଘରେ ଫାଶୀ ଲଗାଇ ସୁଶାନ୍ତ ଆତ୍ମହତ୍ୟା କରିଥିଲେ । କୁହାଯାଉଛି ଯେ ସେ ଦୀର୍ଘ ସମୟ ଧରି ସେ ଡିପ୍ରେସନରେ ଥିଲେ। ତେବେ ସୁଶାନ୍ତ ତାଙ୍କ ଛୋଟ ଫିଲ୍ମ କ୍ୟାରିୟରରେ ଅନେକ ଶ୍ରେଷ୍ଠ ଚଳଚ୍ଚିତ୍ରରେ କାମ କରିଥିଲେ ।

ଭାରତୀୟ କ୍ରିକେଟର ମହେନ୍ଦ୍ର ସିଂ ଧୋନିଙ୍କ ବାୟୋପିକରୁ ସୁଶାନ୍ତ ସିଂ ରାଜପୁତଙ୍କୁ ସ୍ୱତନ୍ତ୍ର ପରିଚୟ ମିଳିଥିଲା। ସେ ଏହି ସୁପରହିଟ୍ ଫିଲ୍ମର ସିକ୍ୱେଲ୍ ପାଇଁ ବି କାମ କରିବାକୁ ଚାହୁଁଥିଲେ । କିନ୍ତୁ ତାଙ୍କ ମୃତ୍ୟୁ ସମସ୍ତ ଯୋଜନାକୁ ଭାଙ୍ଗି ଦେଇଛି । ଧୋନିଙ୍କ ଘନିଷ୍ଠ ବନ୍ଧୁ ତଥା ଚଳଚ୍ଚିତ୍ର ସହ-ନିର୍ମାତା ଅରୁଣ ପାଣ୍ଡେ କହିଛନ୍ତି ଯେ ବର୍ତ୍ତମାନ ସୁଶାନ୍ତଙ୍କ ବିନା ଏହି ଫିଲ୍ମର ସିକ୍ୱେଲ ସମ୍ଭବ ନୁହେଁ ।

ଅରୁଣ ପାଣ୍ଡେ କହିଛନ୍ତି ଯେ ଧୋନି ନିଜ ବାୟୋପିକରେ ସୁଶାନ୍ତଙ୍କ ଅଭିନୟରେ ବହୁତ ପ୍ରଭାବିତ ହୋଇଥିଲେ । ସେ କହିଥିଲେ କିପରି କିରଣ ସୁଶାନ୍ତ ସିଂଙ୍କୁ ଧୋନି ଚରିତ୍ରରେ ଅଭିନୟ କରିବାରେ ସାହାଯ୍ୟ କରିଥିଲେ । ସୁଶାନ୍ତଙ୍କୁ ମାତ୍ର 34 ବର୍ଷ ହୋଇଥିଲା ଏବଂ ମୋର ଟିକିଏ ବି ସନ୍ଦେହ ନାହିଁ ଯେ ଏକ ସୁନ୍ଦର ଭବିଷ୍ୟତ ତାଙ୍କୁ ଅପେକ୍ଷା କରିଥିଲା ।

ଧୋନିଙ୍କ ଚରିତ୍ରକୁ ପରଦାରେ ଜୀବନ୍ତ କରିବା ପାଇଁ ସୁଶାନ୍ତ ସିଂ ରାଜପୁତ ମାସ ମାସ ଧରି କଠିନ ପରିଶ୍ରମ କରିଥିଲେ। ଏହି ଚଳଚ୍ଚିତ୍ରରେ ଧୋନିଙ୍କ ରାଞ୍ଚିରୁ ବିଶ୍ୱକପ ବିଜୟ ପର୍ଯ୍ୟନ୍ତ ଯାତ୍ରା ଏବଂ ସଂଗ୍ରାମର ଚିତ୍ର ରହିଛି। ଏହି ଚଳଚ୍ଚିତ୍ର ପାଇଁ ପୂର୍ବତନ ଭାରତୀୟ ୱିକେଟକିପର କିରଣ ମୋରେଙ୍କଠାରୁ ସୁଶାନ୍ତ ବ୍ୟାଟିଂ, ୱିକେଟ୍ କିପିଂ ଏବଂ ହେଲିକପ୍ଟର ସଟ୍‌ର କୌଶଳ ଶିଖିଥିଲେ । ଅରୁଣ ପାଣ୍ଡେ ଆହୁରି କହିଛନ୍ତି ଯେ, ‘ମୁଁ, ମାହି ଏବଂ ସୁଶାନ୍ତ ଦିଲ୍ଲୀର ଧୋନିଙ୍କ ଏୟାର ଇଣ୍ଡିଆ କଲୋନୀ ଘରକୁ ଯାଇଥିଲୁ । ମାହି ମନେ ପକାଇ କହିଥିଲେ ଯେ ସେ କେଉଁଠାରେ ବସୁଥିଲେ, ଖାଉଥିଲେ ଏବଂ ସୁଶାନ୍ତ ଚରିତ୍ରକୁ ଅନୁଭବ କରିବା ପାଇଁ ଏହା କରୁଥିଲେ । ଘରେ ଏପରି ଏକ ସ୍ଥାନ ଥିଲା ଯେଉଁଠାରେ ମାହି ଭୂମିରେ ଶୋଇଥିଲେ ଏବଂ ସୁଶାନ୍ତ ମଧ୍ୟ ତାହା କରିଥିଲେ।’

ଅରୁଣ ପାଣ୍ଡେ କହିଛନ୍ତି ଯେ ସୁଶାନ୍ତଙ୍କ ମୃତ୍ୟୁ ପରେ ଫିଲ୍ମର ସିକ୍ୱେଲ ତିଆରି କରିବା ସମ୍ଭବ ନୁହେଁ । ଆମେ ସୁଶାନ୍ତଙ୍କ ବିନା ଏହି ଚଳଚ୍ଚିତ୍ରର ସିକ୍ୱେଲ ବିଷୟରେ ମଧ୍ୟ ଚିନ୍ତା କରିପାରିବୁ ନାହିଁ । ସେ କହିଛନ୍ତି ଯେ ଆମେ ଏହି ଚଳଚ୍ଚିତ୍ରର ସିକ୍ୱେଲ ବିଷୟରେ ଚିନ୍ତା କରୁଥିଲୁ, କିନ୍ତୁ ବର୍ତ୍ତମାନ ଏହାର କିଛି ଅର୍ଥ ନାହିଁ ।