ରିଲିଜ ପୂର୍ବରୁ ‘ହମାରେ ବାରହ’ ଫିଲ୍ମ କାଷ୍ଟର ପୂରା ଟିମ୍‌କୁ ମଳିଲା ମୃତ୍ୟୁ ଧମକ, ପୋଲିସ ଦେଉଛି କଡା ସୁରକ୍ଷା

ନିର୍ଦ୍ଦେଶକ କମଲ ଚନ୍ଦ୍ରଙ୍କ ପ୍ରଥମ ଫିଲ୍ମ ‘ହମାରେ ବାରହ’ ରିଲିଜ ହେବା ପୂର୍ବରୁ ଅସୁବିଧାର ସମ୍ମୁଖୀନ ହେଉଛି । ତେବେ ମୁସଲିମ ସଂଗଠନଗୁଡ଼ିକ ଏହି ଫିଲ୍ମକୁ କ୍ରମାଗତ ଭାବରେ ବିରୋଧ କରୁଛନ୍ତି ଏବଂ ଏହାକୁ ବ୍ୟାନ୍‌ କରିବାକୁ ଦାବି କରୁଛନ୍ତି । ଏହି ଫିଲ୍ମରେ ଅନ୍ନୁ କପୁର ମୁଖ୍ୟ ଭୂମିକାରେ ଅଛନ୍ତି ଏବଂ ତାଙ୍କ ବ୍ୟତୀତ ଅଭିନେତା ମନୋଜ ଯୋଶୀ ମଧ୍ୟ ଏହି ଫିଲ୍ମରେ ଅଛନ୍ତି । ଏହି ଫିଲ୍ମଟି ଇସଲାମର ଧର୍ମ ବ୍ୟାଖ୍ୟାକୁ ନେଇ ପ୍ରଶ୍ନ ସୃଷ୍ଟି କରିଛି । ଏହି କାରଣରୁ ଫିଲ୍ମର ଷ୍ଟାର କାଷ୍ଟ ଏବଂ କ୍ରୁ ମେମ୍ବରମାନଙ୍କୁ ବାରମ୍ବାର ଜୀବନରୁ ମାରି ଦେବା ପାଇଁ ଧମକକୁ ମିଳୁଛି । ଏହି ଫିଲ୍ମ ନିର୍ମାତା ଏବଂ ଅଭିନେତାମାନେ ଆସୁଥିବା ଧମକକୁ ନେଇ ମୁମ୍ବାଇର ଭର୍ସୋଭା ପୋଲିସ ଷ୍ଟେସନରେ ଅଭିଯୋଗ କରିଛନ୍ତି ।

ଏହି ଫିଲ୍ମ ଜୁନ୍ ୭ରେ ପୂରା ବିଶ୍ୱର ସିନେମା ହଲରେ ମୁକ୍ତିଲାଭ କରିବାକୁ ଯାଉଛି । ଯାହାର ପ୍ରିମିୟର ୭୭ ତମ କାନ୍ସ ଫିଲ୍ମ ଫେଷ୍ଟିଭାଲରେ ମଧ୍ୟ ହୋଇଛି । ଏହା ସହ ପୂର୍ବରୁ ଏହି ଫିଲ୍ମ ନାମ ଥିଲା ‘ହମ୍ ଦୋ ହମାରେ ବାରହ ଥା’ କିନ୍ତୁ ସେନ୍ସର ବୋର୍ଡର ଅନୁରୋଧ କ୍ରମେ ଏହି ଫିଲ୍ମର ନାମ ‘ହମାରେ ବାରହ’ ରେ ପରିବର୍ତ୍ତନ କରାଯାଇଛି । ସୂଚନାଯୋଗ୍ୟ ଯେ ଫିଲ୍ମ ‘ହମାରେ ବାରହ’ର ଅଫିସିଆଲ୍ ଟ୍ରେଲର ରିଲିଜ୍ ହେବା ପରେ ଫିଲ୍ମର ଷ୍ଟାର କାଷ୍ଟ ଏବଂ ନିର୍ମାତାମାନଙ୍କୁ ଧମକ ମିଳିବା ଆରମ୍ଭ ହୋଇଛି । ଧମକ ବ୍ୟତୀତ ଫିଲ୍ମର ଷ୍ଟାର କାଷ୍ଟ ଏବଂ ନିର୍ମାତାଙ୍କ ଡିଟେଲ୍ସ ସୋସିଆଲ ମିଡିଆରେ ସେୟାର କରାଯାଉଛି । ସୋସିଆଲ ମିଡିଆରେ ତାଙ୍କର ଫଟୋ, ଫୋନ୍ ନମ୍ବର ଏବଂ ତାଙ୍କ ଘର ଠିକଣା ଲିକ୍ ହୋଇଛି । ଏଥି ସହିତ ମୁମ୍ବାଇ ପୋଲିସ ଫିଲ୍ମର ଷ୍ଟାର କାଷ୍ଟଙ୍କୁ ଆଶ୍ୱାସନା ଦେଇଛି ଯେ ଆମ ରହିବା ସମୟରେ ଆପଣଙ୍କର କୌଣସି କ୍ଷତି ହେବ ନାହିଁ ।

ଫିଲ୍ମର ଟ୍ରେଲରରେ ଦର୍ଶାଯାଇଛି ଯେ ମୁସଲମାନ ଧର୍ମରେ ମୌଳିକବାଦୀ ମୌଲାନାଙ୍କ ପ୍ରଭାବରେ ମୁସଲମାନ ମହିଳାମାନଙ୍କୁ କିପରି ନିର୍ଯାତନା ଦିଆଯାଉଛି । ଏହାର ଭିନ୍ନ ବିଷୟବସ୍ତୁ ହେତୁ ଫିଲ୍ମ ଚର୍ଚ୍ଚାରେ ରହିଛି । ଏହି ଫିଲ୍ମ ମୁସଲିମ ଧର୍ମକୁ ନେଇ ପ୍ରଶ୍ନ ଉଠାଇଛି । ତେବେ ଇସଲାମ ପୁରୁଷ ଏବଂ ମହିଳାଙ୍କ ପାଇଁ ଭିନ୍ନ ମାନଦଣ୍ଡ ଗ୍ରହଣ କରେ କି ? ଏପରି ଅନେକ ପ୍ରଶ୍ନ ରହିଛି । ଏବେ ଦେଖିବାରେ ଅଛି ଏହି ଫିଲ୍ମଟି ଦର୍ଶକଙ୍କୁ କେତେ ପସନ୍ଦ ଆସୁଛି ।