ଶାହାରୁଖଙ୍କୁ ଭେଟିବାକୁ ୨୦୨୦ରୁ ମନ୍ନତ ବାହାରେ ଠିଆ ହୋଇଛନ୍ତି ଏହି ବ୍ୟକ୍ତି, ଫିଲ୍ମ ସାଇନ୍‌ କରିବାକୁ ଧରିଛନ୍ତି ଜିଦ୍‌

ବଲିଉଡ୍‌ ସୁପରଷ୍ଟାର ଶାହାରୁଖ ଖାନ୍‌ଙ୍କର ଗୋଟିଏ ଝଲକ୍‌ ପାଇଁ ଫ୍ୟାନ୍‌ମାନେ ତାଙ୍କ ଘର ବାହାରେ ଘଣ୍ଟା ଘଣ୍ଟା ଧରି ଅପେକ୍ଷା କରି ରହିଥାନ୍ତି। କିନ୍ତୁ ଏବେ ଜଣେ ଫିଲ୍ମ ଡାଇରେକ୍ଟର ମଧ୍ୟ ଶାହାରୁଖ୍‌ ଖାନ୍‌ଙ୍କ ସହ ଭେଟିବାକୁ ତାଙ୍କ ବଙ୍ଗଳା ମନ୍ନତ ସାମ୍ନାରେ ଠିଆ ହୋଇଥିବା ଦେଖିବାକୁ ମିଳିଛି। କନ୍ନଡ଼ ଫିଲ୍ମ ନିର୍ଦ୍ଦେଶକ ଜୟନ୍ତ ସିଗେ ବଲିଉଡ୍‌ ସୁପରଷ୍ଟାରଙ୍କୁ ନିଜ ଫିଲ୍ମରେ ସାଇନ୍‌ କରାଇବା ପାଇଁ ତାଙ୍କ ଘର ବାହାରେ ଅପେକ୍ଷା କରିଛନ୍ତି।

ଜୟନ୍ତ ‘ମନ୍ନତ’ ବାହାରେ ଏକ ପ୍ଲା-କାର୍ଡ ଧରି ଠିଆ ହୋଇଛନ୍ତି। ସେ ମିଡିଆକୁ କହିଛନ୍ତି, ଅଗଷ୍ଟରେ ଯେତେବେଳେ ଶାହାରୁଖଙ୍କ ଇଣ୍ଟରଭ୍ୟୁ ପଢ଼ିଥିଲି ସେତେବେଳେ ସେ କହିଥିଲେ ଜିରୋ ପରେ କୌଣସି ନୂଆ ଫିଲ୍ମ ସାଇନ୍‌ କରିନାହାନ୍ତି। ଏଣୁ ତାଙ୍କୁ ମୁଁ ମୋ ଫିଲ୍ମରେ ଅଭିନୟ କରିବାକୁ ନେବାକୁ ଚାହୁଁଛି। ତେଣୁ ମୁଁ ରାତି ସାରା ଏକ ଫିଲ୍ମ ପୋଷ୍ଟର ତିଆରି କରି ଏହାକୁ ଟ୍ଵିଟ୍‌ କରିଥିଲି ଓ ଶାହାରୁଖଙ୍କୁ ମଧ୍ୟ ଟ୍ୟାଗ୍‌ କରିଥିଲି।

ସେ କହିଛନ୍ତି, ଯେତେବେଳ ଯାଏଁ ଶାହାରୁଖ ତାଙ୍କ ଫିଲ୍ମ ପାଇଁ ହଁ କରିନାହାନ୍ତି ସେତେବେଳ ଯାଏଁ ସେ ସେମିତି ମନ୍ନତ ସାମ୍ନାରେ ଠିଆ ହେବେ। ସେ ଏହି ମିଶନର ନାଁ ଦେଇଛନ୍ତି ‘ପ୍ରୋଜେକ୍ଟ ଏକ୍ସ’। ଡିସେମ୍ବର ୩୧ ପରଠାରୁ ଜୟନ୍ତ ଶାହାରୁଖଙ୍କ ଘର ସାମ୍ନାରେ ଛିଡ଼ା ହେଉଥିବା ଦେଖାଯାଇଛି।