ଟାଙ୍ଗି : କହ୍ନେଇପୁର ଛକରେ ଟ୍ରକ୍‌ ସହ କାର୍‌ ଧକ୍କା, ଜଣେ ମହିଳାଙ୍କ ମୃତ୍ୟୁ

ଟାଙ୍ଗି (କେ ନ୍ୟୁଜ୍‌) : ଭୁବନେଶ୍ୱର-ବ୍ରହ୍ମପୁର ୧୬ ନମ୍ବର ଜାତୀୟ ରାଜପଥରେ ଦୁର୍ଘଟଣା ଘଟି ଜଣକର ମୃତ୍ୟୁ ହୋଇଥିବା ବେଳେ ୪ଜଣ ଆହତ ହୋଇଛନ୍ତି । କିଛି ସମୟ ପୂର୍ବରୁ ନାଚୁଣୀ ଫାଣ୍ଡି ଅନ୍ତର୍ଗତ କହ୍ନେଇପୁର ଛକ ନିକଟରେ ଏହି ଦୁର୍ଘଟଣା ଘଟିଛି ।

ଆଜି ସକାଳୁ ନୟାଗଡ ପୋଲିସ ଟ୍ରେନିଂ ସ୍କୁଲରେ କାର୍ଯ୍ୟରତ ୨ ଜଣ କର୍ମଚାରୀ ନିଜ ପରିବାର ସହ ମୋଟ ୫ ଜଣ ଚିଲିକା ବୁଲିବାକୁଏକ ଟାଟା ନାନୋ କାର୍‌ରେ ଆସିଥିଲେ। ବୁଲାବୁଲି ସାରି ନୟାଗଡ ଫେରୁଥିବା ବେଳେ ନାଚୁଣୀ ଫାଣ୍ଡି ନିକଟସ୍ଥ କହେଁଇପୁର ଛକ ନିକଟରେ ସେମାନଙ୍କ କାରଟି ଦୁର୍ଘଟଣାଗ୍ରସ୍ତ ହୋଇଥିଲା। ଆଗରେ ପୂର୍ବରୁ ଠିଆ ହୋଇଥିବା ଏକ ଟ୍ରଲରର ପଛପଟୁ ନାନୋ କାର୍‌ଟି ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ଚାରି ଜଣଙ୍କ ଅବସ୍ଥା ଗୁରୁତର ରହିଛି। ମୃତକ ଜଣକ ହେଲେ ବୈଜୟନ୍ତୀ ପଟ୍ଟନାୟକ (୫୨)।

ଟ୍ରକ୍‌ଟି ଏତେ ଜୋର୍‌ରେ ଧକ୍କା ଦେଇଛି ଯେ କାର୍‌ଟିର କାୟା ବଦଳି ଯାଇଛି । ସୂଚନା ପାଇ ତୁରନ୍ତ ଘଟଣା ସ୍ଥଳରେ ନାଚୁଣୀ ଫାଣ୍ଡି ଅଧିକାରୀ ଉମାକାନ୍ତ ସାହୁ ସଦଳବଳେ ପହଁଚି ନିକଟସ୍ଥ ଗଙ୍ଗାଧରପୁର ଅଗ୍ନିଶମ ବାହିନୀ ସହାୟତାରେ ଆହତଙ୍କୁ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ । ଆହତ ୪ଜଣ ହେଉଛନ୍ତି ଏ. ସନ୍ତୋଷ କୁମାର, ଏ .ଜ୍ୟୋତି, ଏ. ଦୀନେଶ କୁମାର ଏବଂ ସାଧୁ ଚରଣ ପଟ୍ଟନାୟକ। ଘଟଣାସ୍ଥଳରେ ବାଣପୁର ଆଇଆଇସି ସଞ୍ଜୟ ପଟ୍ଟନାୟକ, ଏସ.ଆଇ ପ୍ରସନ୍ନ ଜେନା, ରାଜକିଶୋର ବେହେରା ଆଦି ଉପସ୍ଥିତି ରହି ଟ୍ରଫିକ ନିୟନ୍ତ୍ରଣ ସହ ଶବ ଜବତ କରି ପ୍ରାଥମିକ ତଦନ୍ତ ଆରମ୍ଭ କରିଛନ୍ତି ।