ସଞ୍ଜୟ ଦତ୍ତଙ୍କ ଝିଅ ତ୍ରିଶଲାଙ୍କ ଭାବବିହ୍ବଳ ପୋଷ୍ଟ, ପ୍ରେମିକଙ୍କ ଅକାଳ ବିୟୋଗରେ ଲେଖିଲେ କିଛି ଏପରି

ବଲିଉଡ୍‌ ଅଭିନେତା ସଞ୍ଜୟ ଦତ୍ତଙ୍କ ଝିଅ ତ୍ରିଶଲା ଏବେ ଚର୍ଚ୍ଚାର ପରିସରକୁ ଆସିଛନ୍ତି । କାରଣ କୌଣସି ମଜାମସ୍ତିକୁ ନେଇ ନୁହେଁ । ନିଜ ସୋସିଆଲ ମିଡିଆ ଆକାଉଣ୍ଟରେ କରିଥିବା ଏକ ଭାବବିହ୍ଵଳ ପୋଷ୍ଟ ପାଇଁ ଏବେ ସେ ଚର୍ଚ୍ଚାକୁ ଆସିଛନ୍ତି । ତ୍ରିଶଲା ନିଜର ପ୍ରେମିକଙ୍କୁ ହରାଇବା ପରେ ଏଭଳି ପୋଷ୍ଟ ସେୟାର କରିଛନ୍ତି । ସୂଚନା ଅନୁଯାୟୀ, ତ୍ରିଶଲାଙ୍କ ଇଟାଲିଆନ ପ୍ରେମିକଙ୍କ ହଠାତ ନିଧନ ହୋଇଯିବା ପରେ ସେ ସମ୍ପୂର୍ଣ୍ଣ ଭାଙ୍ଗିଯାଇଛନ୍ତି । ତେଣୁ ସେ ତାଙ୍କୁ ମନେପକାଇ ଇନ୍‌ଷ୍ଟାରେ ଏକ ପୋଷ୍ଟ କରିଛନ୍ତି ।

ପ୍ରେମିକଙ୍କ ସହ ଉଠାଇଥିବା ଏକ ଫଟୋ ସେୟାର କରି ତ୍ରିଶଲା ଲେଖିଛନ୍ତି, ମୋ ହୃଦୟ ଭାଙ୍ଗି ଯାଇଛି । ଧନ୍ୟବାଦ ମୋତେ ଏତେ ଭଲପାଇବା ଦେବା ସହ, ମୋର ସୁରକ୍ଷା ଏବଂ ଯତ୍ନ ନେବା ପାଇଁ । ତୁମେ ମୋତେ ଦୁନିଆର ସବୁ ଖୁସି ଦେବା ସହ ଖୁସିରେ ରହିବାକୁ ଶିଖାଇଥିଲ। ତୁମେ ମୋ ଭିତରେ ସବୁଦିନ ପାଇଁ ବଞ୍ଚି ରହିବ । ମୁଁ ତୁମକୁ ବହୁତ ଭଲ ପାଉଛି । ଆମେ ଦ୍ୱିତୀୟ ଥର ନଦେଖା ହେବା ପର୍ଯ୍ୟନ୍ତ ମୁଁ ତୁମକୁ ସବୁବେଳେ ମନେ ପକାଉଥିବି । ତେବେ ମଙ୍ଗଳବାର ତାଙ୍କ ପ୍ରେମିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । କିନ୍ତୁ ମୃତ୍ୟୁ ପଛର କାରଣ ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।