ନିଜ ଅପହରଣ ଯୋଜନା ରଚିଥିଲା ୧୪ ବର୍ଷୀୟ ନାବାଳକ, ଘର ଲୋକଙ୍କ ଠାରୁ ଦାବି କରିଥିଲା ୧୦ ଲକ୍ଷ ଟଙ୍କା   

ବୁଧବାର ରାତିରେ ଚେନ୍ନାଇର ଏକ ପରିବାର ନିକଟକୁ ଏକ ଫୋନ କଲ ଆସିଥିଲା । ଫୋନରେ ଘର ଲୋକ ଜାଣିବାକୁ ପାଇଲେକି ୧୪ ବର୍ଷର ତାଙ୍କ ପୁଅକୁ କିଏ ଅପହରଣ କରିନେଇଛି । ଯଦି ପୁଅକୁ ଫେରିପାଇବାକୁ ଚାହୁଁଛନ୍ତି ତେବେ ୧୦ ଲକ୍ଷ ଟଙ୍କା ଫିରୋତି ବାବଦରେ ଦେବାକୁ ପଡିବ । ଫୋନ କଲ ରିସିଭ ପରେ ବାଳକଟିର ପିତା ସ୍ଥାନୀୟ ପୋଲିସ ଷ୍ଟେସନରେ ଏକ ଏତଲା ଦାୟର କଲେ । ମିଳିଥିବା ସୂଚନା ଅନୁଯାୟୀ, ପୋଲିସ ଟିମ ଯାଞ୍ଚରୁ ଅଭିଯୁକ୍ତ ମାନଙ୍କ ବିଷୟରେ ଜାଣି ପାରିବା ପରେ ଘଟଣା ସ୍ଥଳରେ ଯାଇ ପହଂଚିଥିଲେ । ଘଟଣା ସ୍ଥଳରେ ପୋଲିସ ଅପହୃତ ୧୪ ବର୍ଷୀୟ ନାବାଳକକୁ ଉଦ୍ଧାର କରିଥିଲେ । ପୋଲିସ ବାଳକ ଟିକୁ ଉଦ୍ଧାର କରିବା ସହ ନିକଟସ୍ଥ ସିସିଟିଭି ଫୁଟେଜ ଗୁଡିକୁ ଯାଞ୍ଚ କରିଥିଲେ । କିନ୍ତୁ ଏହି ସମୟରେ ବାଳକ ଟିକୁ ଏବାବଦରେ ପଚରା ଉଚୁରା କରାଯିବାରୁ ବାଳକ ଜଣଙ୍କ ପୋଲିସର ପ୍ରଶ୍ନ ଗୁଡିକୁ ଟାଳି ଦେଇଥିଲା ।

କିନ୍ତୁ ସିସିଟିଭି ତନାଘନାରୁ ପୋଲିସକୁ ଯେଉଁ ସୁରାକ ମିଳିଥିଲା ତାହା ସମସ୍ତଙ୍କୁ ତାଯୁବ କରି ଦେଇଥିଲା । ସିସିଟିଭରୁ ଜଣାଯାଇଥିଲାକି ଏକ ଅଟୋରିକ୍ସା ନାବାଳକଟିକୁ ଷ୍ଟାଡିୟମ ନିକଟରେ ଓଲ୍ହାଇ ଦେଇଥିଲା । ଅଟୋର ରେଜିଷ୍ଟ୍ରେସନ ନମ୍ବରରୁ ପୋଲିସ ଡ୍ରାଇଭର ଜଣଙ୍କୁ ଠାବ କରିଥିଲେ । ଡ୍ରାଇଭର ଜଣଙ୍କୁ ପଚରା ଉଚୁରାରୁ ପୋଲିସ ଜାଣିବାକୁ ପାଇଥିଲେକି, ସେହି ନାବାଳକ ଓ ତାଙ୍କର ଜଣେ ସାଙ୍ଗ ଏକା ସାଥିରେ ମୋବାଇଲ ଆପ ଜରିଆରେ ଅଟୋ ବୁକିଙ୍ଗ କରିଥିବା ବେଳେ ଭଡା ବାବଦରେ ୪୦  ଟଙ୍କା ଦେଇଥିଲେ । ଏହା ପରେ ଅଟୋରିକ୍ସା ଡ୍ରାଇଭର ଠାରୁ ସବୁ ଶୁଣିବା ପରେ ପୋଲିସ ଅପହରଣ ହୋଇଥିବା ବାଳକ ନିକଟରେ ପହଞ୍ଚିଥିଲା । ପୋଲିସ ଭୟରେ ନାବାଳକଟି ସ୍ୱୀକାର କରିଥିଲାକି, ଏହି ସମସ୍ତ ଅପହରଣ ଘଟଣା ନିଜେ ନାବାଳକ ଜଣଙ୍କ ପୂର୍ବରୁ ଯୋଜନା କରିଥିଲା ।

ବାପାଙ୍କ ସିଂପାଥି ପାଇବାକୁ ଏହି ସବୁ ପ୍ଲାନ କରିଥିଲା ୧୪ ବର୍ଷୀୟ ନାବାଳକ ଜଣଙ୍କ । ଆଉ ନିଜ ବୟାନରେ ନାବାଳକ ଜଣଙ୍କ ସ୍ୱୀକାର କରିଛିକି, ଏକ ମୋବାଇଲ ଆପ୍ଲିକେସନ ବ୍ୟବହାର କରି ନିଜ ସ୍ୱର ବଦଳାଇ ଘର ଲୋକଙ୍କ ସହ କଥା ହୋଇଥିଲା । ପୋଲିସ ନିଜ ବୟାନରେ କହିଛନ୍ତିକି, ଅଧିକାଂଶ ସମୟରେ ନାବାଳକ ଟିର ପିତା ତା ଉପରେ ରାଗିବା ସହ କଡ଼ା ତାଗିଦ କରନ୍ତି । ଏହା ନାବାଳକଟିକୁ ଅତିଷ୍ଠ କରି ଦେଇଥିବା ବେଳେ ସିଂପାଥି ପାଇବା ପାଇଁ ନିଜ ଅପହରଣ ଯୋଜନା ରଚିଥିଲା । କିନ୍ତୁ ଅପହରଣରେ ଟଙ୍କା ଡିମାଣ୍ଡ କଲେ ଏହା ଏକ ପ୍ରକୃତ ଅପହରଣ ଭଳି ଲାଗିବ ବୋଲି ୧୦ ଲକ୍ଷ ଟଙ୍କା ଦାବି କରିଥିଲା ।