କ୍ରିକେଟ୍‌ ଜରିଆରେ ସମ୍ପର୍କ ସେତୁ : ଇମ୍ରାନ୍‌ଙ୍କୁ ‘ବ୍ୟାଟ୍‌’ ଭେଟି ଦେଲେ ଭାରତୀୟ ହାଇକମିଶନର୍‌

ନୂଆଦିଲ୍ଲୀ : ପଡ଼ୋଶୀ ପାକିସ୍ତାନ ସହିତ ସୁସମ୍ପର୍କ ଯୋଡ଼ିବାର ଆଉ ଏକ ବାର୍ତ୍ତା। ନୂଆ ପ୍ରଧାନମନ୍ତ୍ରୀ ଭାବେ ପୂର୍ବତନ କ୍ରିକେଟର୍‌ ତଥା ବର୍ତ୍ତମାନର ରାଜନୈତିକ ନେତା ଇମ୍ରାନ୍‌ ଖାନ୍‌ ଶପଥ ନେବା ବାକି ଅଛି । ତା ପୂର୍ବରୁ ସୁ ସମ୍ପର୍କ ଯୋଡ଼ିବା ପାଇଁ ଭାରତ ପକ୍ଷରୁ ଉଦ୍ୟମ ଜାରି ରହିଛି । ଆଜି ପାକିସ୍ତାନ ସ୍ଥିତ ଭାରତୀୟ ହାଇକମିଶନର୍‌ ଅଜୟ ବିସାରିଆ ଇମ୍ରାନ୍‌ଙ୍କୁ ଭେଟି ତାଙ୍କୁ ଏକ ବ୍ୟାଟ୍‌ ଉପହାର ଦେଇଛନ୍ତି । ଏହି ବ୍ୟାଟ୍‌ରେ ପୂରା ଭାରତୀୟ କ୍ରିକେଟ୍‌ ଟିମ୍‌ର ଖେଳାଳିମାନେ ଦସ୍ତଖତ କରିଛନ୍ତି । ସାଧାରଣ ନିର୍ବାଚନରେ ତାଙ୍କ ଦଳ ପାକିସ୍ତାନ ତେହରିକ-ଇ- ଇନସାଫ ‘ପିଟିଆଇ’ର ସଫଳତା ପାଇଁ ବିସାରିଆ ଇମ୍ରାନ୍‌ଙ୍କୁ ଅଭିନନ୍ଦନ ଜଣାଇଛନ୍ତି । ଏହା ସହିତ ଦୁଇ ଦେଶ ମଧ୍ୟରେ ସମ୍ପର୍କ ପ୍ରସଙ୍ଗରେ ମଧ୍ୟ ସକାରାତ୍ମକ ଆଲୋଚନା କରିଛନ୍ତି । ଏ ନେଇ ଟ୍ଵିଟ୍‌ କରି ସୂଚନା ଦେଇଛନ୍ତି ହାଇକମିଶନର୍‌ ବିସାରିଆ । ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ଗତ ଜୁଲାଇ ୩୦ ତାରିଖରେ ଇମ୍ରାନ୍‌ଙ୍କୁ ଅଭିନନ୍ଦନ ଜଣାଇଥିଲେ । ଗତ ନିର୍ବାଚନରେ ଇମ୍ରାନ୍‌ଙ୍କ ପିଟିଆଇ ଦଳ ସର୍ବାଧିକ ୧୧୬ଟି ଆସନ ଜିତିଛି । ଅଗଷ୍ଟ ୧୧ ତାରିଖ ଦିନ ସେ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବେ ବୋଲି ଘୋଷଣା କରାଯାଇଥିଲା । ତେବେ ବର୍ତ୍ତମାନ ପାଇଁ ଏହାକୁ ସ୍ଥଗିତ ରଖାଯାଇଛି । ଅଗଷ୍ଟ ୧୮ ତାରିଖରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ ବୋଲି ସୂଚନା ମିଳିଛି । ସେପଟେ ପାକିସ୍ତାନ ପକ୍ଷରୁ ଶପଥ ଗ୍ରହଣ ଉତ୍ସବରେ ଯୋଗ ଦେବା ପାଇଁ କୌଣସି ଯୋଗାଯୋଗ କରାଯାଇ ନାହିଁ ବୋଲି ଭାରତୀୟ ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ କୁହାଯାଇଛି । ଯଦି ଯୋଗାଯୋଗ କରାଯାଏ ତେବେ ବିଚାର କରାଯିବ ବୋଲି ବିଭାଗୀୟ ଅଧିକାରୀ ପ୍ରକାଶ କରିଛନ୍ତି ।