ବଡ଼ ଲୋକଙ୍କ ବଡ଼ ଚିନ୍ତା , ରତନ ଟାଟାଙ୍କ ମୌସୁମୀ ଟ୍ଵିଟକୁ ନେଇ ଚର୍ଚ୍ଚା

ଛୋଟିଏ କଥାଟିଏ, ହେଲେ ସଭିଁଙ୍କ ମନକୁ ଆସେନି । କେବଳ ବଡ଼ ବ୍ୟକ୍ତିତ୍ୱ ନୁହଁନ୍ତି, ସମାଜ ପ୍ରତି ସମର୍ପଣ ଭାବ ଥିବା ବ୍ୟକ୍ତି ହିଁ  ଏପରି ଛୋଟ କଥାକୁ ମଧ୍ୟ ଚିନ୍ତା କରି ପାରନ୍ତି । ବର୍ଷା ଦିନ ଆସିଛି, ଅଧିକାଂଶ ସ୍ଥାନରେ ଭଲ କରି ବର୍ଷା ଦୁଇ ଅସରା ମଧ୍ୟ ହୋଇଗଲାଣି । ବର୍ଷା ସମୟରେ ବୁଲା ପଶୁ ବିଶେଷ କରି ବୁଲା କୁକୁର ଓ ବିଲେଇ ଅସୁବିଧାରେ ପଡିଥାନ୍ତି । ବର୍ଷାରୁ ରକ୍ଷା ପାଇବା ପାଇଁ କେବେ କାହା ଗାଡି ତଳେ ଏହି ପଶୁମାନେ ଆଶ୍ରୟ ନେଇଥାନ୍ତି ।

ହେଲେ ଆମେ ଏମାନଙ୍କ ବିଷୟରେ କ୍ୱଚିତ୍‌ ଚିନ୍ତା କରିଥାଉ । କେବେ କେବେ ଅଜଣାରେ ଆମେ ଗାଡ଼ି ଚଲାଇବା ଦ୍ୱାରା ଏଡି ବୁଲା ପଶୁମାନେ ଆହତ ହୋଇଥାନ୍ତି ତ କେବେ ମଧ୍ୟ ମୃତ୍ୟୁ ମୁଖରେ ପଡିଥାନ୍ତି ।

ଏହି ବର୍ଷା ସମୟରେ ଶିଳ୍ପପତି ରତନ ଟାଟାଙ୍କ ଏକ ଛୋଟିଆ ଟ୍ଵିଟ ବଡ଼ କଥା କହିଛି । ଯାହା ସାଧାରଣତଃ ଆମେ ଭୁଲିଯାଇଥାଉ । ହେଲେ ରତନ ଟାଟା ଏହାକୁ ଟ୍ଵିଟ କରି ଖାଲି ମାନବିକତାର ପରିଚୟ ଦେଇ ନାହାଁନ୍ତି, ତାଙ୍କ ଟ୍ଵିଟ ଏବେ ଚର୍ଚ୍ଚାରେ ରହିଛି ।

ଶ୍ରୀ ଟାଟା ତାଙ୍କ ଟ୍ଵିଟରେ ଲେଖିଛନ୍ତି, ଏବେ ମୌସୁମୀ ଆସିଯାଇଛି । ବର୍ଷା ପାଇଁ ଅନେକ ବୁଲା କୁକୁର ଓ ବିଲେଇ ବର୍ଷାରୁ ରକ୍ଷା ପାଇବା ପାଇଁ ଆମ କାର ତଳେ ଆଶ୍ରୟ ନେବେ । ଆମେ ଗାଡି ଚଳାଇବା ପୂର୍ବରୁ ଆମ ଗାଡି ତଳ ଚେକ୍‌ କରିବା ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆମେ ଗାଡି ଛାଡିବା ପୂର୍ବରୁ ଏକ୍ସିଲେଟର ବଢ଼ାଇ ଶବ୍ଦ କରି ସେମାନଙ୍କୁ ଘଉଡାଇବା ଦରକାର । ନଚେତ ଏହି ପ୍ରାଣୀମାନଙ୍କର ଜୀବନ ପ୍ରତି ବିପଦ ହୋଇପାରେ ।

ଆମର ଟିକିଏ ଅସାବଧାନତାଃ ଏହି ନୀରିହ ପଶୁଙ୍କ ଜୀବନ ନଷ୍ଟ କିମ୍ବା ଅପାଙ୍ଗ କରିପାରେ । ତେଣୁ ଗାଡି ଛାଡି ବା ପୂର୍ବରୁ ଆମ ଗାଡି ତଳ ନୀରିକ୍ଷଣ କରିନେବା ଜରୁରୀ । ଏହା ଆହୁରି ଭଲ ହେବ ଯଦି ବର୍ଷା ଦିନେ ଆମେ ତାଙ୍କ ପାଇଁ କିଛି ଅସ୍ଥାୟୀ ରହିବା ସ୍ଥାନ କରିଦେଇ ପାରନ୍ତେ ।

ରତନ ଟାଟାଙ୍କ ଏହି ଛୋଟିଆ ଟ୍ଵିଟ ଭାଇରାଲ ହେବାରେ ଲାଗିଛି । ଏକ ଛୋଟିଆ ଟ୍ଵିଟ ମାଧ୍ୟମରେ ଶ୍ରୀ ଟାଟା ବହୁତ ବଡ଼ କଥା କହିଦେଇଛନ୍ତି । ବାସ୍ତବରେ ଏବେ ବଡ଼ ଶିଳ୍ପପତିଙ୍କ ବ୍ୟସ୍ତ ଜୀବନରେ ଛୋଟ ପଶୁଟିଏ ପାଇଁ ତାଙ୍କର ଚେତନଶୀଳତା ବହୁତ କିଛି ମୂଲ୍ୟାୟନ କରେ ।