ସରକାର ବଞ୍ଚାଇବା ପାଇଁ ଇମ୍ରାନ୍‌ ଖାନ୍‌ ଚଳାଇଲେ ଚାଲ୍‌, ବିପକ୍ଷଙ୍କ ର‍୍ୟାଲି ରୋକିବା ପାଇଁ ଦେଲେ ଆତଙ୍କୀ ଆକ୍ରମଣ ଚେତାବନୀ

ପାକିସ୍ତାନରେ ଇମ୍ରାନ ସରକାରଙ୍କ ଏବେ ଖରାପ ସମୟ ଚାଲିଛି । ଦେଶରେ ବେଶ୍‌ କିଛି ଦିନ ଧରି ବିରୋଧୀଙ୍କ ଆକ୍ରମଣର ଶିକାର ହୋଇଛନ୍ତି ପ୍ରଧାନମନ୍ତ୍ରୀ ଇମ୍ରାନ୍‌ ଖାନ୍‌ । ବିପକ୍ଷଙ୍କ ଏହି ବିରୋଧୀ ର‍୍ୟାଲିକୁ ବନ୍ଦ କରିବା ପାଇଁ ଇମ୍ରାନ ଖାନ୍‌ ସବୁ ପ୍ରକାର ଉଦ୍ୟମ ଚଳାଇଛନ୍ତି । ଏପରିକି ର‍୍ୟାଲିରେ ଆତଙ୍କବାଦୀ ଆକ୍ରମଣ ହେବାର ଚେତାବନୀ ଜାରି କରିଛନ୍ତି ।

୧୧ ବିରୋଧୀ ଦଳକୁ ନେଇ ଗଠିତ ମେଣ୍ଟ ଡେମୋକ୍ରାଟିକ୍‌ ମୁଭମେଣ୍ଟ ୧୩ ଡିସେମ୍ବର ରେ ଲାହୋର ଠାରେ ଆନ୍ଦୋଳନ ଦେବାକୁ ଧମକ ଦେଇଛି । ଏହାକୁ ପ୍ରତିହତ କରିବା ପାଇଁ ଇମ୍ରାନ ସରକାର ଆନ୍ଦୋଳନକାରୀଙ୍କୁ ଡରାଇଛନ୍ତି ଯେ ତହରିକ୍‌-ଏ-ତାଲିବାନ୍‌ (ଟଟିପି) ଆତଙ୍କୀ ଆକ୍ରମଣ କରିବାର ଯୋଜନା କରୁଛି ।

ତେଣୁ କୈାଣସି ସ୍ଥାନରେ ଅଧିକ ସଂଖ୍ୟାରେ ଲୋକ ଏକାଠି ନହେବାକୁ ସରକାର ଚେତାବନୀ ଜାରି କରିଛନ୍ତି । ଏଆର୍‌ବାଇ ନ୍ୟୁଜ୍‌ ଅନୁଯାୟୀ, ପୂର୍ବରୁ ଏକ ଆତଙ୍କବାଦୀ ଆକ୍ରମଣ ଯୋଜନାକୁ ପଣ୍ଡ କରିଦିଆଯାଇଥିବାରୁ ପୁଣି ଥରେ ଟିଟିପି ଆକ୍ରମଣ କରିପାରେ । ତେଣୁ ଆନ୍ଦୋଳନ ପାଇଁ କଡ଼ା ସତର୍କତାମୂଳକ ପଦକ୍ଷେପ ନେବାକୁ ସରକାର ଚେତାବନୀ ଦେଇଛନ୍ତି । ଏହା ପୂର୍ବରୁ କୋଭିଡ୍‌ ସତର୍କତା ପାଇଁ ଆନ୍ଦୋଳନ ରୋକିବାକୁ ଇମ୍ରାନ ଖାନ୍‌ ଅପିଲ୍‌ କରିଥିଲେ । ହେଲେ ୧୩ ଡିସେମ୍ବର ର‍୍ୟାଲି ବନ୍ଦ କରାଯିବ ନାହିଁ ମେଣ୍ଟ ଦଳ ପ୍ରକାଶ କରିଥିଲା ।