ହମାସ ଉପରେ ତୋପ ପରେ ତୋପ ଛାଡ଼ିଚାଲିଛି ଇସ୍ରାଏଲ, ଭୟରେ ସୀମା ଖାଲି କରୁଛନ୍ତି ଅଧିବାସୀ

ଇସ୍ରାଏଲ ଓ ପାଲେଷ୍ଟାଇନ ମଧ୍ୟରେ ଏବେ ଘମାଘୋଟ ଯୁଦ୍ଧ ଚାଲିଛି । ଆଉ ଏବେ ଇସ୍ରାଏଲ ଗାଜା ମାଟି ତଳେ ସୁଡ଼ଙ୍ଗ ଖୋଳି ହମାସ ସହରକୁ ସମ୍ପୂର୍ଣ୍ଣ ରୂପେ ନଷ୍ଟ କରିବା ପାଇଁ ବମ ପକେଇବା ଆରମ୍ଭ କରିଦେଇଛି । ପାଖାପାଖି ୪୦ ମିନିଟ ପର୍ଯ୍ୟନ୍ତ ଗୁଳିବର୍ଷଣ କରିଥିଲା ଇସ୍ରାଏଲ । ଜବାବରେ ହମାସ ତରଫରୁ ବି ଇସ୍ରାଏଲର ଜେରୁଷେଲମ ଓ ତେଲ ଅବିବ ସମେତ ଅନ୍ୟ ସହର ଗୁଡିକ ଉପରେ ରକେଟ ମାଡ କରାଯାଇଛି । ଏମିତିକି ଲେବାନନ ବି କିଛି ରକେଟ ଛାଡ଼ିଛି । କିନ୍ତୁ ନିଜେ ଲେବାନନ ଏହାକୁ ଖଣ୍ଡନ କରିଛି ।

ପାଲେଷ୍ଟାଇନ ଅଧିକାରୀଙ୍କ ଅନୁଯାୟୀ ଏହି ଘଟଣାରେ ଏଯାବତ ୧୧୯ ଜଣ ପ୍ରାଣ ହରାଇଛନ୍ତି । ଯେଉଁ ମାନଙ୍କ ମଧ୍ୟରୁ ୩୧ ଜଣ ଶିଶୁ ଥିବା ବେଳେ ୧୯ ଜଣ ମହିଳା ଅଛନ୍ତି । ଯେବେକି ୮୩୦ ରୁ ଅଧିକ ଜଣ ଆହତ ହୋଇଥିବା ନେଇ ସୂଚନା ମିଳିଛି । ମୃତକଙ୍କ ମଧ୍ୟରେ ଇସ୍ରାଏଲର ୮ ଜଣ ଥିବା ଜଣାଯାଇଛି । ଗାଜାର ଉତ୍ତର ପୂର୍ବ ଅଂଚଳ ସ୍ଥିତ ଇସ୍ରାଏଲ ସୀମାରେ ରଖାଯାଇଥିବା ଥିବା ତୋପରୁ ପାଖାପାଖି ୪୦ ମିନିଟ ଧରି ଗୁଳିବର୍ଷଣ କରାଯାଇଥିଲା । ଭୟରେ ଉଭୟ ଦେଶର ସୀମାବର୍ତ୍ତୀ ଅଞ୍ଚଳର ଲୋକମାନେ ସ୍ଥାନାନ୍ତରିତ ମଧ୍ୟ ହୋଇ ଯାଇଛନ୍ତି । ସଂଯୁକ୍ତ ରାଷ୍ଟ୍ରର ସମନ୍ଵୟ କାର୍ଯ୍ୟାଳୟ ଅନୁସାରେ ଏଭିତରେ ଗାଜାରେ ପ୍ରାୟ ଦୁଇ ଶହରୁ ଅଧିକ ଘର ଧ୍ବଂସ ହୋଇଯାଇଛି ।

କୋଟି କୋଟି ସଂଖ୍ୟକ ଲୋକ ଗାଜାର ସ୍କୁଲରେ ଶରଣ ନେଇଛନ୍ତି । ଇସ୍ରାଏଲର ସୈନ୍ୟ ପ୍ରବକ୍ତା ଲେଫନାଣ୍ଟ କର୍ଣ୍ଣଲ ଜୋନାଥନ କୋନୋରିକ୍ସଙ୍କ ଅନୁଯାୟୀ ଆମର ଏହି ଅପରେସନରେ ୧୬୦ ଟି ଉଡ଼ାଜାହାଜ, ସ୍ଥଳ ସେନା ଭାଗ ନେଇଛନ୍ତି । ଏବେ ବି ଯୁଦ୍ଧ ଜୋରଦାର ଚାଲିଥିଲେ ମଧ୍ୟ ଇସ୍ରାଏଲ ସେନା ଏପର୍ଯ୍ୟନ୍ତ ଗାଜା ସୀମା ଅତିକ୍ରମ କରିନାହାନ୍ତି । ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନେହୟୁଙ୍କ ଅନୁଯାୟୀ ଏହି ଅଭିଯାନକୁ ପୁରା କରିବା ପାଇଁ ଏବେ ଆହୁରି କିଛି ଦିନ ଲାଗିବ ।