ପ୍ରେସକ୍ରିପସନ୍‌ ରେ ଆଣ୍ଟି ବାୟୋଟିକ୍‌ ଲେଖିଲେ ଡାକ୍ତରଙ୍କୁ କହିବାକୁ ପଡ଼ିବ କାରଣ, ସ୍ୱାସ୍ଥ୍ୟ ମନ୍ତ୍ରଣାଳୟର ବଡ଼ ପଦକ୍ଷେପ

ଶୀତଦିନେ ଥଣ୍ଡା, କାଶ ଏବଂ ଜ୍ୱର ହେବା ସ୍ୱାଭାବିକ୍‌ ଏବଂ ବର୍ତ୍ତମାନ ଏହା ଦ୍ରୁତଗତିରେ ବୃଦ୍ଧି ପାଉଛି । କିଛି ଲୋକମାନଙ୍କ ମଧ୍ୟରେ ଜ୍ୱର ଅନେକ ଦିନ ଧରି ରହିଥାଏ ଏବଂ ଯେତେ ମେଡିସିନ୍‌ ଖାଇଲେ ମଧ୍ୟ ଜ୍ୱର ଛାଡ଼ିବାର ନାଁ ନିଏନି । ତେଣୁ ଆଣ୍ଟି ବାୟୋଟିକ୍‌ ବ୍ୟବହାର ବଢ଼ିଯାଇଛି । ଅନ୍ୟପଟେ ଜୀବାଣୁ ଦ୍ୱାରା ହେଉଥିବା ରୋଗକୁ ଦୂର କରିବା ପାଇଁ ଆଣ୍ଟିବାୟୋଟିକ୍ ବ୍ୟବହାର କରାଯାଏ । କିନ୍ତୁ ଭାଇରସ୍‌ କିମ୍ବା ଫଙ୍ଗସ୍ ଦ୍ୱାରା ହେଉଥିବା ରୋଗରେ ମଧ୍ୟ ଲୋକମାନେ ଆଣ୍ଟିବାୟୋଟିକ୍ ବ୍ୟବହାର କରନ୍ତି । ଏପରିକି ଔଷଧ ଦୋକାନରେ ଥିବା କେମିଷ୍ଟମାନେ ମଧ୍ୟ ମନ ଇଚ୍ଛା ଆଣ୍ଟିବାୟୋଟିକ୍ ରୋଗୀକୁ ଦିଅନ୍ତି । ଫଳରେ ଆଣ୍ଟିବାୟୋଟିକ୍ ନିଜର ପ୍ରଭାବ ହରାଇବା ଆରମ୍ଭ କରିଛି । ଯେତେବେଳେ ଶରୀର ପ୍ରକୃତରେ ଆଣ୍ଟିବାୟୋଟିକ୍ ଆବଶ୍ୟକ କରୁଛି ସେତେବେଳେ ଆଣ୍ଟିବାୟୋଟିକ୍‌ ଆଉ କାମ କରୁନାହିଁ । ଏହି ପରିସ୍ଥିତିକୁ ଦୃଷ୍ଟିରେ ରଖି କେନ୍ଦ୍ର ସରକାର ଏକ ବଡ ପଦକ୍ଷେପ ନେଇଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟ ଦେଶର ସମସ୍ତ ଡାକ୍ତରଙ୍କୁ ଯେତେବେଳେ ସେମାନେ କାହାକୁ ଆଣ୍ଟିବାୟୋଟିକ୍ ଲେଖୁଛନ୍ତି ସେତେବେଳେ ଏହାର କାରଣ ଏବଂ ଏହାର ପରିଣାମ ବିଷୟରେ ଲେଖିବାକୁ କହିଛନ୍ତି । କେବଳ ଏତିକି ନୁହେଁ, ଯଦି ଡାକ୍ତରମାନେ ଆଣ୍ଟିବାୟୋଟିକ୍ ଔଷଧ ଲେଖୁଛନ୍ତି ତେବେ ରୋଗୀକୁ ସଠିକ୍ ଭାବରେ ଏହି ଔଷଧ ବିଷୟରେ କହିବାକୁ ପଡ଼ିବ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ ତରଫରୁ ଏକ ନୋଟିସ୍‌ ଜାରି କରାଯାଇଛି ।

ବିଶେଷଜ୍ଞମାନେ ଏନେଇ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି ଯେ ଭାଇରାଲ୍ ସଂକ୍ରମଣ ବୃଦ୍ଧି ହେବାର ଗୋଟିଏ କାରଣ ହେଉଛି ଆଣ୍ଟିବାୟୋଟିକ୍ ର ଅତ୍ୟଧିକ ବ୍ୟବହାର । ତେଣୁ ଚିକିତ୍ସକମାନଙ୍କୁ ଆଣ୍ଟି ବାୟୋଟିକ୍‌ ଲେଖିବା ଠାରୁ ଦୂରେଇ ରହିବାକୁ ସରକାର କହିଛନ୍ତି ଏବଂ ଯଦି ଡାକ୍ତରମାନେ ପ୍ରେସକ୍ରିପସନ୍‌ ରେ ଆଣ୍ଟି ବାୟୋଟିକ୍‌ ଲେଖୁଛନ୍ତି ତେବେ ବାଧ୍ୟତାମୂଳକ ଭାବେ ଏହାର ନିର୍ଦ୍ଦିଷ୍ଟ କାରଣ ବୁଝାଇବାକୁ ସ୍ୱାସ୍ଥ୍ୟ ମନ୍ତ୍ରଣାଳୟ ନୋଟିସ ଜାରି କରିଛି ।

ରିପୋର୍ଟ ଅନୁସାରେ ମେଡିକାଲ କଲେଜଗୁଡିକର ସମସ୍ତ ଡାକ୍ତରଙ୍କୁ ଏକ ନୋଟିସ୍‌ ଜାରି କରାଯାଇଛି ଯେଉଁଥିରେ ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ ଡାକ୍ତର ଅତୁଲ ଗୋୟଲ ସେମାନଙ୍କୁ ଆଣ୍ଟିମାଇକ୍ରୋବାୟଲ୍ ଔଷଧ ଲେଖିବାବେଳେ ଏହାର ପ୍ରକୃତ କାରଣ ଉଲ୍ଲେଖ କରିବାକୁ କହିଛନ୍ତି ।

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଅନୁଯାୟୀ ଆଣ୍ଟିବାୟୋଟିକ୍ ଔଷଧର ଅତ୍ୟଧିକ ବ୍ୟବହାରକୁ ରୋକିବା ପାଇଁ ଏଭଳି ପଦକ୍ଷେପ ନିଆଯାଇଛି । ଆଣ୍ଟି-ମାଇକ୍ରୋବାୟାଲ୍ ରେଜିଷ୍ଟ୍ରେସ୍‌ (AMR) ବିଶ୍ୱର ଶ୍ରେଷ୍ଠ ଦଶଟି ଜନସ୍ୱାସ୍ଥ୍ୟ ବିପଦ ମଧ୍ୟରୁ ଅନ୍ୟତମ । ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ଫାର୍ମାସିଷ୍ଟମାନଙ୍କୁ ଡ୍ରଗ୍ସ ଏବଂ କସମେଟିକ୍ସ ନିୟମର ସିଡ୍ୟୁଲ୍ H ଏବଂ H1 କାର୍ଯ୍ୟକାରୀ କରିବାକୁ ପଡ଼ିବ ଏବଂ କେବଳ ପ୍ରେସକ୍ରିପସନ୍ ରେ ଲେଖାଥିଲେ ହିଁ ଆଣ୍ଟିବାୟୋଟିକ୍ ବିକ୍ରି କରିବାକୁ କୁହାଯାଇଛି । ଏହା ସହିତ ଆଣ୍ଟି-ମାଇକ୍ରୋବାୟଲ୍ ଔଷଧ ଲେଖିବା ପଛରେ ପ୍ରକୃତ କାରଣ ଜଣାଇବାକୁ ଡାକ୍ତରଙ୍କୁ କୁହାଯାଇଛି ।

ଆଣ୍ଟିବାୟୋଟିକ୍ କୁ ଅଧିକ ପ୍ରୋତ୍ସାହିତ ନକରିବା ଏବଂ ନିର୍ଦ୍ଦେଶକୁ କାର୍ଯ୍ୟକାରୀ କରିବା ପାଇଁ ସରକାର ସମସ୍ତ ଚିକିତ୍ସକ ଏବଂ ଡାକ୍ତରଙ୍କୁ ନିବେଦନ କରିଛନ୍ତି । ଆକଳନ ଅନୁଯାୟୀ ୨୦୧୯ରେ ବିଶ୍ୱର ୧.୨୭ ମିଲିୟନ ଲୋକଙ୍କ ମୃତ୍ୟୁ ବ୍ୟାକ୍ଟେରିଆଅଲ୍‌ AMR ପାଇଁ ହୋଇଥିଲା ଏବଂ ଡ୍ରଗ୍ ରେଜିଷ୍ଟ୍ରସ୍‌ ସଂକ୍ରମଣରେ ୪.୯୫ ମିଲିୟନ ଲୋକଙ୍କ ମୃତ୍ୟୁ ହୋଇଥିଲା ବୋଲି ଜଣା ପଡ଼ିଛି । ଏଭଳି ମୃତ୍ୟୁ ସଂଖ୍ୟା କୁ ଏଡ଼ାଇବା ପାଇଁ ସରକାର ଏହି ନିଷ୍ପତି ନେଇଛନ୍ତି ।