କନ୍ୟାକୁମାରୀରେ ଧ୍ୟାନରୁ ଉଠିଲେ ପ୍ରଧାନମନ୍ତ୍ରୀ ମୋଦି, ସକାଳେ ପ୍ରଦାନ କରିଥିଲେ ସୂର୍ଯ୍ୟ ଅର୍ଘ୍ୟ

ଧ୍ୟାନରୁ ଉଠିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କନ୍ୟାକୁମାରୀର ବିବେକାନନ୍ଦ ପଥର ସ୍ମାରକୀରେ ପ୍ରଧାନମନ୍ତ୍ରୀ ମୋଦିଙ୍କ ସାଧନାର ଆଜି ଥିଲା ଦ୍ୱିତୀୟ ତଥା ଶେଷ ଦିନ । ପିଏମ୍ ମୋଦି ଶନିବାର ସୂର୍ଯ୍ୟୋଦୟ ସମୟରେ ‘ସୂର୍ଯ୍ୟ ଅର୍ଘ୍ୟ’ ପ୍ରଦାନ କରି ଶେଷ ଦିବସରେ ନିଜର ଧ୍ୟାନ ଆରମ୍ଭ କରିଥିଲେ । ଦ୍ୱିପ୍ରହର ୧ଟା ୩୦ରେ ସେ ଧ୍ୟାନ ସମାପ୍ତ କରିଥିଲେ ।

ପିଏମ୍ ମୋଦି ସକାଳେ ସୂର୍ଯ୍ୟଙ୍କୁ ଅର୍ଘ୍ୟ ଦେବା ସହିତ ନିଜର ଦିନ ଆରମ୍ଭ କରିଥିଲେ । ଅଧିକାରୀ ସୂତ୍ର ମୁତାବକ, ସେ ଏକ ପାରମ୍ପରିକ ଛୋଟ ପାତ୍ରରେ ସମୁଦ୍ରର ପାଣି ଅର୍ଘ୍ୟ ରୂପରେ ଭରିଥିଲେ ଏବଂ ଜପା ମାଳି ଧରି ପ୍ରାର୍ଥନା କରିଥିଲେ । ଏହି ସମୟରେ ପ୍ରଧାନମନ୍ତ୍ରୀ ଗେରୁଆ ବସ୍ତ୍ର ପରିଧାନ କରିଥିଲେ । ସେ ସ୍ୱାମୀ ବିବେକାନନ୍ଦଙ୍କ ପ୍ରତିମାରେ ପୁଷ୍ପାଞ୍ଜଳି ଅର୍ପଣ କରି ମଣ୍ଡପ ଚାରିପଟେ ପରିକ୍ରମା କରିଥିଲେ ।

କହି ରଖୁଛୁ ଯେ କନ୍ୟାକୁମାରୀ ନିଜର ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ପାଇଁ ପ୍ରସିଦ୍ଧ । ଏହି ପଥର ସ୍ମାରକୀ ଉପକୂଳବର୍ତ୍ତୀ ଏକ ଛୋଟିଆ ଟାପୁ ଉପରେ ତିଆରି ହୋଇଛି । ବିବେକାନନ୍ଦ ରକ୍ ମେମୋରିଆଲ୍‌ରେ ପିଏମ୍ ମୋଦି ମେ’ ୩୦ ସନ୍ଧ୍ୟାରେ ନିଜର ଧ୍ୟାନ ଆରମ୍ଭ କରିଥିଲେ ।

ଶେଷ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ଅଭିଯାନ ଶେଷ ହେବା ପରେ ପିଏମ୍ ତାମିଲନାଡ଼ୁର କନ୍ୟାକୁମାରୀ ପହଞ୍ଚିଥିଲେ । ଗୁରୁବାର ଏଠାରେ ପହଞ୍ଚିବା ପରେ ସର୍ବପ୍ରଥମେ ସେ ଦେବୀ କନ୍ୟାକୁମାରୀଙ୍କୁ ସମର୍ପିତ ଥିବା ମନ୍ଦିରରେ ପୂଜାର୍ଚ୍ଚନା କରିଥିଲେ । ଏହି ମନ୍ଦିରକୁ ଭଗବତୀ ଅମ୍ମନ ମନ୍ଦିର ମଧ୍ୟ କୁହାଯାଏ ।

ଆଜକୁ ୧୩୧ ବର୍ଷ ପୂର୍ବେ ଯେବେ ସ୍ୱାମୀ ବିବେକାନନ୍ଦ ୧୮୯୨ରେ କନ୍ୟାକୁମାରୀ ଆସିଥିଲେ, ସେବେ ସେ ମଧ୍ୟ ସମୁଦ୍ର ଶିଳା ଉପରେ ଧ୍ୟାନ କରିବା ପୂର୍ବରୁ ଏହି ମନ୍ଦିରରେ ଶକ୍ତିପାଠ କରିଥିଲେ । ଆଜି ପ୍ରଧାନମନ୍ତ୍ରୀ ମୋଦି ବି ଏହି ମନ୍ଦିରରେ ଦର୍ଶନ ସହିତ ଧ୍ୟାନ ଆରମ୍ଭ କରିଥିଲେ ।