‘ମଣିପୁରର ସ୍ଥିତି ଆଉଟ୍‌ ଅଫ୍‌ କଣ୍ଟ୍ରୋଲ, ଏଠାରେ ଲାଗୁ ହେଉ ରାଷ୍ଟ୍ରପତି ଶାସନ’: ଶଶି ଥରୁର୍‌

ମଣିପୁରରେ ହିଂସା ପରେ ସ୍ଥିତି ଚିନ୍ତାଜନକ ରହିଛି। ପରିସ୍ଥିତି ନିୟନ୍ତ୍ରଣ ପାଇଁ ହଜାର ହଜାର ସୈନିକ ଏଠାରେ ମୁତୟନ ହୋଇଛନ୍ତି। ରାଜ୍ୟର ସାମ୍ପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି କଂଗ୍ରେସ ନେତା ଶଶି ଥରୁର ମଣିପୁରରେ ରାଷ୍ଟ୍ରପତି ଶାସନ ଲାଗୁ କରିବାକୁ ଦାବି କରିଛନ୍ତି। ସେ କହିଛନ୍ତି ଯେ ଏଠାରେ ସ୍ଥିତି ନିୟନ୍ତ୍ରଣ ବାହାରକୁ ଆସୁଛି। ସେ ବିଜେପିକୁ ଟାର୍ଗେଟ କରି କହିଛନ୍ତି, ଏଠାକାର ଭୋଟରମାନଙ୍କୁ ସେମାନେ କେବଳ ଠକିଛନ୍ତି।

ଥରୁର କହିଛନ୍ତି, ‘ଏଠାକାର ମତଦାତାମାନଙ୍କୁ ବିଜେପି ବିଶ୍ୱାସଘାତକତା କରିଛି। ଏହା ବ୍ୟତୀତ କିଛି କରାଯାଇ ନାହିଁ। ନିର୍ବାଚନ ସମୟରେ ଭୋଟରଙ୍କୁ ଲୁଭାଇବା ପାଇଁ ଯାହା ପ୍ରତିଶ୍ରୁତି ଦିଆଯାଇଥିଲା, ତାହା ଦେଖାଯାଉ ନାହିଁ’।

କହି ରଖୁଛୁ, ମଣିପୁରରେ ହିଂସା ପରଠାରୁ ଏ ପର୍ଯ୍ୟନ୍ତ ପ୍ରାୟ ୫୫ ଜଣଙ୍କର ମୃତ୍ୟୁ ଘଟିଛି। ଅନେକ ଲୋକ ଆହତ ହୋଇଛନ୍ତି। ହିଂସା ପ୍ରଭାବିତ ଅଞ୍ଚଳରୁ ପାଖାପାଖି ୧୩ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ସେମାନଙ୍କ ପାଇଁ ସମସ୍ତ ବ୍ୟବସ୍ଥା କରାଯାଇଛି।

ସୁରକ୍ଷା ବାହିନୀର ଅନେକ କମ୍ପାନୀ ରାଜ୍ୟରେ ପୂର୍ବରୁ ଉପସ୍ଥିତ ଥିଲେ। କେନ୍ଦ୍ର ସରକାର ପରିସ୍ଥିତି ନିୟନ୍ତ୍ରଣ ପାଇଁ ସୁରକ୍ଷା ବାହିନୀର ଆହୁରି ୨୦ଟି କମ୍ପାନୀ ପଠାଇଛନ୍ତି। ଧୀରେ ଧୀରେ ସ୍ଥିତିରେ ସୁଧାର ଆସୁଛି। ଚୁରଚାନ୍ଦପୁରରୁ କର୍ଫ୍ୟୁ ଉଠାଯାଇଛି। ଏଠାରେ ୩ ଘଣ୍ଟା ପାଇଁ ଢିଲା ଦିଆଯାଇଛି।