ଜି୨୦ ସମ୍ମିଳନୀ ଯୋଗୁଁ ଦିଲ୍ଲୀରେ ଭିକାରୀ ଏବଂ ନିଶାଡିଙ୍କୁ ମିଳିବ ସ୍ପେଶାଲ ଟ୍ରିଟମେଣ୍ଟ, ଅତିଥି କରି ରଖିବ ପୋଲିସ

ଭାରତରେ ଜି୨୦ ସମ୍ମିଳନୀ ୯ ଏବଂ ୧୦ ସେପ୍ଟେମ୍ବରରେ ନୂଆଦିଲ୍ଲୀରେ ଅନୁଷ୍ଠିତ ହେବ । ଏଥିପାଇଁ ରାଜଧାନୀ ଦିଲ୍ଲୀରେ ସମସ୍ତ ପ୍ରକାରର ପ୍ରସ୍ତୁତି ସରିଛି । ସୁରକ୍ଷା ବ୍ୟବସ୍ଥା ମଧ୍ୟ କଡାକଡି କରାଯାଇଛି । ଦିଲ୍ଲୀର ଅନେକ ଅଞ୍ଚଳରେ ଟ୍ରାଫିକରେ ମଧ୍ୟ ପରିବର୍ତ୍ତନ କରାଯାଇଛି । କେବଳ ଏତିକି ନୁହେଁ ଭିକାରୀ, ନିଶାଡି ଏବଂ କିନ୍ନରଙ୍କ ଉପରେ ପ୍ରତିବନ୍ଧକ ଲଗାଯାଇଛି ।

ନୂଆଦିଲ୍ଲୀର କନୋଟ ପ୍ଲେସ, ଜନପଥ, ବଙ୍ଗଳା ସାହିତ ଗୁରଦ୍ୱାରା, କେଜି ମାର୍ଗ ଏବଂ ହନୁମାନ ମନ୍ଦିର ଆଖପାଖରେ ବସୁଥିବା ଭିକାରୀ ନିଶାଡି ଏବଂ କିନ୍ନରଙ୍କ ଯିବାଆସିବା ଉପରେ ପ୍ରତିବନ୍ଧକ ଲଗାଯାଇଛି । ଏହାସହିତ ହଜରତ ନିଜାମୁଦ୍ଦିନ ରେଲେଓ୍ଵ ଷ୍ଟେସନ ଏବଂ ନୂଆଦିଲ୍ଲୀର ପାହାଡଗଞ୍ଜ ଏବଂ ଆଜମେରୀ ଗେଟରେ ଦୁଇ ତରଫରୁ ଆସୁଥିବା ଲୋକଙ୍କୁ ମନା କରାଯାଇଛି । ଯଦି ଏମାନେ ଏପଟସେପଟ ହେବାର ଦେଖାଯାଉଥିବେ, ସେମାନଙ୍କୁ ସେଲଟର ହୋମରେ ଛାଡିଦିଆଯିବାକୁ କୁହାଯାଇଛି ।

ଦିଲ୍ଲୀରେ ଜି୨୦ ଶିଖର ସମ୍ମିଳନୀ ବର୍ତ୍ତମାନ ସାରା ବିଶ୍ୱର ନଜର ଭାରତ ଉପରେ ରହିଛି। ଅତିଥିମାନଙ୍କୁ ସ୍ୱାଗତ କରିବା ପାଇଁ ସ୍ୱତନ୍ତ୍ର ପ୍ରସ୍ତୁତି କରାଯାଇଛି । ଏଥିରେ ଅତିଥିମାନଙ୍କ ରହଣିଠାରୁ ଆରମ୍ଭ କରି ବିଭିନ୍ନ ପ୍ରକାର ବ୍ୟଞ୍ଜନ ପରସାଯିବା ପର୍ଯ୍ୟନ୍ତ, ପ୍ରତ୍ୟେକ ଜିନିଷ ଉପରେ ଧ୍ୟାନ ଦିଆଯାଉଛି ।  ଖାଦ୍ୟ ପରସିବାର ଶୈଳୀ ମଧ୍ୟ ସ୍ୱତନ୍ତ୍ର ରହିବ, ଯେପରି ଅତିଥିମାନେ କେବେ ବି ଏହାକୁ ଭୁଲି ପାରିବେ ନାହିଁ । ସମସ୍ତ ଖାସ୍‌ ଅତିଥିମାନଙ୍କୁ ରୁପା ବାସନରେ ଖାଦ୍ୟ ପରସାଯିବ। ନିଜର ଖାଦ୍ୟ ପରସିବାର ଶୈଳୀରେ ମଧ୍ୟ ଭାରତ ଏହାର ସଂସ୍କୃତି ଏବଂ ଐତିହ୍ୟର ଝଲକ୍‌ ଦେଖାଇବ ।

୨୦୦ କାରିଗର କଠିନ ପରିଶ୍ରମ କରି ଏହି ବାସନଗୁଡ଼ିକ ତିଆରି କରିଛନ୍ତି । କର୍ଣ୍ଣାଟକ, ପଶ୍ଚିମବଙ୍ଗ, ଉତ୍ତର ପ୍ରଦେଶ, ଜୟପୁର ଏବଂ ଉତ୍ତରାଖଣ୍ଡ ଭଳି ବିଭିନ୍ନ ରାଜ୍ୟର କାରିଗରମାନେ ଏହି କାର୍ଯ୍ୟ କରିଛନ୍ତି । ବାସନଗୁଡ଼ିକର ସେଟ୍‌କୁ ଫ୍ୟୁଜନ୍ ଏଲିଗାନ୍ସର ଥିମ୍‌ ଉପରେ ଡିଜାଇନ୍ କରାଯାଇଛି ।

ଆମେରିକା ରାଷ୍ଟ୍ରପତିଙ୍କ ସ୍ୱାଗତ ପାଇଁ ଦିଲ୍ଲୀର ଆଇଟିସି ମୋର୍ଯ୍ୟା ହୋଟେଲର ୪୦୦ ରୁମ୍‌ ବୁକ୍‌ ହୋଇଛି । ହୋଟେଲର ମହଲନୁମା ଗ୍ରାଣ୍ଡ ପ୍ରେସିଡେଣ୍ଟାଲ ସ୍ୱିଟରେ ଆମେରିକା ରାଷ୍ଟ୍ରପତି ଜୋ ବାଇଡେନ ରହିବେ । ଦିଲ୍ଲୀର ହୋଟେଲ କ୍ଲେରିଜସରେ ଫ୍ରାନ୍ସ ରାଷ୍ଟ୍ରପତିଙ୍କ ପାଇଁ ବୁକ୍‌ ହୋଇଛି । ଏହି ହୋଟେଲରେ ଫ୍ରାନ୍ସର ରାଷ୍ଟ୍ରପତି ଏବଂ ତାଙ୍କ ସହଯୋଗୀ ରହିବେ । ହୋଟେଲ ଇମ୍ପେରିଆଲରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ରହିବେ । ହୋଟେଲ ଶଙ୍ଗରୀ ଲାରେ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ ରହିବେ ।