ସ୍ୱର୍ଗଦ୍ୱାରରୁ ସ୍ୱର୍ଗକୁ ଯିବାକୁ ରାସ୍ତା ଅଛି କି ? ଜାଣନ୍ତୁ ଏହା ପଛରେ କଣ ରହିଛି ରହସ୍ୟ

ପୁରୀର ସ୍ୱର୍ଗଦ୍ୱାର । ଏହି ନାଁ ଶୁଣିଲେ ଆପଣଙ୍କ ମନରେ ସ୍ୱର୍ଗଦ୍ୱାରର ପ୍ରତିଛବି ଆସି ଯାଉଥିବ । ଆତ୍ମାର ମୁକ୍ତି ପାଇଁ ଏଠାରେ ଅନ୍ତିମ ସଂସ୍କାର କରାଯାଏ । କିନ୍ତୁ ଏହାର ନାଁ ସ୍ୱର୍ଗଦ୍ୱାର କାହିଁକି ରଖାଯାଇଛି । ଆପଣଙ୍କ ମନରେ ଏହାକୁ ନେଇ କେବେ ପ୍ରଶ୍ନ ଆସିଛି କି ? ସ୍ୱର୍ଗଦ୍ୱାରରୁ ସ୍ୱର୍ଗକୁ ଯିବାକୁ ରାସ୍ତା ଅଛି କି ? ସ୍ୱର୍ଗଦ୍ୱାରରେ ଅନ୍ତିମ ସଂସ୍କାର କରାଗଲେ ଆତ୍ମା ସ୍ୱର୍ଗଦ୍ୱାରକୁ ଯାଇଥାଏ କି ? ଏହାକୁ କିଏ ନିର୍ମାଣ କରିଥିଲେ? ଏ ସମସ୍ତ ପ୍ରଶ୍ନର ଉତ୍ତର ଆଜି ଆମେ ଆପଣଙ୍କୁ ଜଣାଇବୁ । ତେବେ ସ୍ୱର୍ଗଦ୍ୱାରର ନାଁ କାହିଁକି ସ୍ୱର୍ଗଦ୍ୱାର ରଖାଗଲା ଆସନ୍ତୁ ଜାଣିବା ।

ସୂଚନା ଅନୁସାରେ ଓଡ଼ିଶାର ଲୋକମାନେ ନିଜ ସମ୍ପର୍କୀୟଙ୍କ ମୃତ୍ୟୁ ପରେ ଏଠାରେ ତାଙ୍କର ଅନ୍ତିମ ସଂସ୍କାର କରିଥାନ୍ତି । କାରଣ ବିଶ୍ୱାସ ଅନୁଯାୟୀ ମଣିଷର ମୃତ୍ୟୁ ପରେ ଏଠାରେ ଅନ୍ତିମ ସଂସ୍କାର କଲେ ଆତ୍ମାକୁ ମୁକ୍ତି ମିଳେ ଓ ସ୍ୱର୍ଗଲୋକରେ ସ୍ଥାନ ମିଳେ । ସ୍ୱର୍ଗଦ୍ୱାର ତିଆରି ହେବା ପଛରେ ରହିଛି ଏକ ଖାସ ରହସ୍ୟ ।

ବିଶ୍ୱାସ ଅନୁଯାୟୀ ସତ୍ୟ ଯୁଗରେ ଶ୍ରୀ ଜଗନ୍ନାଥଙ୍କ ଦର୍ଶନ ନିମନ୍ତେ ସ୍ୱର୍ଗଲୋକରୁ ଦେବାଦେବୀମାନେ ପୃଥିବୀ ପୃଷ୍ଠକୁ ଓହ୍ଲାଇ ଆସିଥିଲେ । ପୂର୍ବ କାଳରେ ଜଗନ୍ନାଥଙ୍କ ସମସ୍ତ ନୀତି ଦେବାଦେବୀ ହିଁ କରୁଥିଲେ । ସମସ୍ତ ଦେବାଦେବେୀମାନେ ପୃଥିବୀକୁ ଆସି ଜଗନ୍ନାଥଙ୍କ ପୂଜା କରି ସ୍ୱର୍ଗଲୋକ ଫେରିଥାନ୍ତି । ତେବେ ଏହି ଦେବତାଙ୍କ ମଧ୍ୟରେ ସ୍ୱର୍ଗାଧିପତି ଦେବରାଜ ଇନ୍ଦ୍ର ଅନ୍ୟତମ । ଏକଦା ସେ ଜଗନ୍ନାଥଙ୍କ ଦର୍ଶନ ସାରି ଫେରୁଥିବା ସମୟରେ ଜଣେ ସେବକ ଇନ୍ଦ୍ରଙ୍କ ବଜ୍ର ଓ କୁଣ୍ଡଳ ଦେଖି ଇନ୍ଦ୍ରଙ୍କୁ ଚିହ୍ନିପାରିଥିଲେ । ପରେ ସେବକ ଜଣଙ୍କ ଇନ୍ଦ୍ରଙ୍କୁ ଅନୁସରଣ କରିବା ଆରମ୍ଭ କରିଥିଲେ । ସମୁଦ୍ରର ଏକ ବାଲୁକାମୟ ସ୍ଥାନରୁ ଇନ୍ଦ୍ରଦେବ ସ୍ୱର୍ଗାରୋହଣ କରିଥିଲେ । ପରେ ସେବକ ଜଣଙ୍କ ସ୍ୱର୍ଗର ରାସ୍ତା ଜାଣି ପାରି ଏହି ସ୍ଥାନରେ ଏକ ବାଡ଼ି ପୋତିଥିଲେ । ସେବକ ଜଣଙ୍କ ସିଧା ଯାଇ ସେ ସମୟର ରାଜାଙ୍କ ପାଖରେ ପହଞ୍ଚି ସମସ୍ତ କଥାକୁ ବଖାଣିଥିଲେ । ପରେ ରାଜା ସେହି ସ୍ଥାନକୁ ସ୍ୱର୍ଗଦ୍ୱାର ନାମରେ ନାମିତ କରାଇଥିଲେ । ଯେଉଁଠାରେ ବର୍ତ୍ତମାନ ଲୋକଙ୍କ ଅନ୍ତିମ ସଂସ୍କାର କରାଯଉଛି ।

ଅନ୍ୟ ଏକ ଲୋକକଥା ଅନୁଯାୟୀ ଯେତେବେଳେ ଜଗନ୍ନାଥଙ୍କର ଦାରୁ ସମୁଦ୍ରରେ ଭାସି ଭାସି ଆସିଥିଲା, ତାହା ପ୍ରଥମେ ଏହି ସ୍ଥାନରେ ହିଁ ଅଟକି ଥିଲା । ତେଣୁ ଏହି ସ୍ଥାନକୁ ସ୍ୱର୍ଗଦ୍ୱାର ନାମ ଦିଆଯାଇଥିବା ମଧ୍ୟ ବିଶ୍ୱାସ ରହିଛି । ଏହା ସହିତ କୁହାଯାଏ ସ୍ୱର୍ଗଦ୍ୱାରରେ କେବେ ବି ଅଗ୍ନି ଲିଭି ନଥାଏ । ଏଠାରେ ଲଗାତାର ଭାବେ ଚିତା ଜଳୁଥିବାର ଦୃଶ୍ୟ ଦେଖିବାକୁ ମିଳେ ।

ଯିଏ ଏ ଧରା ପୃଷ୍ଠରେ ଜନ୍ମ ନିଏ ତାର ମୃତ୍ୟୁ ସୁନିଶ୍ଚିତ । କିନ୍ତୁ ସମସ୍ତଙ୍କ ଇଚ୍ଛା ଥାଏ ମୃତ୍ୟୁ ପରେ ତାର ଅନ୍ତିମ ସଂସ୍କାର ପୁରୀର ସ୍ୱର୍ଗଦ୍ୱାରରେ ହିଁ ହେଉ । କାରଣ ଏଠାରେ ଅନ୍ତିମ ସଂସ୍କାର କରାଗଲେ ଆତ୍ମାକୁ ମୋକ୍ଷ ମିଳିଥାଏ ।