ସନ୍ଧ୍ୟା ପରେ ଏହି ମନ୍ଦିରକୁ ପ୍ରବେଶ ମନା, ମଣିଷରୁ ପଥର ପାଲଟିଯାନ୍ତି ଜୀବନ୍ତ ଲୋକେ

ଆମ ଦେଶ ଭାରତରେ ରହସ୍ୟମୟ ତଥା ପ୍ରାଚୀନ ମନ୍ଦିର ସଂଖ୍ୟା କିଛି କମ ନାହିଁ । ଏମିତି ଏକ ରହସ୍ୟମୟ ମନ୍ଦିର ରାଜସ୍ଥାନରେ ଅଛି । ଏହି ମନ୍ଦିରକୁ ସନ୍ଧ୍ୟା ପରେ ସାଧାରଣ ଲୋକଙ୍କୁ ଯିବାକୁ ସମ୍ପୂର୍ଣ୍ଣ ରୂପେ ବାରଣ କରାଯାଇଛି । ରାତି ସମୟରେ ତ ଭୁଲରେ ବି ଜଣେ ଲୋକଙ୍କୁ ସେଠାରେ ଦେଖିବାକୁ ମିଳେ ନାହିଁ | ଏହା ପଛରେ ବି ଏକ ରୋଚକପୂର୍ଣ୍ଣ କାରଣ ରହିଛି । ସ୍ଥାନୀୟ ଅଧିବାସୀଙ୍କର ବିଶ୍ୱାସ ରହିଛିଯେ ଯେଉଁ ମାନେ ସନ୍ଧ୍ୟା ପରେ ସେଠାକୁ ଯିବେ ଜୀବନ୍ତରୁ ପଥର ପାଲଟିଯିବେ । ରାଜସ୍ଥାନର ବାଡମେର ଜିଲ୍ଲାରେ ଅବସ୍ଥିତ ଏହି ମନ୍ଦିରକୁ “କିରାଡ଼ୁ ମନ୍ଦିର” ନାଁରେ ଜଣାଯାଏ । ଏହାକୁ ରାଜସ୍ଥାନର ଖଜୁରାହୋ ବୋଲି ମଧ୍ୟ କୁହାଯାଏ । ଦକ୍ଷିଣ ଭାରତୀୟ ଶୈଳୀରେ ନିର୍ମିତ ହୋଇଥିବା ଏହି ମନ୍ଦିରଟିର ଦେଶ ତଥା ଦେଶ ବାହାରେ ବି ଖୁବ ପ୍ରସିଦ୍ଧି ରହିଛି । “କିରାଡ଼ୁ ମନ୍ଦିର” ଥିବା ଏହି ସ୍ଥାନକୁ ୧୧୬୧ ଖ୍ରୀଷ୍ଟାବ୍ଦରେ “କୀରାଟୁ କୂପ” କୁହାଯାଉଥିଲା । ଏହା ପରିସରରେ ୫ ଟି ମନ୍ଦିର ରହିଛି ।

ଏମଧ୍ୟରୁ ବିଷ୍ଣୁ ଓ ଶିବଙ୍କ ମନ୍ଦିର କିଞ୍ଚିତ ଭଲ ଅବସ୍ଥାରେ ଥିବାବେଳେ ଅନ୍ୟଗୁଡିକ ସମ୍ପୂର୍ଣ୍ଣ ରୂପେ ନଷ୍ଟ ହୋଇଯାଇଛି । ଏହାର ନିର୍ମାଣ କେଉଁ ମାନେ କରିଥିଲେ ସେବାବଦରେ ସଠିକ ଭାବେ ଜଣା ପଡିନଥିଲେ ମଧ୍ୟ ଶୈଳୀରୁ ଏହାକୁ ଗୁଜ୍ଜର, ପ୍ରତିହାର କିମ୍ବା ସଙ୍ଗମ ବଂଶୀ ରାଜାମାନେ ନିର୍ମାଣ କରିଥାଇ ପାରନ୍ତି ବୋଲି ଅନୁମାନ କରାଯାଉଛି । ଲୋକକଥା ଅନୁଯାୟୀ, କିଛି ବର୍ଷ ପୂର୍ବେ ଜଣେ ସିଦ୍ଧ ସାଧୁ ନିଜର କିଛି ଶିଷ୍ୟ ମାନଙ୍କ ସହ ଏହି ମନ୍ଦିରକୁ ଆସିଥିଲେ । ଦିନେ ଶିଷ୍ୟମାନଙ୍କୁ ଛାଡ଼ି ସେ ପାଖ ଜାଗାକୁ ଭ୍ରମଣ କରିବାକୁ ଯାଇଥିଲେ | ଏଭିତରେ ଜଣେ ଶିଷ୍ୟଙ୍କ ଦେହ ଖରାପ ହେବାରୁ ଅନ୍ୟମାନେ ଗାଁ ଲୋକଙ୍କ ଠାରୁ ସାହାଯ୍ୟ ଭିକ୍ଷା କରିଥିଲେ । କିନ୍ତୁ କେହି ବି ଶିଷ୍ୟ ମାନଙ୍କୁ ସାହାଯ୍ୟ କରିନଥିଲେ । ସାଧୁ ଫେରିବା ପରେ ସବୁ କଥା ଜାଣି ଖୁବ ରାଗି ଯାଇଥିଲେ । ଆଉ ଗାଁ ଲୋକଙ୍କୁ ଅଭିଶାପ ଦେଇଥିଲେକି ସୂର୍ଯ୍ୟାସ୍ତ ହେବା ପରେ ସମସ୍ତେ ପଥର ପାଲଟିଯିବେ ।

ପରେ ଜଣାପଡିଥିଲା ଗାଁର ଜଣେ ମହିଳା ସାଧୁଙ୍କ ଶିଷ୍ୟ ମାନଙ୍କୁ ସାହାଯ୍ୟ କରିଥିଲେ । ସାଧୁ ତାଙ୍କ ଉପରେ ପ୍ରସନ୍ନ ହୋଇ କହିଥିଲେକି ପଛକୁ ନ ଅନାଇ ଯଥାଶୀଘ୍ର ଗାଁ ଛାଡ଼ିପଳାନ୍ତୁ । କିନ୍ତୁ ମହିଳା ଏହାକୁ ମାନି ନଥିଲେ ଆଉ ଯାଉ ଯାଉ ପଛକୁ ଅନାଇ ଚାହିଁଦେଇଥିଲେ । ଫଳରେ ସେହିଠାରେ ହିଁ ସେ ପଥର ପାଲଟି ଯାଇଥିଲେ । ମନ୍ଦିର ଠାରୁ କିଛି ଦୂରରେ ମହିଳାଙ୍କର ଏକ ମୂର୍ତ୍ତି ବି ସ୍ଥାପିତ ହୋଇଛି ।