କ୍ରିକେଟ୍‌ ବିଶ୍ବକପ୍‌: ଆଜି ମୁହାଁମୁହିଁ ହେବେ ଭାରତ-ଆଫଗାନିସ୍ତାନ

ଭାରତ ଆଗରେ ଆଫଗାନ ସ୍ପିନ୍ ଚ୍ୟାଲେଞ୍ଜ। ଆଜି ବିଶ୍ବକପରେ ଭାରତ-ଆଫଗାନିସ୍ତାନ ଲଢ଼େଇ । ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଖେଳାଯିବ ମ୍ୟାଚ୍। ପ୍ରଥମ ମ୍ୟାଚରେ ଅଷ୍ଟ୍ରେଲିଆକୁ ହରାଇଥିବାରୁ ଭାରତର ମନୋବଳ ଦୃଢ଼ ରହିଛି । ଇନଫର୍ମ ଓପନର ଶୁବମନ୍ ଗିଲ ଫିଟ୍ ନହେବା ଦଳ ପାଇଁ ବଡ଼ କ୍ଷତି । ସେ ଆଜି ବି ଖେଳିବେ ନାହିଁ । ଡେଙ୍ଗୁରୁ ସମ୍ପୂର୍ଣ୍ଣ ସୁସ୍ଥ ହୋଇ ନାହାନ୍ତି । ସେ ଟିମ୍ ଇଣ୍ଡିଆ ସହ ଦିଲ୍ଲୀ ଆସି ନାହାନ୍ତି । ତାଙ୍କ ସ୍ଥାନରେ ରୋହିତଙ୍କ ସହ ଇନିଂସ ଓପନ୍ କରିପାରନ୍ତି ଇଶାନ୍ କିଷାନ । ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଖାତା ଖୋଲିବା ପୂର୍ବରୁ ପାଭିଲନ୍ ଫେରିଥିଲେ ରୋହିତ, ଇଶାନ ଓ ଶ୍ରେୟସ ଆୟାର । ଆଫଗାନିସ୍ତାନ ବିପକ୍ଷରେ ତ୍ରୁଟି ସୁଧାରିବାକୁ ପଡ଼ିବ । ଏବେ ବି ଟିମ୍ ଇଣ୍ଡିଆ ପାଇଁ ଚାରି ନମ୍ବର ସମସ୍ୟା ରହିଛି । ଶ୍ରେୟସ ଆୟାର ଅଷ୍ଟ୍ରେଲିଆ ବିପକ୍ଷ ଗୋଟିଏ ଦିନିକିଆରେ ବିସ୍ଫୋରକ ଶତକ ମାରିଥିଲେ ।

ବିଶ୍ବକପରେ ତାଙ୍କୁ ପ୍ରମାଣ କରିବାକୁ ପଡ଼ିବ । ବିରାଟ କୋହଲି ଓ ଲୋକେଶ ରାହୁଲଙ୍କ ଜବରଦସ୍ତ ଫର୍ମ ଟିମ୍ ଇଣ୍ଡିଆର ବଳ ହୋଇଛନ୍ତି । ଶକ୍ତିଶାଳୀ ବୋଲିଂରେ ଘାଇଲା ହେବେ ପ୍ରତିପକ୍ଷ ବ୍ୟାଟର । ରେକର୍ଡ କହୁଛି, ଆଫଗାନିସ୍ତାନ ବିପକ୍ଷରେ ଭାରତରେ ପଲ୍ଲା ଭାରୀ ରହିଛି । କିନ୍ତୁ ଏହାକୁ ହାଲୁକାରେ ନେବ ନାହିଁ ଟିମ୍ ଇଣ୍ଡିଆ । ଦିନିକିଆରେ ଉଭୟ ଦଳ ୩ ଥର ମୁହାଁମୁହିଁ ହୋଇଛନ୍ତି । ଭାରତ ୨ଟିରେ ବିଜୟୀ ହୋଇଥିବା ବେଳେ ଗୋଟିଏ ବି ଜିତିପାରିନି ଆଫଗାନିସ୍ତାନ। ଗୋଟିଏ ମ୍ୟାଚ୍ ଟାଇ ରହିଛି । ୨୦୧୯ ବିଶ୍ବକପରେ ଭଭୟ ଦଳ ଗୋଟିଏ ମ୍ୟାଚ୍ ଖେଳିଥିଲେ । ୧୧ ରନରେ ଜିତିଥିଲା ଟିମ୍ ଇଣ୍ଡିଆ । ଆସନ୍ତା ୧୪ ତାରିଖରେ ପାକିସ୍ତାନ ସହ ଭାରତର ମହା ମୁକାବିଲା ରହିଛି ।