ଗଛରେ ଚଢି ତେନ୍ତୁଳି ଖାଉଛି ଭାଲୁ, ରାତି ସାରା ଉଜାଗର ରହି ଜଗିଛନ୍ତି ଗାଁ ଲୋକେ

କୋରାପୁଟ(କେ ନ୍ୟୁଜ): ଗଛ ଉପରେ ଭାଲୁ । କୋରାପୁଟ ବୋରିଗୁମ୍ମା ବ୍ଲକ ଆଉଁଳି ଗାଁରେ ଦେଖାଦେଇଛି ଭାଲୁ ଆତଙ୍କ। ଗତକାଲି ରାତିରେ ଏକ ଭାଲୁ ଗାଁ ଭିତରକୁ ପଶି ଆସିଛି। ଫଳରେ ଗାଁଲୋକେ ଭୟଭୀତ ହୋଇ ରାତି ସାରା ଉଜାଗର ରହି ଭାଲୁକୁ ଜଗି ରହିଛନ୍ତି। ଭାଲୁଟି ମଧ୍ୟ ଲୋକଙ୍କୁ ଦେଖି ଭୟଭୀତ ହୋଇ ଏକ ତେନ୍ତୁଳି ଗଛ ଉପରେ ଚଢି ଯାଇଛି । ଘଟଣାସ୍ଥଳରେ ବୋରିଗୁମ୍ମା ଅଗ୍ନିଶମ ବିଭାଗ ଓ ଜଙ୍ଗଲ ବିଭାଗ କର୍ମଚାରୀ ପହଞ୍ଚି ଭାଲୁକୁ ଜଙ୍ଗଲ ମଧ୍ୟକୁ ଘଉଡାଇବା ପାଇଁ ଉଦ୍ୟମ ଜାରି ରଖିଛନ୍ତି।

ସେପଟେ ଗଂଜାମ ଜିଲ୍ଲା ତାରାସିଂ ବନାଞ୍ଚଳ ସାରଙ୍ଗପଟା ଗାଁ ନିକଟରେ ଏଭଳି ଘଟଣା ଘଟିଛି । ଆହତ ଜଣକ ହେଲେ କଦଳୀଗଡ ଗାଁର ମହେଶ୍ଵର ମଲ୍ଲିକ । ଗତକାଲି କାମରେ ସାଇକେଲରେ ଯାଇ ଘରକୁ ଫେରୁଥିବା ବେଳେ, ରାସ୍ତାରେ ଦୁଇଟି ଭାଲୁ ସହ ମୁହାଁମୁହିଁ ହୋଇଥିଲେ । ନିଜକୁ ବଞ୍ଚାଇବାକୁ ଯାଇ ମହେଶ୍ୱର ଏକ ଗଛରେ ଚଢିଯାଇଥିଲେ ମଧ ଗଛ ଉପରକୁ ଯାଇ ଭାଲୁଟି ଆକ୍ରମଣ କରିଥିଲା । ଗୁରୁତର ଅବସ୍ଥାରେ ସ୍ଥାନୀୟ ଲୋକେ ତାଙ୍କୁ ଉଧାର କରିଥିଲେ । ପରେ ବନବିଭାଗ କର୍ମଚାରୀମାନେ ତାଙ୍କୁ ଭଂଜନଗର ମେଡିକାଲରେ ଭର୍ତି କରିଥିଲେ । ଆହତ ମହେଶ୍ୱର ସୁସ୍ଥ ଅଛନ୍ତି ।