ବିଜେପୁର ଉପନିର୍ବାଚନ ପାଇଁ ଜମୁଛି ପ୍ରଚାର, ଘରକୁ ଘର ବୁଲି ଲୋକଙ୍କ ପାଖକୁ ଯାଉଛନ୍ତି ତିନି ପ୍ରମୁଖ ଦଳର ପ୍ରାର୍ଥୀ

ବିଜେପୁର: ବିଜେପୁର ଉପନିର୍ବାଚନ ପାଇଁ ଜମୁଛି ପ୍ରଚାର। ଘରକୁ ଘର ବୁଲି ଲୋକଙ୍କ ପାଖକୁ ଯାଉଛନ୍ତି ତିନି ପ୍ରମୁଖ ଦଳର ପ୍ରାର୍ଥୀ। ବିଜେଡି ପ୍ରାର୍ଥୀ ରୀତା ସାହୁ ଗାଇସିଲେଟ ବ୍ଲକରୁ ପ୍ରଚାର ଆରମ୍ଭ କରିଛନ୍ତି। ଦଳୀୟ କର୍ମୀ ଓ ନେତାଙ୍କ ସହ ଲୋକଙ୍କ ପାଖକୁ ଯାଇ ମୁଖ୍ୟମନ୍ତ୍ରୀଙ୍କ ଭାବମୂର୍ତ୍ତି ସହ ବିଜେଡିର ଲୋକାଭିମୁଖୀ ଯୋଜନା ସଂପର୍କରେ ଅବଗତ କରାଇ ଭୋଟ ଭିକ୍ଷା କରିଛନ୍ତି । ରୀତାଙ୍କ ପାଇଁ ପ୍ରଚାର କରିବାକୁ ଦଳର ନେତାମାନେ ବିଜେପୁରରେ ଡେରା ଜମାଇଲେଣି। ସେହିପରି ବିଜେପି ପ୍ରାର୍ଥୀ ସନତ ଗଡ଼ତିଆ ବି ଫୁଲ୍‌ ଦମରେ ପ୍ରଚାର ମୈଦାନକୁ ଓହ୍ଲାଇଛନ୍ତି। ବିଜେପୁରର ଜାରିଂରେ ପ୍ରଥମେ ମନ୍ଦିରରେ ପୂଜାର୍ଚ୍ଚନା ପରେ ଘରକୁ ଘର ବୁଲି ଲୋକଙ୍କୁ ଭୋଟ ଭିକ୍ଷା କରିଛନ୍ତି। ବିଜେପିର ବିକାଶ ଧାରା ଓ ପ୍ରଧାନମନ୍ତ୍ରୀ ମୋଦିଙ୍କ ଲୋକପ୍ରିୟତା ଦଳକୁ ସଫଳତା ହେବ ବୋଲି ସେ ଆଶା ରଖିଛନ୍ତି। ସନତଙ୍କ ପ୍ରଚାର ପାଇଁ ଦଳର ହେଭିୱେଟ ନେତା ପ୍ରଚାର କରିବେ ବୋଲି ସ୍ଥିର ହୋଇଛି। କଂଗ୍ରେସ ପ୍ରାର୍ଥୀ ଦିଲ୍ଲୀପ ପଣ୍ଡା ମଧ୍ୟ ଦଳର ପୂର୍ବ ପ୍ରଦର୍ଶନକୁ ଭୁଲି ପୁଣି କ୍ଷମତାକୁ ଆସିବାକୁ ପ୍ରଚାର ଆରମ୍ଭ କରିଛନ୍ତି।