ମୋଦିଙ୍କୁ ଜବାବ ଦେଲେ ନବୀନ, ଆଗାମୀ ୧୦ ବର୍ଷରେ ବିଜେପି ଓଡ଼ିଶାରେ ହୃଦୟ ଜିତିପାରିବନି

ଭୁବନେଶ୍ୱର: ଆଜି କନ୍ଧମାଳ, ବଲାଙ୍ଗୀର ଓ ବରଗଡରେ ରାଜ୍ୟ ସରକାରଙ୍କୁ ବିଭିନ୍ନ ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଟାର୍ଗେଟ ପରେ ବିଜେଡି ସୁପ୍ରିମୋ ନବୀନ ମୁହଁ ଖୋଲିଛନ୍ତି | ନବୀନ କହିଛନ୍ତି, ଜୁନ୍ ୧୦ରେ ନୁହେଁ, ଆଗାମୀ ୧୦ ବର୍ଷରେ ବିଜେପି ଓଡ଼ିଶାରେ ହୃଦୟ ଜିତିପାରିବନି | ଓଡ଼ିଶାରେ ବିଜେଡି ଷଷ୍ଠ ଥର ପାଇଁ ସରକାର କରିବ |

ମୋଦୀ ଆଜି ବରଗଡ଼ ନିର୍ବାଚନୀ ସଭାରେ କହିଥିଲେ ଯେ ବିଜେଡି ସରକାରର ଏକ୍ସପାରୀ ଡେଟ୍ ଜୁନ ୪ ତାରିଖରେ ସରିବା ଓ ଜୁନ ୧୦ରେ ବିଜେପି ସରକାର ଗଠନ କରିବ | ଏହାର ଉତ୍ତର ଦେଇ ଆଜି ନବୀନ କହିଛନ୍ତି, ପ୍ରଧାନମନ୍ତ୍ରୀ ଓଡିଶାକୁ କେତେ ମନେ ରଖିଛନ୍ତି |

କେବଳ ନିର୍ବାଚନବେଳେ ଓଡିଶାକୁ ମନେପକାଇଲେ ଲାଭ ନାହିଁ | ସେ ୨୦୧୪ ଓ ୨୦୧୯ର ପ୍ରତିଶ୍ରୁତି ମନେ ରଖିଛନ୍ତି କି ? ହେଲେ ଆପଣଙ୍କ ସବୁ ପ୍ରତିଶ୍ରୁତି ଓଡ଼ିଶାବାସୀ ମନେ ରଖିଛନ୍ତି | ଓଡ଼ିଆ ଭାଷା ଓ ଓଡ଼ିଶୀକୁ ଭୁଲିଗଲେ ? ଆମ ଓଡିଶୀ ସଂଗୀତକୁ ଶାସ୍ତ୍ରୀୟ ମାନ୍ୟତା ଦେଲେନାହିଁ |

ଏନେଇ ଆମେ ୨ ଥର ଦାବି ପଠାଇଛୁ , ଆପଣ ମନା କରିଛନ୍ତି | ଓଡ଼ିଶାରେ କେତେ ବୀରପୁତ୍ର ଅଛନ୍ତି? କେତେଜଣଙ୍କ ନାମ ଆଜି ଆପଣ କହିଲେ ? ନବୀନ ଆହୁରି ପ୍ରଶ୍ନ କରିଥିଲେ ଯେ ଜଣେ ବି ଭାରତ ରତ୍ନ ପାଇଁ ଠିକ ଲାଗିଲେନି ? ମୋର କଣ ମନେ ଅଛି କି ନାହିଁ ରାଜ୍ୟବାସୀ ଜାଣନ୍ତି |  ଦରବୃଦ୍ଧି କମାଇବା, ୨ କୋଟି ଚାକିରି ସୃଷ୍ଟି, ଏଲପିଜି, ପେଟ୍ରୋଲ, ଡିଜେଲ ଦର କମାଇବା, ମୋବାଇଲ କନେକ୍ଟିଭିଟି ଦେବା, ଜିଏସଟି ଛାଡ଼ କରିବା ପ୍ରତିଶ୍ରୁତି ଓଡ଼ିଶାବାସୀ ମନେ ରଖିଛନ୍ତି ।

ଚାଷୀଙ୍କ ଏମଏସପି ୨ ଗୁଣ କରିବା ଲାଗି ପ୍ରତିଶ୍ରୁତି ଦେଇଥିଲେ। ଏମଏସପି ଦୁଇଗୁଣ ପ୍ରତିଶ୍ରୁତି ବି ଭୁଲିଗଲେ । ଓଡ଼ିଶାବାସୀଙ୍କ ଲାଗି ଉପକୂଳ ରାଜପଥ କରିବାର ଥିଲା । ଉପକୂଳ ରାଜପଥ ବିଷୟ ବି ପ୍ରଧାନମନ୍ତ୍ରୀ ଭୁଲିଗଲ । ଓଡ଼ିଶାର ସମ୍ପଦ କୋଇଲା ନେଉଛନ୍ତି । ରୟାଲଟି ବଢାଇବା ଲାଗି ୧୦ ବର୍ଷ ହେଲା ଭୁଲିଗଲେ । ଏମିତି କହି ବିଜେଡି ସୁପ୍ରିମୋ ନବୀନ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜଵାବର ଉତ୍ତର ରଖିଥିଲେ |