କ୍ରିକେଟ ମ୍ୟାଚରେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ ଡ୍ୟାନସିଂ ଅମ୍ପାୟାର ମନୋଜ କୁମାର, ଜିତିଲେ ଦର୍ଶକଙ୍କ ହୃଦୟ

ଭଦ୍ରକ(କେନ୍ୟୁଜ): ଭାରତ ବର୍ଷରେ ସର୍ବାଧିକ ଲୋକପ୍ରିୟ ଖେଳ ଭାବରେ କ୍ରିକେଟକୁ ଲୋକମାନେ ଅଧିକ ପସନ୍ଦ କରନ୍ତି । ସେଥିପାଇଁ ରାଜ୍ୟର କୋଣ ଅନୁକୋଣରେ କ୍ରିକେଟ ଖେଳ ହେଉଥିବା ଦେଖିବାକୁ ମିଳିଥାଏ । ସମାନ ଭାବେ ଭଦ୍ରକରେ ମଧ୍ୟ ଏକ କ୍ରିକେଟ ମ୍ୟାଚ ଅନୁଷ୍ଠିତ ହୋଇଛି । ତେବେ ଭଦ୍ରକର ଏହି ମ୍ୟାଚରେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ ଡ୍ୟାନସିଂ ଅମ୍ପେୟାର ମନୋଜ କୁମାର । ଖେଳରେ ଖେଳାଳୀ ମାରୁଥିବା ଛକା, ଚଉକା ସହିତ ଆଉଟ/ନଟ ଆଉଟକୁ ସଂଗୀତର ତାଳେ ତାଳେ ଏକ ଚିତାକର୍ଷକ ନୃତ୍ୟ ଶୈଳୀରେ ଉପସ୍ଥାପିତ କରି ଚର୍ଚ୍ଚାରେ ଏହି ଡ୍ୟାନସିଂ ଅମ୍ପାୟାର ମନୋଜ କୁମାର ।

କେବଳ ଭଦ୍ରକ ଜିଲ୍ଲାରେ ନୁହେଁ ସମଗ୍ର ରାଜ୍ୟ ଏପରିକି ବିହାର, ଝାଡଖଣ୍ଡ ଏବଂ ପଶ୍ଚିମବଙ୍ଗ ପ୍ରଭୂତି ରାଜ୍ୟରେ ନିଜର ଏହି ଚିତାକର୍ଷକ ଡ୍ୟାନସିଂ ଅମ୍ପେୟାରିଙ୍ଗ କରି ବେଶ ସୁଖ୍ୟାତି ଅର୍ଜନ କରିଛନ୍ତି । ଦର୍ଶକ ମାନଙ୍କୁ ମନୋରଞ୍ଜନର ଖୋରାକ ଦେବାପାଇଁ ମନୋଜଙ୍କ ଏହି ଅଭିନବ ପ୍ରୟାସ ଦର୍ଶକ ଏବଂ ଅତିଥିଙ୍କ ମଧ୍ୟରେ ବେଶ ଆଦୃତ ହୋଇଛି । ମା କାଳିତ୍ରୀ ଯୁବ କ୍ଲବ ପକ୍ଷରୁ ବେଲମଳା ଠାରେ ଅନୁଷ୍ଠିତ ହେଉଥିବା ଦାସରଥୀ ମେମୋରିଆଲ କ୍ରିକେଟ ଟୁର୍ନାମେଣ୍ଟରେ ଦର୍ଶକଙ୍କ ମୁଖ୍ୟ ଆକର୍ଷଣ ଥିଲେ ଡ୍ୟାନସିଂ ଅମ୍ପେୟାର ମନୋଜ କୁମାର ।

ପିପିଲି ଏବଂ ଦଳାଙ୍ଗର ଦୁଇଗୋଟି ଗ୍ରାମାଞ୍ଚଳ କ୍ରିକେଟ ଟିମ ମଧ୍ୟରେ ଅନୁଷ୍ଠିତ ହେଉଥିବା ଫାଇନାଲ ଖେଳରେ ମନୋଜ ଅମ୍ପେୟାରିଙ୍ଗ କରି ଚର୍ଚ୍ଚାରେ ରହିଛନ୍ତି । ମନୋଜଙ୍କ ଘର ଭଦ୍ରକ ଜିଲ୍ଲା ବନ୍ତ ବ୍ଲକ କେନ୍ଦୁଆପଦା ଆମ୍ପର ଗ୍ରାମରେ । ପିଲାଟି ବେଳୁ ମନୋଜଙ୍କ କ୍ରିକେଟ ଖେଳ ପ୍ରତି ବେଶ ଆଗ୍ରହ ରହିଥିଲା । କ୍ରିକେଟ ଖେଳ ମାଧ୍ୟମରେ ଲୋକଙ୍କ ମନୋରଞ୍ଜନ କରିବାକୁ ସେ ଲୋକପ୍ରିୟ ଟି-୨୦ ଖେଳରେ ଡ୍ୟାନସିଂ ଅମ୍ପେୟାରିଙ୍ଗ କୁ ଆପଣେଇ ନେଇଛନ୍ତି ।

ଅମ୍ପାୟାରଙ୍କ ଡ୍ୟାନ୍ସ ଦେଖି ଦର୍ଶକମାନେ ଭରପୁର ମଜା ଉଠାଇଥିଲେ । ଖେଳ ଦେଖିବା ସହିତ ଅମ୍ପାୟାରଙ୍କ ଡ୍ୟାନ୍ସିଂ ଅନ୍ଦାଜ ଦର୍ଶକ ମାନଙ୍କୁ ଆକର୍ଷିତ କରିଥିଲା । ଲୋକଙ୍କୁ ହସାଇବାର କଳା ସମସ୍ତଙ୍କୁ ଜଣାନଥାଏ । ତେବେ ଏହି ଦୃଶ୍ୟରୁ ସ୍ପଷ୍ଟ ହେଉଛି ଯେ, ଯୁବକ ଜଣକ କେତେ ଆନନ୍ଦର ସହ ନିଜ ଦାୟିତ୍ୱ ସମ୍ପାଦନ କରୁଛନ୍ତି ଏବଂ ସମସ୍ତଙ୍କୁ ନିଜ କଳାରେ ବାନ୍ଧି ରଖିଛନ୍ତି । ତେବେ ଏହି ଭିଡିଓକୁ ଦେଖି ଆପଣ ବି ନିହାତି ଭାବେ ଖୁସି ହେବେ ଆଉ ଏହି ଡ୍ୟାନସିଂ ଅମ୍ପାୟାର ମନୋଜ କୁମାରଙ୍କର ତାରିଫ କରିବେ ।