ପାନୀୟ ଜଳ ପାଇଁ ହନ୍ତସନ୍ତ ଭୁଷଲାଡ ଗାଁ ଲୋକେ, ୨୦ ଦିନ ହେବ ବନ୍ଦ ରହିଛି ଜଳ ଯୋଗାଣ

ସରକାର ପାନୀୟ ଜଳ ପାଇଁ କୋଟି କୋଟି ଟଙ୍କାର ପ୍ରକଳ୍ପ କରୁଥିବା ବେଳେ ବଙ୍ଗୋମୁଣ୍ଡା ବ୍ଲକର ଭୁଷଲାଡ ଗାଁରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ଏଠାରେ ପାନୀୟ ଜଳ ସମସ୍ୟା ଉତ୍କଟ ରୁପ ଧାରଣ କରିଛି । ଲୋକେ ବିଶୁଦ୍ଧ ପାଣି ବୁନ୍ଦାଏ ପାଇଁ ଅନେକ ହଇରାଣ ହରକତ ହେଉଛନ୍ତି । ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକର ଭୁଷଲାଡ ପଞ୍ଚାୟତର ଭୁଷଲାଡ ଗାଁ । ଗାଁରେ ଏବେ ପାଣି ସମସ୍ୟା ଦେଖିବାକୁ ମିଳିଛି । ସକାଳ ହେଲେ ଗାଁ ଲୋକଙ୍କ ମନରେ ଗୋଟିଏ ଚିନ୍ତା ପିଇବା ପାଣି କେଉଠି ମିଳିବ ।

ଗତ ୨୦ ଦିନ ହେଲା ଉନ୍ଦେର ନଦୀରୁ ଗାଁକୁ ଜଳ ଯୋଗାଣ ହେଉଥିବା ମଟର ପୋଡି ଯାଇଥିବାରୁ ଜଳ ଯୋଗାଣ ବନ୍ଦ ରହିଛି । ଲୋକେ ପାଣି ପାଇ ଖୁବ ହନ୍ତସନ୍ତ ହେଉଥିବାର ଦେଖିବାକୁ ମିଳିଛି । ମହିଳା ମାନେ ହାତରେ ଗରା ଓ ବାଲଟି ଧରି ଲମ୍ବା ଲାଇନରେ ଲାଗିପଡିଛନ୍ତି ଗାଁରେ ଥିବା ଏକ ନଳକୂପ ନିକଟରେ । ପାଣି ଟିକିଏ ପାଇଁ ସେଠାରେ ଘଣ୍ଟା ଘଣ୍ଟା ଅପେକ୍ଷା କରିବା ସହ ନିଜ ନିଜ ମଧ୍ୟରେ ଝଗଡା ଲାଗିଥାନ୍ତି । ଫଳରେ ପାଣି ପାଇଁ ଗାଁ ଲୋକେ ଅନେକ ସମସ୍ୟାର ସମ୍ମୁଖିନ ହୋଇଥାନ୍ତି । ଗାଁରେ ଏବେ ପାନୀୟ ଜଳ ସମସ୍ୟା ଉତ୍କଟ ରୂପ ଧାରଣ କରିଛି । ଲୋକେ ପାନୀୟ ଜଳ ଟିକିଏ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।

ଭୁଷଲାଡ ଗାଁରେ ଦୀର୍ଘ ଦିନରୁ ପାଣି ସମସ୍ୟା ଲାଗି ରହିଛି । ଯେହେତୁ ଏହି ଗାଁ ଏକ ଶୁଷ୍କ ଗାଁ ଏଠି ପାଣିର ସ୍ରୋତ ବହୁତ ତଳେ ତେଣୁ ନଳକୂପରୁ ମଧ୍ୟ ଆସାଧିତ ପାଣି ବାହାରେ ନାହିଁ ଓ ଏହା ଉପରେ ଦୀର୍ଘ ୨୦ ଦିନ ହେଲା ମଟର ପୋଡି ଯାଇଥିବାରୁ ନଦୀରୁ ଆସୁଥିବା ଜଳ ଯୋଗାଣ ବନ୍ଦ ରହିଛି ତେଣୁ ଲୋକେ ପାଣି ପାଇ ବହୁତ ଅସୁବିଧାର ସମ୍ମୁଖୀନ ହେଉଥିବାର କହିଛନ୍ତି । ଗାଁ ଲୋକେ ଦାବି କରିଛନ୍ତି ଗାଁରେ ଏକ ଓଭରହେଡ ଟାଙ୍କି ନିର୍ମାଣ ହେଉ ଓ ନଳକୂଅ ଗୁଡିକୁ ଶୀଘ୍ର ସଜାଡିବାକୁ କହିଛନ୍ତି ।

ବାରମ୍ବାର ପ୍ରଶାସନ ତଥା ଗାଁର ସରପଞ୍ଚ,ୱାର୍ଡମେମ୍ବରକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିପାରିନାହି । ସ୍ଥାନୀୟ ସରପଞ୍ଚକୁ ପାଣିର ସମସ୍ୟା ବିଷୟରେ ପଚାରିବାରୁ ସେ ବିଭାଗୀୟ ଅଧିକାରୀ ଓ ବିଡିଓ ଜଣାଇଥିବା କହିଛନ୍ତି । ଗାଁର ପାନୀୟ ଜଳ ସମସ୍ୟା ବିଷୟରେ ଆମେ ବଙ୍ଗୋମୁଣ୍ଡା ବିଡିଓଙ୍କ ସହ ଆଲୋଚନା କରିଥିଲୁ ସେ କହିଛନ୍ତି ଅତି ଶୀଘ୍ର ପାନୀୟ ଜଳ ସମସ୍ୟା ଦୂର କରିବା ସହ ପାଣି ଟ୍ୟାଙ୍କର ମାଧ୍ୟମରେ ପାଣି ଦିଆଯିବ ବୋଲି କହିଛନ୍ତି ।