ଦୂର ହେବ ରାଜନଗରର ୫୦ ହଜାର ଲୋକଙ୍କ ଦୁଃଖ, ତାଳଚୁଆରୁ କାରନାଳି ଯାଏ ୧୧୬ କୋଟି ଟଙ୍କା ବ୍ୟୟରେ ନିର୍ମାଣ ହେବ ଫ୍ଲୋଟିଂ ବ୍ରିଜ

ରାଜନଗର : କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକର ସମୁଦ୍ର କୂଳିଆ ୫୦ ହଜାର ଲୋକଙ୍କ ଦୁଖ ଦୂର ହେବ। ଜୀବନ ଜୀବିକାର ଲାଇଫ ଲାଇନ୍ ହେବ ରୋ- ପ୍ୟାକ୍ସ ଜେଟି।  ଦୀର୍ଘଦିନର ସମସ୍ୟା ଦୂର ହେବ।  ସମୟ ନଷ୍ଟ ହେବ ନାହିଁ । କେନ୍ଦ୍ରାପଡ଼ା ଓ ଭଦ୍ରକ ଜିଲ୍ଲା ମଧ୍ୟରେ ଜଳପଥରେ ଦୂରତା ହ୍ରାସ ପାଇଁ ପ୍ରକ୍ରିୟା ଆରମ୍ଭ ହୋଇଛି । କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକର ତାଳଚୁଆରୁ ଭଦ୍ରକ ଜିଲ୍ଲାର କାରନାଳି ପର୍ଯ୍ୟନ୍ତ ନିର୍ମାଣ ହେବ ରୋ-ପାକ୍ସ ଜେଟି ଓ ଫ୍ଲୋଟିଂ ବ୍ରିଜ। ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ୧୧୬ କୋଟି ୮ ଲକ୍ଷ ୬୪ ହଜାର ୩୨୪ ଟଙ୍କା ବ୍ୟୟରେ ଏହା ନିର୍ମାଣ ହେବ।

ଏହି ଫ୍ଲୋଟିଂ ବ୍ରିଜ ଦେଇ ଯାତ୍ରୀଙ୍କ ସହିତ ବସ୍ , କାର ତାଳଚୁଆରୁ କାରନାଳି ଯାଇପାରିବ । ରାଜନଗର ବିଧାୟକ ଧ୍ରୁବ ସାହୁ  ଏହି ପ୍ରକଳ୍ପର ଶିଳାନ୍ୟାସ କରିଛନ୍ତି । ଫର୍ଚୁନ ଗ୍ରୁପ ଏହି ଫ୍ଲୋଟିଂ ଜେଠି ଓ ଫ୍ଲୋଟିଂ ବ୍ରିଜ ନିର୍ମାଣ କରିବ । ୧୮ ମାସ ମଧ୍ୟରେ ନିର୍ମାଣ ଶେଷ ହେବ। ଦୀର୍ଘ ବର୍ଷର ଦାବି ସରକାର ପୂରଣ କରିଛନ୍ତି । ଏହି ବ୍ରିଜ ନିର୍ମାଣ ହେବା ପରେ ଲୋକଙ୍କ ବ୍ୟବସାୟରେ ଉନ୍ନତି ଘଟିବ । ବ୍ୟବସାୟୀମାନେ କମ୍ ଖର୍ଚ୍ଚରେ ଦୁଇ ଜିଲ୍ଲା ମଧ୍ୟରେ ଆମଦାନୀ ରପ୍ତାନୀ କରିପାରିବେ ।

ରାଜନଗର ବ୍ଲକର ତାଳଚୁଆ, ବାଘମାରି, କେରୁଆଁପାଳ, ରଂଗଣୀ, କୃଷ୍ଣନଗର, ଡାଙ୍ଗମାଳ, ଖମାରସାହି ପ୍ରଭୃତି ୭ଟି ପଂଚାୟତର ପ୍ରାୟ ୫୦ ହଜାରରୁ ଊର୍ଦ୍ଧ୍ୱ ଲୋକେ ଭଦ୍ରକ ଓ ବାଲେଶ୍ୱର ଉପରେ ନିର୍ଭରଶୀଳ। ଏହି ଲୋକମାନଙ୍କ ପାଇଁ ସଡ଼କ ପଥ ବହୁ ଦୂର। ଜୀବନକୁ ପାଣି ଛଡାଇ ବୋଟ କିମ୍ବା ଲଞ୍ଚରେ ଯାତାୟାତ କରିଥାନ୍ତି । ପ୍ରତିଦିନ ୫ ହଜାର ଲୋକ ଜଳପଥରେ ପ୍ରାୟ ୧୦ କିଲୋମିଟର ଭଦ୍ରକ ଓ ବାଲେଶ୍ୱରକୁ ଯା’ଆସ କରିଥାନ୍ତି । ଦୀର୍ଘ ଦିନର ସ୍ଵପ୍ନ ପୂରଣ ହେବାକୁ ଯାଉଥିବାରୁ ଅଞ୍ଚଳବାସୀ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।