ମନ୍ତ୍ରିମଣ୍ଡଳରେ ଆଗକୁ ଛୋଟ ଧରଣର ଅଦଳବଦଳ ସମ୍ଭାବନା,ସାମିଲ ହେବେ ନୂଆ ମୁହଁ

କେନ୍ୟୁଜ୍(ବ୍ୟୁରୋ): ଆଗକୁ ବଦଳିପାରେ ରାଜ୍ୟ ମନ୍ତ୍ରିମଣ୍ଡଳ। ମନ୍ତ୍ରିମଣ୍ଡଳରେ ସାମିଲ ହେବେ ନୂଆ ମୁହଁ। ବାଚସ୍ପତି ଓ ଦୁଇ ମନ୍ତ୍ରୀଙ୍କ ଇସ୍ତଫା ପରେ ଛୋଟ ଧରଣର ମନ୍ତ୍ରିମଣ୍ଡଳ ଅଦଳବଦଳ ସମ୍ଭାବନା । ନବ ଦାସଙ୍କ ମୃତ୍ୟୁ ପରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କୁ ସ୍ୱାସ୍ଥ୍ୟ ବିଭାଗ ଦାୟିତ୍ୱ ଦିଆଯାଇଛି । ଏବେ ନୂଆ ମନ୍ତ୍ରିମଣ୍ଡଳରେ ତିନିଜଣ ମନ୍ତ୍ରୀ ଓ ଜଣେ ବରିଷ୍ଠ ବିଧାୟକଙ୍କୁ ବାଚସ୍ପତି କରାଯିବ । ଶ୍ରମ ମନ୍ତ୍ରୀ ପଦରୁ ଶ୍ରୀକାନ୍ତ ସାହୁ ଇସ୍ତଫା ଦେବା ପରେ ଦକ୍ଷିଣ ଓଡ଼ିଶାରୁ କାହାକୁ ମିଳିବ ମନ୍ତ୍ରୀ ପଦ ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ବାଚସ୍ପତି ପଦରୁ ଇସ୍ତଫା ଦେଇଥିବା ବିକ୍ରମ କେଶରୀ ଆରୁଖଙ୍କୁ ମନ୍ତ୍ରୀ ପଦ ମିଳିପାରେ ବୋଲି କୁହାଯାଉଛି । ବ୍ରହ୍ମପୁର ବିଧାୟକ ବିକ୍ରମ ପଣ୍ଡା ଓ କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନଙ୍କ ନାଁ ଦୌଡ଼ରେ ରହିଛି।

ପଶ୍ଚିମ ଓଡ଼ିଶାରୁ ନବ ଦାସ ରାଜ୍ୟ ମନ୍ତ୍ରିମଣ୍ଡଳରେ ଥିଲେ ସ୍ୱାସ୍ଥ୍ୟ ମନ୍ତ୍ରୀ। ତାଙ୍କ ସ୍ଥାନରେ ପଶ୍ଚିମ ଓଡ଼ିଶାରୁ କାହାକୁ ମିଳିବ ମନ୍ତ୍ରୀ ପଦ ତାକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଛି। ଝାରସୁଗୁଡା ଉପନିର୍ବାଚନରେ ବିପୁଳ ଭୋଟରେ ବିଜୟ ଲାଭ କରିଥିବାରୁ ଦୀପାଳି ଦାସଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇପାରେ ବୋଲି ମଧ୍ୟ ଚର୍ଚ୍ଚା ହେଲାଣି । ପଶ୍ଚିମ ଓଡ଼ିଶାରେ ହେଉଥିବା ଉପନିର୍ବାଚନରେ ଦଳ କ୍ରମାଗତ ସଫଳତା ହାସଲ କରୁଛି। ତେଣୁ ପଶ୍ଚିମରୁ ଜଣଙ୍କୁ ମୁଖ୍ୟମନ୍ତ୍ରୀ ପୁରସ୍କୃତ କରିପାରନ୍ତି। ସେହିପରି ମହିଳା ପ୍ରତିନିଧିତ୍ୱକୁ ମୁଖ୍ୟମନ୍ତ୍ରୀ ଅଧିକ ଗୁରୁତ୍ୱ ଦେଉଥିବାରୁ ଲତିକା ପ୍ରଧାନ କିମ୍ବା ଦୀପାଳି ଦାସଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇପାରେ। ସେପଟେ ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକଙ୍କୁ ମିଳିଛି ଅତିରିକ୍ତ ଦାୟିତ୍ୱ। ସମୀର ଦାଶ ଓ ଶ୍ରୀକାନ୍ତ ସାହୁଙ୍କ ମନ୍ତ୍ରୀ ପଦରୁ ଇସ୍ତଫା ଦେବା ପରେ ଗଣଶିକ୍ଷା ଓ ଶ୍ରମ ବିଭାଗର ଅତିରିକ୍ତ ଦାୟିତ୍ୱ ପ୍ରମିଳା ମଲ୍ଲିକଙ୍କୁ ମିଳିଛି।

 ବିଧାନସଭାରେ କିଏ ହେବେ ବାଚସ୍ପତି? ୨୦୨୨ରେ ମନ୍ତ୍ରିମଣ୍ଡଳର ପୁନର୍ଗଠନ ବେଳେ ବାଚସ୍ପତି ଭାବେ ଦାୟିତ୍ୱ ଗ୍ରହଣ କରିଥିଲେ ବରିଷ୍ଠ ବିଧାୟକ ବିକ୍ରମ କେଶରୀ ଆରୁଖ। କିନ୍ତୁ ଗତକାଲି ବ୍ୟକ୍ତିଗତ କାରଣରୁ ସେ ଇସ୍ତଫା ଦେଇଛନ୍ତି। ପୂର୍ବରୁ ବାଚସ୍ପତି ଭାବେ କାର୍ଯ୍ୟ କରିଥିବା ନିରଞ୍ଜନ ପୂଜାରୀ ବାରସ୍ପତି ରେସ୍‌ରେ ଆଗରେ ରହିଛନ୍ତି। ପୂର୍ବରୁ ୨୦୧୪ରୁ ୨୦୧୭ ପର୍ଯ୍ୟନ୍ତ ସେ ବାଚସ୍ପତି ଥିଲେ।… ବରିଷ୍ଠତା ଭିତ୍ତିରେ ଦେବୀ ମିଶ୍ର ଓ ଅମର ଶତପଥୀଙ୍କ ନାଁ ରହିଛି।

 ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀରୁ ଓଡ଼ିଶା ଫେରିଛନ୍ତି। ରାଜ୍ୟପାଳ ପ୍ରଫେସର ଗଣେଶୀ ଲାଲ ରାଜ୍ୟ ବାହାରେ ଅଛନ୍ତି। ୨୨ ତାରିଖରେ ଓଡ଼ିଶା ଫେରିବେ। ମନ୍ତ୍ରିମଣ୍ଡଳ ସଂପ୍ରସାରଣ ପାଇଁ ସେ ଆଗୁଆ ମଧ୍ୟ ଆସିପାରନ୍ତି। ତେଣୁ ରାଜ୍ୟପାଳ ଓଡ଼ିଶା ଫେରିବା ପରେ ମନ୍ତ୍ରିମଣ୍ଡଳ ସଂପ୍ରସାରିତ ହେବ ।