ନବରଙ୍ଗପୁର ପାଇଁ କାମ କରିବାର ସ୍ବପ୍ନ ପାଇଁ ନମ୍ରତା ଛାଡିଲେ ଉଚ୍ଚ ବେତନ ଚାକିରି, ଶେଷରେ OPSC ପରୀକ୍ଷାରେ ଉତ୍ତୀର୍ଣ୍ଣ ହୋଇ ପାଇଲେ ସଫଳତା

ନିଜ ଇଚ୍ଛା ଓ ସ୍ୱପ୍ନ କୁ ବାସ୍ତବ ରୂପ ଦେବା ସମସ୍ତଙ୍କ ପାଇଁ ସହଜ କଥା ନୁହେଁ । ଏଥପାଇଁ କରିବାକୁ ପଡିଥାଏ ତ୍ୟାଗ , ଦେବାକୁ ପଡିଥାଏ ସମୟ । ଏହାବାଦ ଆପଣଙ୍କ ଭାଗ୍ୟ । ଯଦି ଏସବୁ ଜିନିଷ ମିଳେ ତେବେ ଜଣେ ସଫଳତା ପାଇବା ସହଜ ହୋଇଯାଏ । ଏଭଳି ନିଜ ସ୍ୱପ୍ନକୁ ପୂରା କରିବା ପାଇଁ ଉଚ୍ଚ ବେତନ ଚାକିରୀ ଛାଡି ଲୋକଙ୍କ ସେବା କରିବା ଉଦ୍ଦେଶ୍ୟରେ ଆଗେଇଲେ ନମ୍ରତା । ଶେଷରେ ସଫଳତା ତାଙ୍କ ହାତକୁ ଆସିଲା । OPSC ପରୀକ୍ଷାରେ କୃତକାର୍ଯ୍ୟ ହୋଇ ନବରଙ୍ଗପୁରର ନାଁ ରଖିଲେ ନମ୍ରତା ମିଶ୍ର ।

ସଦ୍ୟ ପ୍ରକାଶିତ ହୋଇଥିବା OPSC ପରୀକ୍ଷାରେ ଅନେକ ଜଣ କୃତକାର୍ଯ୍ୟ ହୋଇଥିବା ବେଳେ ୧୦୩ ରାଙ୍କ ରଖି ପରିବାର ତଥା ନିଜ ଜିଲ୍ଲା ପାଇଁ ଗର୍ବ ଗୌରବ ଆଣିଛନ୍ତି ନମ୍ରତା । ନମ୍ରତା ପୂର୍ବରୁ କମ୍ପ୍ୟୁଟର ଇଂଜିନିୟରିଂ ଚାକିରୀ ଛାଡି ଆରଆଇ ଚାକିରିରେ ଯୋଗ ଦେଇଥିଲେ । କିନ୍ତୁ ତାହା ବି ଛାଡି ଲୋକଙ୍କ ସେବା କରିବା ଲକ୍ଷ ନେଇ OPSC ପରୀକ୍ଷା ଦେଇଥିଲେ ଏବଂ ପ୍ରଥମ ଥର ବିଫଳ ହୋଇଥିବା ବେଳେ ଏବେ ଦ୍ଵିତୀୟ ଥର ପରୀକ୍ଷାରେ ସେ ସଫଳତା ହାସଲ କରିଛନ୍ତି । ନିଜର ଏହି ସଫଳତା ପାଇଁ ପରିବାର ଓ ଭଗବାନ ଙ୍କୁ ବିଶେଷ ଭାବେ ନବରଙ୍ଗପୁର ର ଆରାଧ୍ୟ ଦେବୀ ମା ଭଣ୍ଡାରଘରଣୀ ଙ୍କ ଆଶୀର୍ବାଦ ରୁ ସଫଳ ହୋଇଥିବା କହିଛନ୍ତି ।

ଜନସାଧାରଣ ତଥା ନବରଙ୍ଗପୁର ଜିଲ୍ଲା ପାଇଁ କିଛି ଭଲ କାର୍ଯ୍ୟ କରିବାର ସ୍ୱପ୍ନ ସଫଳ କରିବେ ବୋଲି ପ୍ରକାଶ କରିଛନ୍ତି । ନମ୍ରତାଙ୍କ ବାପା ସୁବାସ ମିଶ୍ର ଜଣେ ଅବସରପ୍ରାପ୍ତ ଗୋଷ୍ଠୀ ମଙ୍ଗଳ ଅଧିକାରୀ ଓ ମା ସୁଧାଂଶୁ କିରଣ ରଥ ଜଣେ ଶିକ୍ଷୟତ୍ରୀ ଭାବେ କାର୍ଯ୍ୟରତ । ଝିଅ ର ଏହି ସଫଳତା ରେ ସେମାନେ ବହୁତ ଖୁସି । ନବରଙ୍ଗପୁରର ଗରିବ ଜନସାଧାରଣ ଙ୍କ ପାଇଁ କିଛି କରିବାର ସ୍ୱପ୍ନ ନମ୍ରତାଙ୍କର ପୁରଣ ହୋଇଥିବା ବାପା ସୁବାସ ପ୍ରକାଶ କରିଛନ୍ତି ।

ଏହା ବ୍ୟତୀତ ନବରଙ୍ଗପୁର ସହରର ଦଳେଇ ସାହିର ସୁରଜ ପ୍ରଧାନ OPSC ପରୀକ୍ଷାରେ ୧୩୭ ରାଙ୍କ ରଖି ଉତ୍ତୀର୍ଣ୍ଣ ହୋଇଛନ୍ତି । ସୁରଜ ପ୍ରଧାନ ବ୍ୟାଙ୍କ ଅଫ ଇଣ୍ଡିଆ ରେ ଚାକିରୀ କରୁଛନ୍ତି । ସୁରଜ ପ୍ରଧାନଙ୍କ ବାପା ପ୍ରକାଶ ଚନ୍ଦ୍ର ପ୍ରଧାନ ଓ ମା କନକ ଲତା ପ୍ରଧାନ । ବାପା ଜଣେ ବ୍ୟବସାୟୀ, ତେଣୁ ପୁଅ ର ଏୟତେ ବଡ ସଫଳତାରେ ସେମାନେ ଖୁସି ବ୍ୟକ୍ତ କରିଛନ୍ତି । ସୁରଜ ନିଜ ସଫଳତା ଶ୍ରେୟ ପରିବାର, ମା ଓ ବାପା ଙ୍କୁ ଦେଇଛନ୍ତି । ସେହିପରି ଏହି ଜିଲ୍ଲାର ତେନ୍ତୁଳିଖୁଣ୍ଟି ବ୍ଲକର କୁର୍ମାକୋଟର ବିଶ୍ୱଜିତ କରକରା ୨୮୯ ରାଙ୍କ ରେ କୃତକାର୍ଯ୍ୟ ହୋଇଛନ୍ତି ।