ଆସନ୍ତା ୧୧ରେ ପ୍ରଧାନମନ୍ତ୍ରୀଙ୍କୁ ଭେଟିବେ ମୁଖ୍ୟମନ୍ତ୍ରୀ

ଭୁବନେଶ୍ବର : ସାଧାରଣ ନିର୍ବାଚନ ପରେ ପ୍ରଥମ ଥର ମୋଦି ଓ ନବୀନ ଭେଟଘାଟ ହେବ। ଜୁନ୍‌ ୧୧ ତାରିଖରେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ସାକ୍ଷାତ ହେବ । ଆଲୋଚନାରେ ସ୍ଥାନ ପାଇବ ବହୁ ଗୁୁରୁତ୍ୱପୂର୍ଣ୍ଣ ପ୍ରସଙ୍ଗ । ବାତ୍ୟା ଫନି ଜନିତ କ୍ଷୟକ୍ଷତିର ଚୂଡାନ୍ତ ରିପୋର୍ଟ କେନ୍ଦ୍ରକୁ ଦେଇଛନ୍ତି ରାଜ୍ୟ ସରକାର। ଏ ବାବଦରେ ପ୍ରଧାନମନ୍ତ୍ରୀ ଦୃଷ୍ଟି ଆକର୍ଷଣ କରିପାରନ୍ତି ମୁଖ୍ୟମନ୍ତ୍ରୀ। ଓଡ଼ିଶା ବାରମ୍ବାର ପ୍ରାକୃତିକ ବିପର୍ଯ୍ୟୟର ସାମନା କରୁଛି। ଏଥିପାଇଁ ଓଡ଼ିଶାକୁ ସ୍ୱତନ୍ତ୍ର ପାହ୍ୟା ମାନ୍ୟତା ଦାବିକୁ ପୁଣିଥରେ ଦୋହରାଇ ପାରନ୍ତି ନବୀନ। ନଚେତ୍‌ ପ୍ରାକୃତିକ ବିପର୍ଯ୍ୟୟ କ୍ଷେତ୍ରରେ ଓଡ଼ିଶାକୁ ଅଧିକ ଅନୁଦାନ ଦେବାକୁ ଦାବି କରିପାରନ୍ତି ମୁଖ୍ୟମନ୍ତ୍ରୀ। ସେହିପରି ରାଜ୍ୟରେ ଆୟୁଷ୍ମାନ ଭାରତ ଯୋଜନା ଲାଗୁ କରିବା ପାଇଁ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ମଧ୍ୟରେ ଆଲୋଚନା ଆରମ୍ଭ ହୋଇଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି। ପ୍ରଧାନମନ୍ତ୍ରୀଙ୍କ ସହ ସାକ୍ଷାତ ଆଲୋଚନା ବେଳେ ଫୋକସରେ ରହିପାରେ ଏସବୁ ପ୍ରସଙ୍ଗ। ଏହା ବ୍ୟତୀତ ମହାନଦୀ ଓ ପୋଲାଭରମ୍‌ ଭଳି ପ୍ରସଙ୍ଗକୁ ନେଇ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିପାରନ୍ତି ମୁଖ୍ୟମନ୍ତ୍ରୀ।

ସେପଟେ ଜାତୀୟ ଗଣମାଧ୍ୟମରେ ଏବେ ଲୋକସଭା ଉପ-ବାଚସ୍ପତି ପଦବୀ ନେଇ ଚର୍ଚ୍ଚା ଲାଗିରହିଛି। କୁହାଯାଉଛି, ବିଜେଡିକୁ ଏହି ପଦ ମିଳିପାରେ। ତେବେ ଚର୍ଚ୍ଚା ଭିତରେ କେଁ ପୂରାଇଛି ଶିବସେନା। ଦଳ ଦାବି କରିଛି, ଉପ-ବାଚସ୍ପତି ପଦବୀ ପାଇଁ ବିଜେଡି ଅପେକ୍ଷା ଶିବସେନା ଅଧିକ ଦାବିଦାର। ଏମିତି ସ୍ଥିତିରେ ମୋଦି-ନବୀନଙ୍କ ଭେଟଘାଟ ଉପ-ବାଚସ୍ପତି ପଦକୁ ନେଇ ଚାଲିଥିବା ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି।

ପୂର୍ବରୁ ରାଜ୍ୟସଭା ଉପାଧ୍ୟକ୍ଷ ପଦ ପାଇଁ ବିଜେଡି ରେସରେ ଥିଲା। କିନ୍ତୁ ଶେଷରେ ଜେଡିୟୁକୁ ମିଳିଥିଲା। ସେତେବେଳେ ଏହାକୁ ନେଇ ସରଗରମ ହୋଇଥିଲା ରାଜ୍ୟ ରାଜନୀତି। ରାଜ୍ୟସଭା ଉପାଧ୍ୟକ୍ଷ ପଦବୀରେ ଜଣେ ଓଡ଼ିଆଙ୍କୁ ବସିବାରୁ କିଏ ବଞ୍ଚିତ କଲା ବୋଲି ବିଜେଡି ଆଡକୁ ଅଙ୍ଗୁଳି ନିର୍ଦ୍ଦେଶ କରିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଏବେ ଲୋକସଭା ଉପବାଚସ୍ପତି ପଦବୀ ପାଇଁ ବିଜେଡି ସାଂସଦଙ୍କ ଭର୍ତ୍ତୃହରିଙ୍କ ନାଁ ଉଠିଥିବା ବେଳେ ଏହି ପଦ କାହାକୁ ମିଳିବ, ତାଉପରେ ନଜର।