ଢିଲା ସୁରକ୍ଷାର ପରିଣାମ, କଟକ ମେଡିକାଲରୁ ଚିକିତ୍ସାଧୀନ ଅବସ୍ଥାରେ କଏଦୀ ଚମ୍ପଟ

ଯାଜପୁର ରୋଡ (କେନ୍ୟୁଜ) : କଟକ ମେଡିକାଲରୁ ଚିକିତ୍ସାଧୀନ ଅବସ୍ଥାରେ ଜଣେ କଏଦୀ ଚମ୍ପଟ ମାରିଛି । ଜେଲ୍ କର୍ତ୍ତୃପକ୍ଷଙ୍କ ସୁରକ୍ଷା ଦାୟିତ୍ୱରେ ଥିବାବେଳେ କଏଦୀ ଜଣକ ମେଡିକାଲରୁ ଫେରାର ହୋଇଯାଇଥିବା ସୂଚନା ମିଳିଛି । କାଳିଆପାଣି ଥାନା ଅଂଚଳର ଏକ ହତ୍ୟାକାଣ୍ଡ ମାମଲାରେ ଅଭିଯୁକ୍ତ ଥାଇ ଯାଜପୁର ରୋଡ ଉପ କାରାଗାରର ଅନ୍ତେବାସୀ ରହିଆସିଥିବା ଶୁକ୍ରା ମୁଣ୍ଡା ଅସୁସ୍ଥ ହେବାରୁ ତାଙ୍କୁ ଚିକିତ୍ସା ନିମନ୍ତେ କଟକ ବଡ ଡାକ୍ତରଖାନାକୁ ନିଆଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ଜେଲ୍ କର୍ତ୍ତୃପକ୍ଷଙ୍କ ଦୁର୍ବଳ ସୁରକ୍ଷାବଳୟ ଭେଦି କଏଦୀ ଜଣକ ଗତକାଲି ଠାରୁ ଡାକ୍ତରଖାନାରୁ ଚମ୍ପଟ ମାରିଛି ।

ଏ ନେଇ ସୂଚନା ଦେଇଛନ୍ତି ରଗଡି ଜେଲ ଅଧୀକ୍ଷକ ପ୍ରକାଶ ଚନ୍ଦ୍ର ରଣା । ଫେରାର କଏଦୀ ଜଣଙ୍କ ଦୀର୍ଘ ଦୁଇ ବର୍ଷ ଧରି ରଗଡି ଜେଲରେ ବିଚାରଧିନ କଏଦୀ ଭାବେ ରାହିଆସିଥିବା ବେଳେ ଯକ୍ଷ୍ମା ରୋଗରେ ଆକ୍ରାନ୍ତ ହୋଇ ଉପ କାରାଗାର ପାରିସରରେ ଚିକିତ୍ସା ହୋଇ ଆସୁଥିଲେ । ହଠାତ୍ ୩୦ ତାରିଖ ଦିନ କଏଦୀର ଅବସ୍ଥା ଶଙ୍କଟାପର୍ଣ୍ଣ ହେବାରୁ କାରାଗାରର ତିନି ଜଣ ସୁରକ୍ଷା କର୍ମୀ ଓ ଜଣେ ଫାର୍ମାସିଷ୍ଟଙ୍କ ସହ ତାଙ୍କୁ କଟକ ବଡ ମେଡିକାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା । କିନ୍ତୁ ଢିଲା ସୁରକ୍ଷା ବଳୟର ସୁଯୋଗ ନେଇ କଏଦୀ ଜଣଙ୍କ ମେଡିକାଲ ପରିସରରୁ ଚମ୍ପଟ ମାରିବାକୁ ସକ୍ଷମ ହୋଇଥିଲା । ତେବେ କଏଦୀ ଜଣଙ୍କ ଫେରାର ହେବା ନେଇ ଉପ କାରାଗାର କର୍ତ୍ତୃପକ୍ଷ କଟକ ମଙ୍ଗଳାବାଗ ଥାନାରେ ଲିଖିତ ଅଭିଯୋଗ କରିଛନ୍ତି । ଫେରାର କଏଦୀ ଜଣଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଚାଲିଥିବାବେଳେ ଦୁର୍ବଳ ସୁରକ୍ଷା ବ୍ୟବସ୍ଥା ପାଇଁ ଦାୟୀ କାର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।