ମନ ମୋହୁଛି କୋରାପୁଟର ମିଠା ଆମ୍ବ, ବଜାରରେ ଖୋଲିଲା ଗାଁ ଆମ୍ବ ପସରା

କୋରାପୁଟ(କେନ୍ୟୁଜ୍‌): ଗରମ ଦିନେ ଆମ୍ବ ଖାଇବାର ମଜା ଅଲଗା । ହଳଦିଆ ଆମ୍ବ ଦେଖିଲେ ପାଟିରେ ଲାଳ ଆସେ । ତେବେ ଆମ୍ବ ବିଭିନ୍ନ ପ୍ରକାରର ଥାଏ । କିଛି ବହୁତ ମିଠା ଥାଏ ତ କିଛି ସ୍ୱାଦରେ ଭିନ୍ନ ଥାଏ । କିନ୍ତୁ କୋରାପୁଟ ଆମ୍ବର ଚାହିଦା ଅଲଗା । ଏହି ଆମ୍ବର ସ୍ୱାଦ ଏତେ ମିଠା ଯେ ଲୋକ ଦୂର ଦୂରରୁ ଏଠାକୁ ଆମ୍ବ କିଣିବା ପାଇଁ ଆସିଥାନ୍ତି । ଆମ୍ବର ଚାହିଦା ଦେଖି ଏବେ କୋରାପୁଟ ବଜାରରେ ଖୋଲିଛି ଗାଁ ଆମ୍ବ ପସରା । ସହରର କଳାନିକେତନ ଛକ ନିକଟରେ ଗାଁ ଆମ୍ବ ପସରା ଖୋଲାଯାଇଛି । ଚାଷୀ ଓ ଖାଉଟିଙ୍କ ସୁବିଧା ପାଇଁ ପ୍ରଶାସନ ପକ୍ଷରୁ ଏଭଳି ଉଦ୍ୟମ କରାଯାଇଛି ।

ମହିଳା ସ୍ୱୟଂ ସହାୟକ ସଙ୍ଘ ଓ ଉତ୍ପାଦକ ସଙ୍ଘ ପକ୍ଷରୁ ଜିଲ୍ଲାର ଲକ୍ଷ୍ମୀପୁର, ପଟାଙ୍ଗି,ବୋରିଗୁମା, ନନ୍ଦପୁର ସହ ଜିଲ୍ଲାର ଅନ୍ୟାନ୍ୟ ଅଞ୍ଚଳରୁ ବିଭିନ୍ନ ପ୍ରକାରର ଆମ୍ବ ସଂଗ୍ରହ କରାଯାଇ ଏଠାରେ ସୁଲଭ ମୂଲ୍ୟରେ ଲୋକଙ୍କୁ ଯୋଗାଇ ଦିଆଯାଉଛି। ଏହି ଅସ୍ଥାୟୀ ଷ୍ଟଲରେ ଏବେ ଲୋକଙ୍କ ଭିଡ଼ ଲାଗିଛି । ଲୋକେ କିପରି କମ ଦାମରେ ଆମ୍ବ କିଣି ପାରିବେ ଓ ଚାଷୀ ଯେପରି ଲାଭବାନ ହୋଇପାରିବ ସେଥିପ୍ରତି ସ୍ୱତନ୍ତ୍ର ଦୃଷ୍ଟି ଦିଆଯାଇ ଏହି ଗାଁ ଆମ୍ବ ପସରା ଷ୍ଟଲ ଖୋଲାଯାଇଛି । ଏଠାରେ ବାଇଗଣୀ ପଲେଇ, ମଲ୍ଲୀକା, ଲେଙ୍ଗଡ଼ା, ଦସେରି, ଆମ୍ରପଲ୍ଲି, ସୁନ୍ଦରୀ ଭଳି ବିଭିନ୍ନ ପ୍ରକାରର ସ୍ୱାଦିଷ୍ଟ ଆମ୍ବ ବିକ୍ରି କରାଯାଉଛି। ଆଗକୁ ସାବିତ୍ରୀ ଅମାବାସ୍ୟା,ରଜ ପର୍ବ ରହି ଥିବାରୁ ଏହାକୁ ଦୃଷ୍ଟିରେ ରଖି ଏହି ଆମ୍ବ ପସରା ଖୋଲାଯାଇଥିବା ସୂଚନା ମିଳିଛି।

ଷ୍ଟଲରେ ଆମ୍ବ କିଣିବା ପାଇଁ ଗ୍ରାହକଙ୍କ ଭିଡ଼ ଜମୁଥିବା ଦେଖାଯାଇଛି। ଏହି ଆମ୍ବ ଗୁଡିକୁ କୌଣସି ରାସାୟନିକ ଦ୍ରବ୍ୟ ଦ୍ୱାରା ପଚା ନଯାଇ ପାଳ ଓ ସୁନାରୀ ପତ୍ର ବ୍ୟବହାର କରି ପଚା ଯାଇଥିବା ସ୍ୱୟଂ ସହାୟକ ଗୋଷ୍ଠୀ ପକ୍ଷରୁ କୁହାଯାଇଛି ।

ବର୍ତ୍ତମାନ ବଜାରରେ ବିଭିନ୍ନ ପ୍ରକାରର ଆମ୍ବ ମିଳୁଛି । ଆମ୍ବରେ ବିଭିନ୍ନ ପ୍ରକାରର ରାସାୟନିକ ପଦାର୍ଥ ମିଶାଯାଇ ଏହାକୁ ପଚା ଯାଉଛି । କିନ୍ତୁ କୋରାପୁଟରେ ମିଳୁଥିବା ଏହି ଆମ୍ବରେ କୌଣସି ପ୍ରକାରର ରାସାୟନିକ ପଦାର୍ଥ ବ୍ୟବହାର କରାଯାଇନି । ତେଣୁ ଏହା ଆପଣଙ୍କ ସ୍ୱାସ୍ଥ୍ୟ ପାଇଁ ଭଲ ରହିବ । ଲୋକମାନେ ନିଜ ଚାହିଦା ମୁତାବକ ଏଠାରୁ ଆମ୍ବ କିଣିପାରିବେ । ଆମ୍ବର ସ୍ୱାଦ ଭିନ୍ନ ଥିବାରୁ ଲୋକମାନେ ଏଠାକୁ ଆମ୍ବ କିଣିବା ପାଇଁ ଆସୁଛନ୍ତି । ଯଦି ଆପଣ ବି ଆମ୍ବ କିଣିବା ପାଇଁ ଚାହୁଁଥିବେ ତେବେ ଏହି ସ୍ଥାନରୁ ଭଲ ଭଲ ଆମ୍ବ କିଣିପାରିବେ ।