ଦିନକୁ ଦିନ ଲୋପ ପାଇବାକୁ ବସିଲାଣି ଦେବଗୁରୁଙ୍କ କଳାକୃତି, ପ୍ରଶାସନର ସହାୟତାକୁ ଅପେକ୍ଷା

କଣ୍ଟାବାଞ୍ଝି : ଧୀରେଧୀରେ ଲୁପ୍ତ ହେବାକୁ ବିସିଲାଣି ଦେବଗୁରୁଙ୍କ କଳା ଓ କାରିଗରୀ । ଧାନରେ ନିର୍ମିତ କଳାକୃତି ଓ ମା ମହାଲକ୍ଷ୍ମୀଙ୍କ ଏହି ସୁକ୍ଷ୍ମ କାରୁକାର୍ଯ୍ୟ ଏବେ ସଂକଟରେ ।  ଦିନକୁ ଦିନ ପ୍ଲାଷ୍ଟିକ ର ଚାହିଦା ଯୋଗୁଁ ଏମାନଙ୍କ କଳାକୃତିକୁ ଏବେ ପଚାରେ କିଏ? ବଲାଙ୍ଗିର ଜିଲ୍ଲା ବଂଗୋମୁଣ୍ଡା ବ୍ଲକ ଚୂଲିଫୁଙ୍କା ପଂଚାୟତ ବରକାନି ଗାଁ । ଏଠାରେ ରୁହନ୍ତି ପ୍ରାୟ ୧୫ ଦେବଗୁରୁ ପରିବାର । ଏମାନଙ୍କ ମୁଖ୍ୟ କାମ ହେଲା ଧାନରେ ନିର୍ମାଣ ସୁକ୍ଷ୍ମ କାରୁକାର୍ଯ୍ୟ । ଧାନରେ ଏମାନେ ତିଆରି କରିଥାନ୍ତି ମହାଲକ୍ଷ୍ମୀଙ୍କ ପ୍ରତିମୂର୍ତ୍ତି ତଥା ବିଭିନ୍ନ ପ୍ରତିମାଙ୍କ କଳାକୃତି ।

ପରିବାର ସମସ୍ତେ ମିଶି ୩ ରୁ ୪ ଦିନ ପରିଶ୍ରମ କରି ଗାଁ କୁ ଗାଁ ଯାଇ ମାଁ ଲକ୍ଷ୍ମୀଙ୍କ ଚରିତ୍ର ଶୁଣାଇ ଏହି ସବୁ ଜିନିଷକୁ ବିକ୍ରି କରି ଦୁଇ ପଇସା ଆଣି ନିଜ ପରିବାର ପ୍ରତିପୋଷଣ କରିଥାନ୍ତି । ହେଲେ ଏବେ ଏହି ଦେବଗୁରୁଙ୍କ କଳା ଓ କାରିଗରୀ ସଂକଟରେ । ପ୍ରଶାସନର ଅବହେଳା ଓ ବଜାର ମିଳୁଥିବା ପ୍ଲାଷ୍ଟିକ ଜିନିଷର ଚାହିଦା ବୃଦ୍ଧି ହେବାରୁ ଦେବଗୁରୁଙ୍କ କଳାକୃତି ଏବେ ବିଲୁପ୍ତ ହେବାକୁ ବିସିଛି ।

ଏବେ ଆଉ ଶୁଭୁ ନାହିଁ ଦେବଗୁରୁଙ୍କ ବୀଣାର ଶବ୍ଦ । ଘରକୁ ଘର ଯାଇ ବୀଣା ବଜାଇ ନିଜ କଳାକୃତି ଦେଖାଇ ବିକ୍ରି କରୁଥିଲେ । ହେଲେ ସାରା ବିଶ୍ବରେ ଏବେ ମହାମାରୀ କାରୋନାର ଆତଙ୍କ ଦେଖିବାକୁ ମିଳିଛି । କାରୋନା ପାଇଁ ଚାରିଆଡେ ଲକ୍ ଡାଉନ । ଏଭଳି ପରିସ୍ଥିତିରେ ଦେବଗୁରୁଙ୍କ ପରିବାର ଲକଡାଉନ ପାଇଁ ଆଉ ଗାଁ ଗାଁ ଯାଇ ପାରୁନାହାନ୍ତି କି ନିଜ କଳାକୃତି କୁ ବିକ୍ରି କରିପାରୁନାହାନ୍ତି । ଏବେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି ଏମାନେ।

ପୂର୍ବପୁରୁଷ ଅମଳରୁ ନିଜ ବେଉସା ଅନୁସାରେ ଏହି ଦେବଗୁରୁ ପରିବାର ତାଙ୍କର ଏହି କୌଳିକ ବୃତି କରି ନିଜ ଜୀବନ ଜୀବିକା ଚଳାଇ ଆସୁଛନ୍ତି । ଏହା ଛଡା ଏମାନଙ୍କର ଆଉ କିଛି ଅନ୍ଯ ବେଉସା ନାହିଁ । ପ୍ରଶାସନ ପକ୍ଷରୁ ଏହି ଦେବଗୁରୁ ପରିବାରଙ୍କ ପାଇଁ ଯଦି କିଛି ବ୍ୟବସ୍ଥା କରାନଯାଏ, ତେବେ ଆଗାମୀ ଦିନରେ ଏମାନଙ୍କୁ ଆଉ ଦେଖିବାକୁ ମିଳିବନି ଏବଂ ଏହି କଳାକାର ମାନଙ୍କ ସୁନ୍ଦର କଳାକୃତି ଲୋପ ପାଇଯିବ।