ଆୟକର ବିଭାଗର ସବୁଠୁ ବଡ ରେଡ୍, ଟ୍ରକ୍ ରେ ବ୍ୟାଙ୍କକୁ ବୁହା ହେଲା ଟଙ୍କା

ମଦ ଉତ୍ପାଦନକାରୀ କମ୍ପାନୀ ଏବଂ ଏହାର ଆନୁଷଙ୍ଗିକ ପ୍ରତିଷ୍ଠାନ ଉପରେ ଆୟକର ବିଭାଗର ଚଢ଼ାଉ ଚାଲିଛି । ଏହି ଚଢ଼ାଉରେ ଏତେ ପରିମାଣର ନଗଦ ଟଙ୍କା ମିଳିଥିଲା ​​ଯେ ଆୟକର ବିଭାଗର ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ। ଏହି ଅଗଣିତ ନଗଦ ଗଣନା କ୍ରମାଗତ ଭାବେ ୫ ଦିନ ଯାଏଁ ଚାଲିଥିଲା । ପାଞ୍ଚ ଦିନରେ ଜବତ ହୋଇଛି ୪୦୦ କୋଟିରୁ ଅଧିକ ଟଙ୍କା । ଏଜେନ୍ସିର ଯେକୌଣସି ଗୋଟିଏ ଅପରେସନରେ ଏପର୍ଯ୍ୟନ୍ତ ପୁନରୁଦ୍ଧାର ହୋଇଥିବା ଏହା ହେଉଛି ସବୁଠାରୁ ବଡ ପରିମାଣ ବୋଲି ବିଶ୍ୱାସ କରାଯାଏ ।

କେବଳ ଏତିକି ନୁହେଁ, ଏହା ଏପରି ଏକ ଚଢ଼ାଉ ଯେଉଁଥିରେ ସବୁଠାରୁ ଅଧିକ ଟଙ୍କା ଗଣନା କରାଯାଇଛି । ଡିସେମ୍ବର ୨ ତାରିଖରୁ ବୌଦ୍ଧ ଡିଷ୍ଟିଲିରି ପିଭି ଲିମିଟେଡ୍ ଏବଂ ଅନ୍ୟମାନଙ୍କ ବିରୋଧରେ ଏହି ରେଡ ଆରମ୍ଭ ହୋଇଥିଲା । ବ୍ୟାଙ୍କ ଏବଂ ଆୟକର ବିଭାଗର କର୍ମଚାରୀମାନେ ଲଗାତାର ମେସିନରୁ ଏହି ନଗଦ ଟଙ୍କା ସବୁ ଗଣନା କରିଛନ୍ତି । ଏଥିପାଇଁ ଟ୍ରକ ବ୍ୟବସ୍ଥା ମଧ୍ୟ କରାଯାଇଥିଲା ଯାହାଦ୍ୱାରା ନଗଦ ଟଙ୍କା ବ୍ୟାଙ୍କକୁ ପରିବହନ ହୋଇପାରିବ ।

ଡିସେମ୍ବର ୬ରୁ ୧୦ । ୫ଦିନ ହେବ ଚାଲିଥିଲା ଝାଡ଼ଖଣ୍ଡ କଂଗ୍ରେସ ସାଂସଦ ଧିରଜ ସାହୁଙ୍କ ସହ ଓଡ଼ିଶାରେ ମଦ ବେପାରର ସାମ୍ରାଜ୍ୟ ବିଛାଇଥିବା ବ୍ୟବସାୟୀଙ୍କ ଲିଙ୍କ୍ ପରଠୁ ଜାରି ରହିଥିଲା ନନଷ୍ଟପ୍ ରେଡ୍ ଏବେ ସରିଛି ନୋଟ୍ ଗଣତି । ତେବେ ଏହି ୫ ଦିନରେ ମୋଟ ୪୦୦ କୋଟିରୁ ଅଧିକ ଟଙ୍କା ଜବତ ହୋଇଥିବା ସୂଚନା ମଳିଛି । ନଗଦ ଟଙ୍କା ଜବତ କ୍ଷେତ୍ରରେ ଏହା ଆୟକର ବିଭାଗର ସବୁଠୁ ବଡ଼ ରେଡ ବୋଲି କୁହାଯାଉଛି ।

ସେଥି ମଧ୍ୟରୁ ବଲାଙ୍ଗୀରରୁ ୪୦୦ କୋଟି ଟଙ୍କା ଜବତ କରାଯାଇଥିବା ବେଳେ ସମ୍ବଲପୁରରୁ ୩୭ କୋଟି ୫୦ ଲକ୍ଷ ଏବଂ ଟିଟଲାଗଡ଼ରୁ ୧୧ କୋଟି ଟଙ୍କା ଜବତ କରିଛି ଆୟକର ବିଭାଗ । ବର୍ତ୍ତମାନ ଏହି ଜବତ ଟଙ୍କାକୁ ସ୍ଥାନୀୟ ପିଡି ଆକାଉଣ୍ଟରେ ଜମା କରାଯାଉଛି । ଏଥିସହ ବଲାଙ୍ଗୀରରୁ ୬୦ କିଲୋ ସୁନା ଜବତ କରାଯାଇଥିବାର ସୂଚନା ମଧ୍ୟ ମଳିଛି । ଓଡ଼ିଶା ବ୍ୟତୀତ ବାହାର ରାଜ୍ୟରୁ ମଧ୍ୟ ଟଙ୍କା ଜବତ ଆରମ୍ଭ ହୋଇଛି । ଗତକାଲି ଆୟକର ବିଭାଗ ଝାଡଖଣ୍ଡରୁ ନଗଦ ୬ କୋଟି ଟଙ୍କା ଜବତ କରିଛି ।

ଝାଡଖଣ୍ଡରେ ଥିବା ଜୟଶ୍ୱାଲ ଟ୍ରେଡର୍ସରୁ ଏହି ଟଙ୍କା ଜବତ କରାଯାଇଛି । ଓଡ଼ିଶା ଏବଂ ଝାଡଖଣ୍ଡରେ ଏକକାଳୀନ ୩୭ ଟି ଟିମ ୩୭ ଟି ସ୍ଥାନରେ ଚଢାଉ କରି ଏସବୁ ଟଙ୍କା ଜବତ କରିଛି । ୧୭୬ ବ୍ୟାଗରୁ ୪୦୦ କୋଟିରୁ ଅଧିକ ଟଙ୍କା ଜବତ ହୋଇଛି । ପ୍ରାୟ ୨୫ଟି ମେସିନ୍‌ରେ ୫୦ କର୍ମଚାରୀଙ୍କ ଦ୍ୱାରା ଗଣତି ଶେଷ ହୋଇଛି ।