ଦ୍ରୁତ ଗତି ମହା ବିପତ୍ତି: ରାଜ୍ଯର ବିଭିନ୍ନ ସ୍ଥାନରେ ମର୍ମନ୍ତୁଦ ସଡକ ଦୁର୍ଘଟଣା, ୩ ବାଇକ୍ ଚାଳକ ମୃତ

ନବରଙ୍ଗପୁର/ମାର୍ଶାଘାଇ/କାମାକ୍ଷାନଗର: କଥାରେ ଅଛି ମଣିଷ ଜୀବନ ପାଣି ଫୋଟକା। ନିମିଷକରେ କାହାର କଣ ହେବ ସେକଥା କହିବା ଅସମ୍ଭବ। ଦର୍ଶକବନ୍ଧୁ ପ୍ରତିଦିନ ଅନେକ ଦୁର୍ଘଟଣା ଆମ ଆଖପାଖରେ ଘଟୁଛି । ସଡକ ସୁରକ୍ଷା ଜୀବନ ରକ୍ଷା, ଦ୍ରୁତ ଗତି ମହା ବିପତ୍ତି ଭଳି ଅନେକ ବାର୍ତ୍ତା ମାଧ୍ଯମରେ ସଚେତନ ମଧ୍ଯ କରାଯାଉଛି। ହେଲେ କେଉଁଠି ନା କେଉଁଠି ଏହାକୁ ବେଖାତିର କରିବାରେ ଲାଗିଛନ୍ତି, ବିଶେଷ କରି ଯୁବପୀଢି ମାନେ। ଆଜି ଦିନକରେ ତିନି ତିନିଟି ଦୁର୍ଘଟଣା ଜନିତ ମୃତ୍ଯୁ ଖବର ଆସି ପହଁଚିଛି।

କେନ୍ଦ୍ରାପଡା ଜିଲ୍ଲା ମାର୍ଶାଘାଇ ଥାନା ଲୁଣାବ୍ରିଜ ନିକଟରେ ଅଜଣା ଗାଡି ଧକ୍କାରେ ଜଣେ ବାଇକ ଆରୋହିଙ୍କର ମୃତ୍ଯୁ ହୋଇଛି । ମୃତ ଯୁବକ ସ୍ଥାନୀୟ ତୁଳସୀପୁର ଗ୍ରାମର ନିହାର ରଞ୍ଜନ ସୂତାର । ନିହାର ପାରାଦୀପ ପଟୁ ନିଜ ବାଇକ୍ ଯୋଗେ ଘରକୁ ଫେରୁଥିବା ବେଳେ ଲୁଣାବ୍ରିଜ୍ ନିକଟରେ ତାଙ୍କୁ ଏକ ଅଜଣା ଗାଡି ଧକ୍କା ଦେଇ ଚାଲିଯାଇଥିଲା । ତେବେ ଖବରପାଇ ଅଗ୍ନିଶ୍ରମ ବିଭାଗ ଓ ମାର୍ଶାଘାଇ ପୋଲିସ ପହଁଚି ତାଙ୍କୁ ମାର୍ଶାଘାଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ । କିନ୍ତୁ ଡ଼ାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।

ସେହିପରି ଢେଙ୍କାନାଳ-କାମାକ୍ଷାନଗର ମୁଖ୍ୟ ରାସ୍ତାର ଖଟୁଆହତା ଗାଁ ଶବରସାହି ନିକଟରେ ଟାଟା ଏସି ଗାଡି ଧକ୍କାରେ ଜଣେ ବାଇକ ଆରୋହୀଙ୍କର ମୃତ୍ୟୁ ହୋଇଛି । ମୃତକ ଜଣଙ୍କ ସଦର ଥାନା ବାର୍ଦ୍ଦା ସୁଧରିକାଟେଣୀ ଗାଁ ର ସଞ୍ଜୟ କୁମାର ନାୟକ । ସଞ୍ଜୟ ନିଜ ବାଇକ ଯୋଗେ ଘରକୁ ଯାଉଥିବା ବେଳେ ବିପରୀତ ଦିଗରୁ ଆସୁଥିବା ଏକ ଟାଟା ଏସି ଗାଡି ତାଙ୍କୁ ସାମ୍ନା ସାମ୍ନି ଧକ୍କା ଦେଇଥିଲା । ଯାହାଫଳରେ ତାଙ୍କର ମୃତ୍ଯୁ ହୋଇଛି।

ଠିକ୍ ସେହିଭଳି ନବରଙ୍ଗପୁର ଜିଲ୍ଲା ପାପଡ଼ାହାଣ୍ଡି ବ୍ଲକ୍ ଜଟାବହାଲ ନିକଟରେ ଥିବା ପେଟ୍ରୋଲ ପମ୍ପ ଠାରେ ଘଟିଛି ଏକ ମର୍ମନ୍ତୁଦ ଦୁର୍ଘଟଣା। ଯାହାର ସମ୍ପୁର୍ଣ୍ଣ ଦୃଶ୍ୟ ପେଟ୍ରୋଲ ପମ୍ପ ନିକଟରେ ଲାଗିଥିବା ସିସିଟିଭି କ୍ଯାମେରାରେ କଏଦ ହୋଇଛି। ଏକ ଚାଉଳ ବୋଝେଇ ଟ୍ରକ ଯାଉଥିବା ସମୟରେ ପଛପଟୁ ଏକ ବାଇକ୍ ଆସି ଟ୍ରକଟିକୁ ଧକ୍କା ଦେଇଥିଲା । ଯାହାଫଳରେ  ଘଟଣାସ୍ଥଳରେ ଜଣଙ୍କର ମୃତ୍ଯୁ ହୋଇଥିଲା ।

ସୂଚନା ମୁତାବକ, ବାଇକରେ ଯାଉଥିବା ଦୁଇ ଜଣ ପିପାଲଗୁଡ଼ାର ସମ ଭତରା ଓ ନବୀନ ଭତରା । ଆଉ ମୃତକ ଜଣଙ୍କ ହେଉଛନ୍ତି ସମ ଭତରା । ଅନ୍ଯପଟେ ପଛ ପଟେ ବସିଥିବା ନବୀନ ଏବେ ଗୁରୁତର ଆହତ ହୋଇ ପାପଡାହାଣ୍ଡି ଡାକ୍ତରଖାନାରେ ଚିକିତ୍ସିତ ହେଉଛନ୍ତି। କୌଣସି କାମରେ ଯାଇ ନିଜ ଘର ପିପାଲଗୁଡ଼ାକୁ ଫେରୁଥିବା ସମୟରେ ଏହି ଛାତିଥରା ଦୁର୍ଘଟଣା ଘଟିଥିଲା। ସବୁଠାରୁ ବଡ କଥା ଉଭୟଙ୍କ ମୁଣ୍ଡରେ ହେଲମେଟ୍ ନଥିଲା । ହୁଏତ ହେଲମଟ୍ ପିନ୍ଧିଥିଲେ ସମଙ୍କ ଜୀବନ ଅଳ୍ପକେ ବର୍ତ୍ତିଯାଇପାରିଥାନ୍ତା । ଯାହା ସିସିଟିଭିରେ କଏଦ ହୋଇଥିବା ଭିଜୁଆଲ୍ ଦେଖିଲେ ବାରିହୋଇ ପଡୁଛି।