ଟ୍ରାଭେରାକୁ ପିଟିଲା ଟ୍ରକ, ଘଟଣା ସ୍ଥଳରେ ଦୁଇ ମୃତ

ପ୍ରତ୍ୟେକ ଦିନ ଦୁର୍ଘଟଣାର ଖବର ସାମ୍ନାକୁ ଆସୁଛି । ଦୁର୍ଘଟଣାରେ ଅନେକ ଲୋକଙ୍କ ଜୀବନ ବି ଯାଉଛି । କିନ୍ତୁ ସତର୍କ ହେଉନାହାନ୍ତି ଲୋକେ । ଆଉ ଘଟୁଛି ଭୟଙ୍କର ଦୁର୍ଘଟଣା । ସମାନ ଭାବେ ଏଭଳି ଏକ ଭୟଙ୍କର ଦୁର୍ଘଟଣା ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ NH ୧୬ ଛତ୍ରଗଡ଼ ଠାରେ ଘଟିଯାଇଛି ।

ଟ୍ରାଭେରା ସହିତ ଧକା ହୋଇଥିଲା ଟ୍ରକ । ଫଳରେ ଟ୍ରାଭେରାରେ ବସିଥିବା ଦୁଇ ଜଣ ଯାତ୍ରୀଙ୍କର ଘଟଣା ସ୍ଥଳରେ ହିଁ ମୃତ୍ୟୁ ଘଟିଛି । ଏଭଳି ଦୁର୍ଘଟଣା ଘଟାଇବା ପରେ ଟ୍ରକ ଡ୍ରାଇଭର ଓ ହେଲପର ଫେରାର ହୋଇଯାଇଥିବା ସୂଚନା ମିଳିଛି । ତେବେ ଏଭଳି ଦୁର୍ଘଟଣା ଦେଖିବା ପରେ ରାସ୍ତାରେ ଯାଉଥିବା ଲୋକ ଘଟଣାସ୍ଥଳରେ ଅଟକି ଯାଇ ସଙ୍ଗେ ସଙ୍ଗେ ପୋଲିସକୁ ଖବର ଦେଇଥିଲେ ।

ଖବର ପାଇ ଘଟଣା ସ୍ଥଳରେ ବାଲୁଗାଁ ଅଗ୍ନିଶମ ବାହିନୀ ଓ ନାଭାଲ ଫାଣ୍ଡି ପୋଲିସ ପହଞ୍ଚି ମୃତ ବ୍ୟକ୍ତିଙ୍କୁ ଉଦ୍ଧାର କରି ବାଲୁଗାଁ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି । ଦୁର୍ଘଟଣା ଘଟାଇଥିବା ଟ୍ରକକୁ ପୋଲିସ ଜବତ କରି ତଦନ୍ତ ଜାରି ରଖିଛି । ଟ୍ରାଭେରାରୁ କିଛି କାଗଜ ପତ୍ର ସହିତ ଟଙ୍କା ଜବତ କରିଛି ପୋଲିସ । ସୂଚନା ମୁତାବକ ଆଜି ସକାଳୁ ସକାଳୁ ବାଲୁଗାଁ NH ୧୬ ଛତ୍ରଗଡ଼ ପାଖରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି । ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଉଭୟ ଟ୍ରାଭେରା ଓ ଟ୍ରକ ଯାଉଥିଲେ । ଏହି ସମୟରେ ଟ୍ରାଭେରା ପଛ ପଟୁ ଗୋଟିଏ ଟ୍ରକ ପିଟି ହୋଇଯାଇଥିଲା । ଦୁର୍ଘଟଣା ଏତେ ଜୋରରେ ଘଟିଥିଲା ଯେ ଟ୍ରାଭେରା ଟି ଡିଭାଇଡରରେ ପିଟି ହୋଇ ବିପରୀତ ରାସ୍ତାରେ ଆସି ପଡିଥିଲା । ଆଉ ଘଟଣାସ୍ଥଳରେ ହିଁ ଟ୍ରାଭେରାରେ ବସିଥିବା ଦୁଇ ଜଣ ବ୍ୟକ୍ତିଙ୍କ ମୃତ୍ୟୁ ହୋଇଛି । ଘଟଣା ସ୍ଥଳରୁ ଟ୍ରକ ଡ୍ରାଇଭର ଓ ହେଲପର ଫେରାର ଥିବା ବେଳେ ପୋଲିସ୍‌ ତଦନ୍ତ ଜାରି ରଖିଛି ।

ତେବେ ଏଭଳି ଦୁର୍ଘଟଣା ବାରମ୍ବାର ହେଉଛି । ତଥାପି ଲୋକମାନେ ସତର୍କ ହେଉନାହାନ୍ତି । ଦ୍ରୁତ ଗତିରେ ଗାଡ଼ି ଚଳାଇବା, ଫୋନରେ କଥା ହୋଇ ଗାଡ଼ି ଚଳାଇବା ସହ ମଦ୍ୟପାନ କରି ଗାଡ଼ି ଚଳାଇବା ଦ୍ୱାରା ଏଭଳି ଦୁର୍ଘଟଣାର ଖବର ସାମ୍ନାକୁ ଆସେ । ଯଦି ଲୋକମାନେ ନିଜେ ସତର୍କ ହୋଇ ଗାଡ଼ି ଚଳାଇବେ ତେବେ ଏଭଳି ଦୁର୍ଘଟଣାରୁ ହୁଏତ ବର୍ତ୍ତି ପାରିବେ ।