ଆଜି ଘରେ ଆଳୁକୁ ନେଇ ବନାନ୍ତୁ କିଛି ହଟକେ, ‘ଗାର୍ଲିକ ପଟାଟୋ’ ଯାହାକୁ ଖାଇବା ପରେ ସମସ୍ତେ କହିବେ ବାଃ..

ଭାରତୀୟ ରୋଷେଇ ଘରେ ଆଳୁର ଏକ ବିଶେଷ ସ୍ଥାନ ରହିଛି । ଏହାକୁ ଆମେ ସାଧାରଣତଃ ତରକାରୀ, ଭଜା କିମ୍ବା ପକୋଡା ଭାବେ ବ୍ୟବହାର କରିଥାଉ । ତେବେ ଆଜି ଆମେ ଆପଣଙ୍କୁ ଆଳୁରେ ତିଆରି ଏକ ସ୍ନାକ୍ସ ‘ଗାର୍ଲିକ ପଟାଟୋ’ ପ୍ରସ୍ତୁତ କରିବାର ରେସିପି ବିଷୟରେ । ଯାହାକୁ ଆପଣ ଘରେ ଅତି ସହଜରେ ପ୍ରସ୍ତୁତ କରିପାରିବେ । ତାହେଲେ ଆସନ୍ତୁ ଜାଣିବା କିପରି ପ୍ରସ୍ତୁତ କରାଯାଏ ଗାର୍ଲିକ ପଟାଟୋ ।

ଆବଶ୍ୟକୀୟ ସାମଗ୍ରୀ

• ଆଳୁ- ୪/୫ଟି
• ରସୁଣ ପେଷ୍ଟ ୨ ଚାମଚ
• ରିଫାଇନ ତେଲ ନଚେତ ଅଲିଭ ଅଏଲ
• ସିଲଭର ଫଏଲ୍
• ଗାର୍ଲିକ ବଟର
• ଗୋଲମରିଚ ଗୁଣ୍ଡ – ଅଧା ଚାମଚ
• ଧନିଆ ପତ୍ର
• ଆବଶ୍ୟକ ଅନୁସାରେ ଲୁଣ

ପ୍ରସ୍ତୁତି ପ୍ରଣାଳୀ

ମାଇକ୍ରୋୱେଭକୁ ପ୍ରଥମେ ପ୍ରିହିଟ କରି ରଖିଦିଅନ୍ତୁ । ଏହପରେ ଆଳୁରୁ ଚୋପା ଛଡାଇ ଏହାକୁ ଲମ୍ବା ଲମ୍ବା କରି କାଟିଦିଅନ୍ତୁ । ବର୍ତ୍ତମାନ ଆଳୁରେ ଗୋଲମରିଚଗୁଣ୍ଡ, ଲୁଣ, ରସୁଣ ପେଷ୍ଟ, ଧନିଆ ପତ୍ର ଓ ଅଲିଭ ଅଏଲ ମିଶାଇ କିଛି ସମୟ ପାଇଁ ରଖିଦିଅନ୍ତୁ । ବର୍ତ୍ତମାନ ଏହାକୁ ଭଲଭାବେ ଗୋଳାଇ ଦିଅନ୍ତୁ । ତାପରେ ଏକ ସିଲଭର ଫଏଲ୍ ନେଇ ତା ଭିତରେ କିଛି ରସୁଣ ପେଷ୍ଟ ୧ ଚାମଚ ଅଲିଭ ଅଏଲ ପକାଇ ଏହାକୁ ପ୍ୟାକ କରିଦିଅନ୍ତୁ । ତାପରେ ଏକ ବେକିଙ୍ଗ ଟ୍ରେ ନେଇ ସେଥିରେ ଗୋଟେ ପଟେ ପୂର୍ବରୁ ମ୍ୟାରିନେଟ କରି ରଖିଥିବା ଆଳୁ ଓ ପ୍ୟାକଡ଼ ରସୁଣ ରଖିଦିଅନ୍ତୁ । ଏହାକୁ ଅଧଘଣ୍ଟା ପର୍ଯ୍ୟନ୍ତ ସିଝିବାକୁ ଛାଡ଼ିଦିଅନ୍ତୁ । ଯଦି ସମ୍ଭବ ତାହେଲେ ମଝିରେ ମଝିରେ ଏହାକୁ ଓଲଟାଉଥାନ୍ତୁ ଏବଂ ଅଧଘଣ୍ଟା ପରେ ଏହାକୁ ମାଇକ୍ରୋୱେଭ ଭିତରୁ ବାହାର କରିଦିଅନ୍ତୁ । ଏବେ ଏହା ଉପରେ ଗାର୍ଲିକ ବଟର ଢାଳି ଗରମ ଗରମ ସର୍ଭ କରନ୍ତୁ ପଟାଟୋ ଗାର୍ଲିକ ।