ସମାଲୋଚିତ ହେବା ପରେ କ୍ଷମା ମାଗିଲେ ନୀତୀଶ କୁମାର, ‘ଲଜ୍ଜିତ ଅନୁଭବ କରୁଛି, ତେଣୁ କ୍ଷମା ମାଗୁଛି’

ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ସଦନରେ ଦେଇଥିବା ‘ସେକ୍ସ ଜ୍ଞାନ’ ମନ୍ତବ୍ୟ ଦେଇ ସମାଲୋଚିତ ହେବା ପରେ ଏବେ ଭୁଲ୍‌ ମାଗିଛନ୍ତି । ନୀତୀଶଙ୍କ ମନ୍ତବ୍ୟକୁ ନେଇ ବିବାଦ ଦେଖାଦେବା ପରେ ମହିଳାମାନଙ୍କୁ କ୍ଷମା ମାଗିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି, ‘ମୁଁ କେବଳ ମହିଳାମାନଙ୍କ ଶିକ୍ଷା ବିଷୟରେ କହିଥିଲି, ଯଦି ମୋ କଥା ଭୁଲ୍‌ ଲାଗିଲା, ତେବେ କ୍ଷମା ମାଗୁଛି । ଯେଉଁମାନେ ମୋର ନିନ୍ଦା କରୁଛନ୍ତି, ସେମାନଙ୍କୁ ଅଭିନନ୍ଦନ ଜଣାଉଛି ।

ସେ ଆହୁରି ମଧ୍ୟ କହିଛନ୍ତି, ମୋ ବୟାନର ଅର୍ଥକୁ ଭୁଲ ଭାବେ ଉପସ୍ଥାପନ କରାଯାଇଛି। ମୁଁ ତ ମହିଳାମାନଙ୍କ ଶିକ୍ଷାର କଥା କହିଥିଲି। ତଥାପି ଯଦି ମୋ ବୟାନରେ କେହି ଆଘାତ ପାଇଛନ୍ତି, ତା’ହେଲେ ମୁଁ କ୍ଷମା ମାଗୁଛି ।

ବିହାରରେ ଆମେ ଅନେକ ବଡ କାମ କରୁଛୁ । ମହିଳାଙ୍କ ଉନ୍ନତି ମଧ୍ୟ ଅନେକ କାମ କରୁଛି । ସଦନରେ ଦେଇଥିବା ବୟାନ ଯୋଗୁଁ ଳଜ୍ଜାଜନକ ଅନୁଭବ କରୁଛି । ତେଣୁ ମୋ ବୟାନ ଯୋଗୁଁ ଭଲ୍‌ ମାଗୁଛି ।

ସୂଚନାଯୋଗ୍ୟ, ଗତକାଲି ବିହାର ବିଧାନସଭାର ଶୀତକାଳୀନ ଅଧିବେଶନରେ ନୀତୀଶ କୁମାର ଏମିତି କିଛି କହିଛନ୍ତି, ଯାହାକୁ ଶୁଣି ମହିଳାମାନେ ସ୍ତବ୍ଧ ରହିଥିବା ବେଳେ ପୁରୁଷମାନେ ହସିବାକୁ ଲାଗିଥିଲେ ।

ନୀତୀଶ କୁମାର ସଫେଇ ଦେଇ କହିଛନ୍ତି, ମୁଁ କେବଳ ମହିଳାଙ୍କ ପଢିବା ବିଷୟରେ କହିଥିଲି । ମହିଳାମାନେ କମ୍‌ ପଢୁଛନ୍ତି, ସେମାନେ ଅଧିକ ପଢିବା ଜରୁରୀ । ଯେଉଁ ସ୍ଥାନରେ ଶିକ୍ଷା ପହଞ୍ଚିପାରିନାହିଁ, ସେଠାରେ ମହିଳାମାନଙ୍କୁ ଶିକ୍ଷିତ କରିବା ପାଇଁ ପଦକ୍ଷେପ ନେଇଛୁ ।