ନିଶାରେ ମାତାଲ୍‌ ପୋଲିସ୍‌ ବାବୁ, ଭିଡିଓ ହେଉଛି ଭାଇରାଲ୍‌

ଆରେ ଆରେ ଏ କଣ ? ପୋଲିସ ବାବୁ ଜଣଙ୍କ ରାସ୍ତାରେ ଆସୁ ଆସୁ ତଳେ କଣ ପଡ଼ିଗଲେ । କଣ ତାଙ୍କ ଦେହ ଭଲ ନାହିଁ କି ? ନାଁ ଖରାରେ ଅସୁସ୍ଥ ହୋଇପଡ଼ିଲେ। ହେଲେ ଏ ରାସ୍ତାରେ ଖୋଜୁଛନ୍ତି ସେ କଣ ? ଟିକିଏ ଉଠି ବସୁଥିବା ବେଳେ ପୁଣି ତଳେ ପଡ଼ିଯାଉଛନ୍ତି । ଏ ପୋଲିସ ବାବୁଙ୍କର ହୋଇଛି କଣ? ଏପରି କାହିଁକି ହେଉଛନ୍ତି ସେ। ଲାଗୁଛି ଫୁଲ୍‌ ଡ୍ୟୁଟିରେ ଅଛନ୍ତି ବାବୁ ଜଣକ । କିନ୍ତୁ ସେ ରାସ୍ତାରେ ଯେପରି ଯାଉଛନ୍ତି ଡ୍ୟୁଟିର ଚିନ୍ତା ଥିବା ପରି ବିଲକୁଲ୍‌ ଲାଗୁ ନାହାନ୍ତି । ପାଦ ତାଙ୍କର ରାସ୍ତାର ଗୋଟିଏ ପାର୍ଶ୍ୱରେ ପଡ଼ୁଛି ତ ଆଉ ଗୋଟିଏ ପାର୍ଶ୍ୱରେ ଟଳ ମଳ ହୋଇ ପାଦ ପଡ଼ୁଛି । ଚାଲୁ ଚାଲୁ ପଡ଼ି ଯାଉଛନ୍ତି ତ ପୁଣି ଉଠି ବସି ପଡ଼ୁଛନ୍ତି ।

ହଁ ଆଜ୍ଞା, ଏ ଦୃଶ୍ୟ ଦେଖି ଆପଣ ଯେମିତି ଆଶ୍ଚର୍ଯ୍ୟ ହେଉଛନ୍ତି ଆମେ ମଧ୍ୟ ଆଶ୍ଚର୍ଯ୍ୟ ହେଉଛୁ । କାରଣ ଖାକିରେ ପୁଣି ଲାଗିଛି ଦାଗ । ଜଣେ ପୋଲିସ କର୍ମଚାରୀଙ୍କ ରାସ୍ତା ମଝିରେ ଏପରି ବ୍ୟବହାର ଲୋକଙ୍କୁ ଚକିତ କରିଛି । ଜନପଦ ସହରର କୋତବାଲି ଅଞ୍ଚଳର ରମଇପଟ୍ଟି ମହଲ ନିକଟରେ ଜଣେ ପୋଲିସ କର୍ମଚାରୀ ନିଶାରେ ଚୁର୍‌ ଥିବା ବେଳେ ରାସ୍ତାରେ ଟଳମଳ ହୋଇ ଚାଲୁଛନ୍ତି। ସେ ପୁଣି ପଡ଼ିଯାଉଥିବା ବେଳେ ଉଠି ବସୁଛନ୍ତି । ଯେଉଁ ଦୃଶ୍ୟ ସୋସିଆଲ୍‌ ମିଡିଆରେ ବେଶ୍‌ ଭାଇରାଲ୍‌ ହେବାରେ ଲାଗିଛି । ଆଉ ପୋଲିସ ବାବୁଙ୍କ ଏଭଳି କାର୍ଯ୍ୟକଳାପ ଦେଖିବାକୁ ରାସ୍ତାରେ ଲୋକଙ୍କର ଭିଡ଼ ଜମିଛି ।

ସେଠାରେ ଉପସ୍ଥିତ କିଛି ଲୋକ ପୋଲିସ ବାବୁଙ୍କର ଏପରି କାର୍ଯ୍ୟକୁ ଭିଡିଓ କରୁଥିବା ବେଳେ ଅନ୍ୟ କିଛି ଲୋକ ପୋଲିସ ବାବୁଙ୍କୁ ଦେଖି ହସିବାରେ ଲାଗିଥାଆନ୍ତି। ପୋଲିସ ବାବୁଙ୍କର ଏହି ଭିଡିଓଟି ସୋଶିଆଲ ମିଡିଆରେ ଖୁବ୍‌ ଭାଇରାଲ୍‌ ହେଉଛି । ତେବେ ଏହି ପୋଲିସ ଅଫିସର ଜଣକ କୋତବାଲି ଥାନାରେ କାର୍ଯ୍ୟ କରନ୍ତି । ତାଙ୍କ ନାଁ ହେଉଛି ଗଣେଶ ଚୌହାନ । ସୋସିଆଲ୍‌ ମିଡିଆରେ ଭାଇରାଲ୍‌ ହେଉଥିବା ଏହି ୩୦ ସେକେଣ୍ଡର ଭିଡିଓ ମିର୍ଜାପୁର ସହରରେ ବର୍ତ୍ତମାନ ହଇଚଇ ସୃଷ୍ଟି କରିଛି । ସେପଟେ ଏହି ଭିଡିଓ ଭାଇରାଲ ହେଉଥିବା ଦେଖି ସେହି ଅଞ୍ଚଳ ଆରକ୍ଷୀ ଅଧିକ୍ଷକ ମନୋଜ କୁମାର ଗୁପ୍ତା କହିଛନ୍ତି ଯେ, ଏହି ଘଟଣାର ତଦନ୍ତ କରାଯିବ ଏବଂ ଅଭିଯୁକ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ।