ସକ୍ରିୟ ଅବପାତ, ଆଜି ଓ ଆସନ୍ତାକାଲି ଓଡ଼ିଶାର କିଛି ଜିଲ୍ଲାରେ ବର୍ଷା!

ଭୁବନେଶ୍ୱର(କେନ୍ୟୁଜ): ଦକ୍ଷିଣ ପଶ୍ଚିମ ଓ ସଂଲଗ୍ନ ଦକ୍ଷିଣ ପୂର୍ବ ବଙ୍ଗୋପସାଗରରେ ସକ୍ରିୟ ରହିଛି ଅବପାତ । ଆଗାମୀ ୨-୩ ଦିନ ଯାଏ ଡିପ୍ରେସନ ତୀବ୍ରତାରେ ସକ୍ରିୟ ରହିବ । ୪୮ ଘଣ୍ଟାରେ ପଶ୍ଚିମ ଉତ୍ତର-ପଶ୍ଚିମ ଦିଗରେ ଗତି କରି ତାମିଲନାଡୁ, ପୁଡୁଚେରୀ ଓ ଦକ୍ଷିଣ ଆନ୍ଧ୍ର ଉପକୂଳ ମୁହାଁ ହେବା ସମ୍ଭାବନା ରହିଛି । ପ୍ରଭାବରେ ଆନ୍ଧ୍ରପ୍ରଦେଶ, ତାମିଲନାଡୁ ଓ ପୁଡୁଚେରୀରେ ପ୍ରବଳ ବର୍ଷା ହେବ । ଏସବୁ ରାଜ୍ୟର କିଛି ସ୍ଥାନରେ ବୁଧବାର ଯାଏ ଲାଗି ରହିବ ବର୍ଷା । ସପ୍ତାହ ମଧ୍ୟଭାଗରେ ବର୍ଷା କର୍ଣ୍ଣାଟକ ଏବଂ କେରଳ ଯାଏ ପହଞ୍ଚିବା ସମ୍ଭାବନା ଥିବା ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି ।

ଅନ୍ୟପଟେ ଚଳିତ ସପ୍ତାହ ଶେଷ ଆଡକୁ ଉତ୍ତର ଆଣ୍ଡାମାନ ସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ସମ୍ଭାବନା ରହିଛି । ଏନେଇ ପୂର୍ବାନୁମାନ କରିଛନ୍ତି ଆମେରିକା ପାଣିପାଗ ବିଜ୍ଞାନୀ ଜାସନ୍‌ ନିକୋଲସ୍‌ । ସେ କହିଛନ୍ତି, ଦକ୍ଷିଣ ଚୀନ୍‌ ସାଗରରେ ଏକ ଲଘୁଚାପ ସୃଷ୍ଟି ହୋଇଛି । ଏହା ସାମୁଦ୍ରିକ ଝଡ଼ ହେବା ସମ୍ଭାବନା ନାହିଁ । କିନ୍ତୁ ଆଗାମୀ ଦୁଇ ଦିନରେ ଦକ୍ଷିଣ ଭିଏତନାମ୍‌, କାମ୍ବୋଡ଼ିଆ ଓ ଦକ୍ଷିଣ ଲାଓସକୁ ପ୍ରବଳ ବର୍ଷା ଆଣିବ ଲଘୁଚାପ । ସପ୍ତାହ ଶେଷ ଆଡ଼କୁ ଏହା ଆଣ୍ଡାମାନ ସାଗରରେ ପହଞ୍ଚିପାରେ । କିନ୍ତୁ ସମୁଦ୍ର ଉପରେ ଏହା ଶକ୍ତିଶାଳୀ ହେବାର ସମ୍ଭାବନା ନଥିବା କହିଛନ୍ତି ଜାସନ୍‌ ନିକୋଲସ୍‌ ।

ଏପଟେ, ଅବପାତର ସିଧାସଳଖ ପ୍ରଭାବ ଓଡ଼ିଶା ଉପରେ ପଡ଼ିବ ନାହିଁ । କେବଳ ଦକ୍ଷିଣ ଓଡ଼ିଶା ଜିଲ୍ଲାର କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ଆଜି ଓ ଆସନ୍ତାକାଲି ଦକ୍ଷିଣ ଓଡ଼ିଶା ଜିଲ୍ଲାରେ ବର୍ଷା ହୋଇପାରେ । ଆଜି ଗଞ୍ଜାମ, ଗଜପତି, ରାୟଗଡ଼ା, ମାଲକାନଗରି ଓ କୋରାପୁଟ ଜିଲ୍ଲାର କିଛି ସ୍ଥାନରେ ହୋଇପାରେ ବର୍ଷା । ଆସନ୍ତାକାଲି ଗଜପତି, ରାୟଗଡ଼ା, ମାଲକାନଗିରି, କୋରାପୁଟ ଓ ନବରଙ୍ଗପୁର ଜିଲ୍ଲାର କିଛି ସ୍ଥାନରେ ବର୍ଷା ସମ୍ଭାବନା ରହିଛି । ଆଭ୍ୟନ୍ତରୀଣ ଓଡ଼ିଶାରେ ଶୁଷ୍କ ଥଣ୍ଡା ବାୟୁ ପ୍ରଭାବରେ ତଳମୁହାଁ ହୋଇଛି ପାରଦ । ରାତିର ତାପମାତ୍ରା ସ୍ୱାଭାବିକଠାରୁ ୨-୩ ଡିଗ୍ରୀ ସେଲସିୟସ୍‌ କମ୍‌ ରହିବ । ଗତକାଲି ରାତିରେ ୪ ସହରରେ ତାପମାତ୍ରା ୧୦ ଡିଗ୍ରୀ ତଳେ ରେକର୍ଡ ହୋଇଥିଲା ।