କୁନି କୁନି ପିଲାଙ୍କ ମୁହଁରେ ହସ ଟିକେ ଦେଖିବା ପାଇଁ କଲେ ମହାନ କାମ, ଶିକ୍ଷକଙ୍କୁ ଛୁଟୁଛି ପ୍ରଶଂସାର ସୁଅ

ମୟୂରଭଞ୍ଜ (କେନ୍ୟୁଜ): କୁନି କୁନି ପିଲାଙ୍କ ମୁହଁରେ ହସ ଟିକେ ଦେଖିବା ପାଇଁ କିଛି କରିବା ପାଇଁ ପ୍ରବଳ ଆଗ୍ରହ ଥିଲା । କିନ୍ତୁ କାମ ବ୍ୟସ୍ତତା ଭିତରେ ପିଲାଙ୍କ ପାଇଁ କିଛି କରିପାରୁ ନଥିଲେ । ଏବେ ଶିକ୍ଷକଙ୍କୁ ଅବସର ମିଳିବା ପରେ ଛୋଟ ଛୋଟ ପିଲାଙ୍କ ପାଇଁ କିଛି ଭିନ୍ନ କରିବାର ଲକ୍ଷ୍ୟ ନେଇ ନିଜ ପରିବାର ସହ ମିଶି ଏକ ଭିନ୍ନକ୍ଷମ ବିଦ୍ୟାଳୟରେ ପହଞ୍ଚିଥିଲେ । ବିଭିନ୍ନ ପ୍ରକାର ସୁସ୍ୱାଦ ଖାଦ୍ୟ ପ୍ରସ୍ତୁତ କରି ପିଲାଙ୍କ ପାଖରେ ପହଞ୍ଚଥିଲେ । ଏଭଳି କାର୍ଯ୍ୟ କରି ମହାନତା ଦେଖାଇଛନ୍ତି ଜଣେ ଶିକ୍ଷକ ।

ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ ବେଲଡିହା ଗାଁର ପୁରୁଷୋତ୍ତମ ମହାକୁଡ ଅବସର ପରେ ସେବା କ୍ଷେତ୍ରରେ ମନ ଲଗାଇଛନ୍ତି । ପୂର୍ବରୁ ଶିକ୍ଷକ ଭାବେ କାର୍ଯ୍ୟରତ ଥିଲେ । ବର୍ତ୍ତମାନ ଅବସର ପରେ ନିଜର ପେନସନ ଟଙ୍କାରେ ବର୍ଷକୁ ଥରେ କୁନି କୁନି ପିଲାମାନଙ୍କୁ ନିଜ ହାତ ରନ୍ଧା ଖାଦ୍ୟ ତିଆରି କରି ଖାଇବାକୁ ଦେବା ପାଇଁ ଇଚ୍ଛା କରିଛନ୍ତି । ତେଣୁ ପରିବାର ସହ ମିଶି ଉଦଳା ଭାରତଜ୍ୟୋତି ଭିନ୍ନକ୍ଷମ ବିଦ୍ୟାଳୟରେ ମାନସିକ ଅନଗ୍ରସର ପିଲା ମାନଙ୍କ ସହ କେକ୍‌ କାଟି ସେମାନଙ୍କୁ ହାତ ତିଆରି ଖାଦ୍ୟ ଖୁଆଇ ସେମାନଙ୍କ ସହ ଖୁସି ମନାଇଥିଲେ । ଶିକ୍ଷକଙ୍କ ଏହି ମହାନତା ପାଇଁ ସମସ୍ତେ ତାଙ୍କର ବେଶ ପ୍ରଶଂସା କରିଛନ୍ତି ।

ବ୍ୟସ୍ତ ବହୁଳ ଜୀବନରେ କିଏ ବା କାହାକୁ ପଚାରୁଛି । କିନ୍ତୁ ଏ ଅବସରପ୍ରାପ୍ତ ଶିକ୍ଷକ ଜଣଙ୍କ କୁନି କୁନି ପିଲାଙ୍କ ମୁହଁରେ ହସ ଟିକେ ଦେଖିବା ପାଇଁ ଏଭଳି ପଦକ୍ଷେପ ନେଇଛନ୍ତି । ତାଙ୍କର କାର୍ଯ୍ୟ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି ।