ଡାଇନୋସର ଅଣ୍ଡାକୁ ଇଷ୍ଟ ଦେବତା ଭାବେ କରୁଥିଲେ ପୂଜା, ୧୭ ବର୍ଷ ପରେ ଗାଁ ଲୋକଙ୍କ ଆଖି ଖୋଲିଲେ ବିଶେଷଜ୍ଞ

ମଧ୍ୟପ୍ରଦେଶର ଧର ଜିଲ୍ଲା ରୁ ଏକ ଅଜବ ମାମଲା ସାମ୍ନାକୁ ଆସିଛି । ଯେଉଁଠାରେ ଧର ଜିଲ୍ଲାର ପାଡଲ୍ୟା ଗାଁର କିଛି ଲୋକଙ୍କୁ ଅନେକ ଦିନ ତଳେ ଗୋଲାକାର ପଥର ପରି ବସ୍ତୁ ମିଳିଥିଲା । ପରେ ଗ୍ରାମବାସୀମାନେ ଏହି ପଥର ପରି ବସ୍ତୁକୁ ନେଇ ବିଭିନ୍ନ ସ୍ଥାନରେ ରଖି ପୂଜା କରିବା ଆରମ୍ଭ କରିଥିଲେ । କେବଳ ଏତିକି ନୁହେଁ ପାଡଲ୍ୟା ଗାଁରେ ଭିଲ୍ଲଡ଼ ବାବାଙ୍କର ଏକ ମନ୍ଦିର ନିର୍ମାଣ କରାଯାଇଥିଲା ଏବଂ ଏହି ପଥର ପରି ବସ୍ତୁଗୁଡ଼ିକ ସେଠାରେ ରଖାଯାଇ ପୂଜା ଆରମ୍ଭ କରାଯାଇଥିଲା । କିନ୍ତୁ ଲୋକମାନେ ଜାଣି ନଥିଲେ ଯାହାକୁ ସେମାନେ ଏତେ ବିଶ୍ୱାସରେ ପୂଜା କରୁଛନ୍ତି ସେ କୌଣସି ଦେବତା ନୁହଁନ୍ତି ସେ ହେଉଛି ଡାଇନୋସରର ଅଣ୍ଡା । ଲୋକମାନେ ଡାଇନୋସରର ଅଣ୍ଡା ଉପରେ ହାର, ଫୁଲ, ନଡ଼ିଆ ଏବଂ ତିଲକ ଲଗାଇ ବହୁତ ଭକ୍ତିର ସହିତ ପୂଜା କରୁଥିଲେ । କିନ୍ତୁ ବିଶେଷଜ୍ଞମାନଙ୍କୁ ଏ ଘଟଣା ବିଷୟରେ ଜଣା ପଡ଼ିବା ପରେ ସେମାନେ ଘଟଣାସ୍ଥଳକୁ ଯାଇ ଅନୁସନ୍ଧାନ କରିଥିଲେ ।

କେବଳ ଏତିକି ନୁହେଁ, ଲୋକମାନେ ଭିଲ୍ଲଡ଼ ବାବାଙ୍କ ନାଁରେ କୁକୁଡ଼ା ଓ ଛେଳି ବଳି ଦେବା ଆରମ୍ଭ କରିଥିଲେ । ପାଡଲ୍ୟା ବ୍ୟତୀତ ଏହାର ନିକଟସ୍ଥ ଗାଁ ଗୋଡା, ଟକାରୀ, ଝାବା, ଆଖଡ଼ା, ଜାମାନ୍ୟାପୁରା ଠାରେ ମଧ୍ୟ ଏହି ଗୋଲ ଗୋଲ ପଥର ଆକୃତିର ବସ୍ତୁକୁ ପୂଜା କରିବା ଆରମ୍ଭ କରିଥିଲେ । କୌଣସି ପ୍ରକାରେ ବିଶେଷଜ୍ଞମାନେ ଏହି ଘଟଣା ସମ୍ପର୍କରେ ସୂଚନା ପାଇଥିଲେ ଏବଂ ସେମାନେ ଜାଣିବାକୁ ପାଇଲେ ଯେ ପ୍ରାୟ ୧୭ ବର୍ଷ ପୂର୍ବେ ଲୋକମାନେ ଡାଇନୋସର ଅଣ୍ଡାର ୨୫୬ ଜୀବାଶ୍ମ ପାଇଥିଲେ । ପାଡଲ୍ୟା ଗାଁରେ ଡାଇନୋସର ଜୀବାଶ୍ମକୁ ନେଇ ଏକ ଜୀବାଶ୍ମ ପାର୍କ ନିର୍ମାଣ କରାଯାଇଛି । ଲୋକମାନେ ଡାଇନୋସରର ଟିଟାନୋ-ସୌରନ୍ ପ୍ରଜାତିର ଜୀବାଶ୍ମକୁ ପୂଜା କରୁଥିବା ପ୍ରକାଶ ପାଇଛି । ଏହା ପରେ ଯେତେବେଳେ ବିଶେଷଜ୍ଞମାନେ ଘଟଣାସ୍ଥଳକୁ ଯାଇ ଏହାର ଯାଞ୍ଚ କରିଥିଲେ, ଏହା ଡାଇନୋସରର ଅଣ୍ଡା ବୋଲି ଜଣା ପଡ଼ିଥିଲା ।

ବୀରବଲ ସାହନି ଇନଷ୍ଟିଚ୍ୟୁଟ ଅଫ ପ୍ୟାଲିଓ ସାଇନ୍ସର ଲକ୍ଷ୍ନୌ ବିଶେଷଜ୍ଞ ତଥା ମଧ୍ୟପ୍ରଦେଶ ଜଙ୍ଗଲ ବିଭାଗର ଅଧିକାରୀମାନେ ଏହାର ଅନୁସନ୍ଧାନ କରିଥିଲେ । ଏହା ପରେ ବିଶେଷଜ୍ଞମାନେ ଗ୍ରାମବାସୀଙ୍କୁ ସଚେତନ କରାଇଥିଲେ ଯେ ସେମାନେ ଯାହାକୁ ଦେବତା ଭାବି ପୂଜା କରୁଛନ୍ତି ତାହା ପ୍ରକୃତରେ ଡାଇନୋସରର ଅଣ୍ଡା । ବର୍ତ୍ତମାନ ୟୁନେସ୍କୋ ଦ୍ୱାରା ଧର ଜିଲ୍ଲାକୁ ଏକ ଗ୍ଲୋବାଲ୍ ଜିଓ ପାର୍କ ଭାବେ ମାନ୍ୟତା ଦେବା ପାଇଁ ବିଶେଷଜ୍ଞ ମାନେ ଏକ ଯୋଜନା ପ୍ରସ୍ତୁତ କରୁଛନ୍ତି । ଯାହାଫଳରେ ଏହି ଜୀବାଶ୍ମ ଏବଂ ଐତିହ୍ୟ ସ୍ଥାନଗୁଡିକ ସଂରକ୍ଷିତ କରାଯାଇ ପାରିବ ।