ଦିନିକିଆ କ୍ରିକେଟରେ ପ୍ରଥମ ଚଉକା ମାରିଥିବା ଭାରତୀୟ ଖେଳାଳି ସୁଧୀର ନାଏକଙ୍କ ପରଲୋକ, ହସପିଟାଲରେ ହୋଇଥିଲେ ଆଡମିଟ୍‌

ଦିନିକିଆ କ୍ରିକେଟରେ ଭାରତ ପାଇଁ ପ୍ରଥମ ଚଉକା ମାରିଥିବା ସୁଧୀର ନାଏକଙ୍କ ପରଲୋକ ହୋଇଛି । ମୁମ୍ବାଇ କ୍ରିକେଟ ସଂଘ ସୂଚନା ଦେଇଛି। ୭୮ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି ସୁଧୀର । ନିକଟରେ ବାଥରୁମ ଚଟାଣରେ ପାଦ ଖସିବା ଯୋଗୁଁ ଆହତ ହୋଇଥିଲେ । ଏହାପରେ ତାଙ୍କୁ ମୁମ୍ବାଇର ଏକ ହସପିଟାଲରେ ଭର୍ତ୍ତି କରାଯାଇଥିଲା । ତା’ ପରେ ସେ କୋମାକୁ ଚାଲିଯାଇଥିଲେ  । ତେବେ ସୁଧୀର ନାଏକଙ୍କ ବିୟୋଗରେ ବିସିସିଆଇ ଠାରୁ ଆରମ୍ଭ କରି କ୍ରିକେଟ ଜଗତ ଶୋକ ପ୍ରକାଶ କରିଛି ।

ସୁଧୀର ମୁମ୍ବାଇ କ୍ରିକେଟ ଜଗତର ଜଣେ ସମ୍ମାନିତ ବ୍ୟକ୍ତି ଏବଂ ରଣଜୀ ଟ୍ରଫିର ଅଧିନାୟକ ରହିଥିଲେ । ତାଙ୍କ ନେତୃତ୍ୱରେ ଟିମ୍‌ ୧୯୭୦-୭୧ରେ ରଣଜୀ ଟାଇଟଲ ଜିତିଥିଲା । ତାଙ୍କ ନେତୃତ୍ୱରେ ସେତେବେଳେ ମୁମ୍ବାଇ ପକ୍ଷରୁ ସୁନୀଲ ଗାଭାସ୍କର, ଅଜିତ ଅଗରକର, ଦିଲ୍ଲୀପ ସରଦେସାଇ ଏବଂ ଅଶୋକ ମାଙ୍କଡ ଭଳି ଖେଳାଳି ରଣଜୀ ମ୍ୟାଚ୍‌ ଖେଳିଥିଲେ ।

୧୯୭୨ ପରେ ରଣଜୀ ଟିମରୁ ତାଙ୍କୁ ବାଦ୍‌ ଦିଆଯାଇଥିଲା । ୧୯୭୪ରେ ଇଂଲଣ୍ଡ ବିପକ୍ଷରେ ଅର୍ଦ୍ଧଶତକ କରିଥଲେ ସୁଧୀର । ସୁଧୀର ଦିନିକିଆ କ୍ରିକେଟରେ ଭାରତ ପାଇଁ ପ୍ରଥମ ଚଉକା ମାରିଥିଲେ । ଏହାପରେ ୨୦୧୧ ବିଶ୍ୱକପ ଫାଇନାଲ ପାଇଁ ପିଚ୍‌ ତିଆରି କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ । ଯେଉଁ ମ୍ୟାଚରେ ଶ୍ରୀଲଙ୍କାକୁ ୨୮ ରନରେ ହରାଇ ଭାରତ ବିଶ୍ୱକପ ବିଜେତା ହୋଇଥିଲା ।