ଜାଣନ୍ତୁ ଜୟା ପ୍ରଦାଙ୍କ ବିରୋଧରେ କାହିଁକି ଧାରା 82 CrPC ଅନୁଯାୟୀ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଲେ କୋର୍ଟ
ବଲିଉଡ୍ ଅଭିନେତ୍ରୀ ତଥା ପୂର୍ବତନ ସାଂସଦ ଜୟାପ୍ରଦାଙ୍କୁ ଫେରାର ଘୋଷଣା କଲେ କୋର୍ଟ । ଖାଲି ସେତିକି ନୁହେଁ, ପୋଲିସକୁ ନିର୍ଦ୍ଦେଶ ଦେଲେ ତାଙ୍କୁ ବାନ୍ଧି ଆଣି କୋର୍ଟରେ ହାଜର କର । ୨୦୧୯ ଲୋକସଭା ନିର୍ବାଚନରେ ଜୟାପ୍ରଦା ରାମପୁରରୁ ସାଂସଦ ପ୍ରାର୍ଥୀ ହୋଇଥିଲେ ।
ବଲିଉଡ୍ ଅଭିନେତ୍ରୀ ତଥା ପୂର୍ବତନ ସାଂସଦ ଜୟାପ୍ରଦାଙ୍କୁ ଫେରାର ଘୋଷଣା କଲେ କୋର୍ଟ । ଖାଲି ସେତିକି ନୁହେଁ, ପୋଲିସକୁ ନିର୍ଦ୍ଦେଶ ଦେଲେ ତାଙ୍କୁ ବାନ୍ଧି ଆଣି କୋର୍ଟରେ ହାଜର କର । ୨୦୧୯ ଲୋକସଭା ନିର୍ବାଚନରେ ଜୟାପ୍ରଦା ରାମପୁରରୁ ସାଂସଦ ପ୍ରାର୍ଥୀ ହୋଇଥିଲେ । ଏହି ସମୟରେ ନିର୍ବାଚନ ଆଚରଣ ବିଧି ଉଲ୍ଲଙ୍ଘନ ନେଇ ତାଙ୍କ ନାଁରେ ଅଭିଯୋଗ ହୋଇଥିଲା ।
ରାମପୁର ଏମପି-ଏମଏଲଏ ସ୍ୱତନ୍ତ୍ର କୋର୍ଟରେ ମାମଲାର ଶୁଣାଣି ଚାଲିଛି । ତେବେ ଶୁଣାଣି ବେଳେ ଜୟାପ୍ରଦାଙ୍କୁ କୋର୍ଟରେ ହାଜର ହେବା ଲାଗି ବାରମ୍ବାର ନୋଟିସ୍ ଜାରି ହୋଇଥିଲା । କୌଣସି ଥର ବି ଜୟା କୋର୍ଟରେ ହାଜର ହୋଇ ନଥିଲେ । ଏମିତିକି ତାଙ୍କ ନାଁରେ ସାତ ଥର ଜାମିନ ବିହୀନ ଗିରଫ ପରୱାନା ଜାରି କରାଯାଇଥିଲା । ତଥାପି ସେ ଆସିନଥିଲେ । ତାପରେ ଜୟାପ୍ରଦାଙ୍କୁ ହାଜର କରିବା ପାଇଁ ଏସପିଙ୍କୁ ନିର୍ଦ୍ଦେଶ ଦେଇଥିଲେ କୋର୍ଟ ।
ଏହାପରେ ବି ସେ ହାଜର ହୋଇ ନାହାନ୍ତି । ତେଣୁ ଅଦାଲତ ଅବମାନନା କାରଣରୁ ଜୟାଙ୍କ ବିରୋଧରେ କୋର୍ଟ ଏଭଳି ନିର୍ଦ୍ଦେଶ ଦେଇଛନ୍ତି । ଜଣେ ଡେପୁଟି ଏସପିଙ୍କ ଅଧ୍ୟକ୍ଷତାରେ ଏକ ୬ ଜଣିଆ ସ୍ୱତନ୍ତ୍ର ପୋଲିସ୍ ଟିମ୍ ଗଠନ କରି ମାର୍ଚ୍ଚ ୪ ତାରିଖ ସୁଦ୍ଧା ଜୟପ୍ରଦାଙ୍କୁ କୋର୍ଟରେ ହାଜର କରିବା ଲାଗି କଡ଼ା ନିର୍ଦ୍ଦେଶ ଜାରି କରିଛନ୍ତି କୋର୍ଟ ।
ମୋବାଇଲ୍ ବନ୍ଦ କରିଦେଇଛନ୍ତି ଜୟାପ୍ରଦା:
ଏହା ଉପରେ ବରିଷ୍ଠ ଅଧିକାରୀ ଅମରନାଥ ତିୱାରୀ କହିଛନ୍ତି ଯେ ରାମପୁରର ଜୁଡିସିଆଲ ମାଜିଷ୍ଟ୍ରେଟ ସାଂସଦ-ବିଧାୟକ କୋର୍ଟରେ ଜୟା ପ୍ରଦାଙ୍କ ବିରୋଧରେ ନିର୍ବାଚନ ଆଚରଣ ବିଧି ଉଲ୍ଲଂଘନ ସହ ଜଡିତ ଏକ ମାମଲା ଚାଲିଛି । ବାରମ୍ବାର ଡକାଯିବା ପରେ ବି ସେ କୋର୍ଟରେ ହାଜର ହୋଇନଥିଲେ । ଜାମିନ ବିହୀନ ୱାରେଣ୍ଟ ମଧ୍ୟ ଜାରି କରାଯାଇଥିଲା । ତଥାପି ସେ ହାଜର ହୋଇନଥିଲେ । ଥାନାରୁ ଆସିଥିବା ରିପୋର୍ଟରେ ଇନ୍ସପେକ୍ଟର ଦାୟିତ୍ୱରେ ଥିବା ରଣଜୀ ଦ୍ୱିବେଦୀ ରିପୋର୍ଟ ପଠାଇଛନ୍ତି ଯେ ଜୟା ପ୍ରଦା ନିଜକୁ ବଞ୍ଚାଇବାକୁ ଚେଷ୍ଟା କରୁଛନ୍ତି, ଏବଂ ନିଜର ମୋବାଇଲ୍ ବନ୍ଦ କରିଦେଇଛନ୍ତି । ଅଧିକାରୀ କହିଛନ୍ତି ଯେ ଜୟା ପ୍ରଦାଙ୍କ ବିରୋଧରେ ମାନ୍ୟବର କୋର୍ଟ ଧାରା 82 CrPC ଅନୁଯାୟୀ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି ।
ଧାରା 82 CrPC ଅଧୀନରେ କ’ଣ ପଦକ୍ଷେପ ନିଆଯାଉଛି:
ତେବେ ଯେତେବେଳେ ପଚରାଗଲା 82 CrPC ଅଧୀନରେ କ’ଣ ପଦକ୍ଷେପ ନିଆଯାଉଛି । ଏହା ଉପରେ ବରିଷ୍ଠ ଅଧିକାରୀ ଜଣଙ୍କ କହିଥିଲେ ଯେ ଧାରା 82 CrPC ଅଧୀନରେ ଚାଲିଥିବା ପ୍ରକ୍ରିୟାରେ ଯେତେବେଳେ ଅଭିଯୋଗକାରୀ କିମ୍ବା ଅଭିଯୁକ୍ତ ଉପସ୍ଥିତ ରୁହନ୍ତିନାହିଁ, ସେତେବେଳେ ମାନ୍ୟବର କୋର୍ଟ ସେମାନଙ୍କ ଉପସ୍ଥାନକୁ ସୁନିଶ୍ଚିତ କରିବା ପାଇଁ ଘୋଷଣା କରିଥାନ୍ତି । ଏହାକୁ CrPCର ଧାରା 82 ଅନୁଯାୟୀ କାର୍ଯ୍ୟ କୁହାଯାଏ । ଏହାର ଅର୍ଥ ଜୟା ପ୍ରଦାଙ୍କୁ ପଳାତକ ଘୋଷିତ କରାଯାଇଛି ।
