ଭାଇ ପାଇଁ କରିଥିବା ମାନସିକ ପୂରଣ ପାଇଁ ଗୋଟିଏ ପାଦରେ ୧୦୦ କିମି ଚାଲୁଛି ଦିବ୍ୟାଙ୍ଗ ଭଉଣୀ

ଭାଇ-ଭଉଣୀ ସମ୍ପର୍କ ଏକ ନିଆରା ସମ୍ପର୍କ । ଆଗକୁ ଆସୁଛି ଭାଇ-ଭଉଣୀ ସମ୍ପର୍କର ଅତୁଟ ବନ୍ଧନ ‘ରାଖୀ ବନ୍ଧନ’ ପର୍ବ । ଏହା ପୂର୍ବରୁ ଏକ ଆଶ୍ଚର୍ଯ୍ୟଜନକ ଖବର ଦେଖିବାକୁ ମିଳିଛି ମୁଜାଫରପୁର-ହାଜିପୁର ଜାତୀୟ ରାଜପଥ-୨୨ ରେ । ଭାଇର ରୋଗ ଭଲ ପାଇଁ ମାନସିକ ରଖିଥିବା ଜଣେ ଭଉଣୀ ଏମିତି କିଛି କରି ଦେଖାଇଛନ୍ତି,ଯାହାକୁ ଦେଖିଲେ ଯେ କେହି ସାବାସ୍‌ କହିବାକୁ ପଛାଇବ ନାହିଁ । ବୟସ ମାତ୍ର ୧୧, ପୁଣି ଦିବ୍ୟାଙ୍ଗ ।

ଦୃଢ଼ ଇଚ୍ଛାଶକ୍ତି ଓ ଭଗବାନଙ୍କ ଉପରେ ବିଶ୍ୱାସ ତାର ମାନସିକ ପୂରଣ ପାଇଁ ଯୋଗାଇଛି ଅସୀମ ସାହସ । ମହାଦେବଙ୍କୁ ଜଳାଭିଷେକ କରିବା ପାଇଁ ସେ ପ୍ରାୟ ୧୦୦ କିମି ରାସ୍ତା ପାଦରେ ଚାଲି ଚାଲି ଯାଉଛନ୍ତି । ତାହା ପୁଣି ଗୋଟିଏ ଗୋଡ଼ରେ । ଏମିତି ଦୃଶ୍ୟ ଦେଖିବାକୁ ମିଳିଛି ମୁଜାଫରପୁର-ହାଜିପୁର ଜାତୀୟ ରାଜପଥ ୨୨ରେ ।

ରାଜନନ୍ଦିନୀ ହାଜିପୁର ଲାଲପୋଖର ବାସିନ୍ଦା । ଭାଇଙ୍କ ହୃତପିଣ୍ଡ ଅପରେସନ ହେବା ପୂର୍ବରୁ ସେ ଭାଇଙ୍କ ସୁସ୍ଥତା ପାଇଁ ମାନସିକ କରିଥିଲେ । ଯଦି ତାଙ୍କ ଭାଇ ଭଲ ହୋଇ ଯାଆନ୍ତି, ତେବେ ସେ ପାଦରେ ଚାଲି ଚାଲି ୧୦୦ କିଲୋମିଟର ଦୂରରେ ଥିବା ବାବା ଗରିବନାଥଙ୍କ ମନ୍ଦିରରେ ଜଳାଭିଷେକ କରିବେ ।

ଇତିମଧ୍ୟରେ ଭାଇଙ୍କ ଦେହ ଭଲ ହୋଇଯାଇଛି । ମାନସିକ ପୂରଣ ପାଇଁ ଏବେ ସେ ପହଲଜୋ ଘାଟରୁ ଗଙ୍ଗା ପାଣି ଉଠାଇ ଜଳାଭିଷେକ କରିବାକୁ ବାବାଙ୍କ ମନ୍ଦିର ଅଭିମୁଖେ ଚାଲିଛନ୍ତି । ସାଙ୍ଗରେ ଅ ଛନ୍ତି ତାଙ୍କର ବାପା । ଭାଇର ଦେହ ଭଲ ପାଇଁ ଭଉଣୀର ଏପରି ନିଷ୍ଠା ସମାଜରେ ଭାଇ-ଭଉଣୀ ସମ୍ପର୍କର ଏକ ଜ୍ୱଳନ୍ତ ଉଦାହରଣ ସୃଷ୍ଟି କରିଛି ।