ଗାର୍ଲଫ୍ରେଣ୍ଡକୁ ଇମ୍ପ୍ରେସ କରିବାକୁ ୟୁନିଫର୍ମ ପିନ୍ଧି ଏୟାର ଫୋର୍ସ ଷ୍ଟେସନରେ ପଶିଲେ ଯୁବକ, ଧରାପଡ଼ି ଏବେ ଜେଲରେ
ଦେଶର ରାଜଧାନୀ ଦିଲ୍ଲୀ ଏୟାରଫୋର୍ସ ଷ୍ଟେସନରେ ଜଣେ ଯୁବକ ଏମିତି କାରନାମା କରିଛନ୍ତି ଯାହା ସୁରକ୍ଷା ଏଜେନ୍ସିର ଅଫିସର ମାନଙ୍କ ହୋସ ଉଡାଇଦେଇଛି । କାହିଁକି ଯୁବକ ଜଣଙ୍କର ଏମିତି ହରକତ ସୁରକ୍ଷା ଏଜେନ୍ସିଙ୍କ ହୋସ ଉଡାଇ ଦେଇଛି ତାହା ଜାଣିବା ପରେ ଆପଣମାନେ ନିଶ୍ଚିତ ଭାବେ ବିସ୍ମିତ ହୋଇଯିବେ । ପ୍ରକୃତରେ ଯୁବକ ଜଣଙ୍କ ନିଜ ଗାର୍ଲ ଫ୍ରେଣ୍ଡଙ୍କୁ ଇମ୍ପ୍ରେସ କରିବା ପାଇଁ ଏୟାରଫୋର୍ସର ୟୁନିଫର୍ମ ପିନ୍ଧି ଜଣେ ଏୟାରଫୋର୍ସ ଅଧିକାରୀର ପରିଚୟ ନେଇ ଦିଲ୍ଲୀ ଏୟାରଫୋର୍ସ ଷ୍ଟେସନରେ ଦାଖଲ ହୋଇଥିଲେ । ଯାଞ୍ଚ କରିବା ସମୟରେ ସୁରକ୍ଷା କର୍ମୀ ମାନଙ୍କର ସନ୍ଦେହ ହେବାରୁ ଯୁବକ ଜଣଙ୍କୁ ତୁରନ୍ତ ଗିରଫ କରାଯାଇଥିଲା ।
ପଚରାଉଚୁରା ସମୟରେ ନିଜ ବୟାନରେ ଯୁବକ ଜଣଙ୍କ ଯାହା କହିଥିଲେ ତାହା ସମସ୍ତଙ୍କୁ ତାଯୁବ କରିଛି । ତାଙ୍କ କହିବା ଅନୁଯାୟୀ ସେ ଏଠାକୁ ସେଲ୍ଫି ନେବାକୁ ଆସିଥିଲେ । ଏହି ସେଲ୍ଫିକୁ ନିଜ ଗାର୍ଲ ଫ୍ରେଣ୍ଡକୁ ପଠାଇ ତାଙ୍କୁ ଇମ୍ପ୍ରେସ କରିପାରିବେ । କାରଣ ପ୍ରଥମେ ନିଜ ଗାର୍ଲ ଫ୍ରେଣ୍ଡଙ୍କୁ ସେ ଜଣେ ଏୟାରଫୋର୍ସ ଅଫିସର ଦାୟିତ୍ୱରେ ଅଛନ୍ତି ବୋଲି ପରିଚୟ ଦେଇଥିଲେ । କିନ୍ତୁ ଯୁବକଙ୍କ ଏହି କଥାକୁ ବିଶ୍ୱାସ କରିପାରିନଥିଲେ ତାଙ୍କ ଗାର୍ଲ ଫ୍ରେଣ୍ଡ । ତେଣୁ ଜଣେ ନକଲି ଅଫିସର ହୋଇ ସେଲ୍ଫି ନେବାକୁ ମନେ ମନେ ସ୍ଥିର କରିନେଇଥିଲେ ଯୁବକ ଜଣଙ୍କ । ଆରୋପି ଜଣଙ୍କ ନିଜେ ସ୍ୱୀକାର କରିଛନ୍ତିକି ଏନେଇ ସେ ଏକ ନକଲି ଡ୍ରେସ କିଣିଥିଲେ । ତାହାକୁ ପିନ୍ଧି ଏୟାରଫୋର୍ସ ଅଧିକାରୀ ବେଶରେ IAF ଷ୍ଟେସନ ଭିତରକୁ ଯାଇଥିଲେ । କିନ୍ତୁ ଠିକ ସେହି ସମୟରେ ସେଠି ଉପସ୍ଥିତ ଥିବା ସୁରକ୍ଷା କର୍ମୀ ମାନଙ୍କର ତାଙ୍କ ଉପରେ ସନ୍ଦେହ ହେବାରୁ ସେମାନେ ତାଙ୍କୁ ଅଟକ ରଖି ପଚରାଉଚୁରା କରିଥିଲେ । ସନ୍ତୋଷ ଜନକ ଉତ୍ତର ନମିଳିବାରୁ ତାଙ୍କୁ ଗିରଫ କରିନେଇଥିଲେ ।
ପୋଲିସ ତରଫରୁ ଜାରି ହୋଇଥିବା ସୂଚନା ମୁତାବକ ଜୁଲାଇ ୨୨ ତାରିଖରେ ନକଲି ବର୍ଦ୍ଦି ପିନ୍ଧି ଏୟାର ଫୋର୍ସ ଷ୍ଟେସନରେ ପଶି ସେଲ୍ଫି ନେବାକୁ ଚେଷ୍ଟା କରୁଥିଲେ । ତଥ୍ୟରୁ ଜଣାଯାଇଛିକି ଆରୋପି ଜଣଙ୍କ ନାଁ ହେଉଛି ଗୌରବ । ଗୌରବ ହେଉଛନ୍ତି ଉତ୍ତରପ୍ରଦେଶ ଆଲିଗଡର ସ୍ଥାୟୀ ବାସିନ୍ଦା । ତାଙ୍କୁ ଧରାଯିବା ପରେ ସୁରକ୍ଷା କର୍ମୀଙ୍କ ପ୍ରଶ୍ନରେ ସେ ଇଆଡୁ ସିଆଡ଼ୁ ଉତ୍ତର ଦେବାକୁ ଲାଗିଲେ । କିଛି ସମୟ ପରେ ସେ ସଠିକ ଉତ୍ତର ଦେଇଥିଲେ ।
