ଶିକ୍ଷା ହିଁ ବିକାଶର ମୂଳମନ୍ତ୍ର ବୋଲି ଭାରତରେ ଅବସ୍ଥାପିତ ଶ୍ରୀଲଙ୍କା ଉଚ୍ଚାୟୁକ୍ତ ଅଷ୍ଟିନ୍ ଫର୍ଣ୍ଣାଣ୍ଡୋ କହିଛନ୍ତି । ରବିବାର କିସ୍ ଓ କିଟ୍ ପରିଦର୍ଶନ ଅବସରରେ କିସ୍ର ଛାତ୍ରଛାତ୍ରୀଙ୍କୁ ଉଦବୋଧନ ଦେଇ ଶ୍ରୀ ଫର୍ଣ୍ଣାଣ୍ଡୋ କହିଲେ, ଜନଜାତିମାନେ ଅବହେଳିତ ରହିବାର ମୁଖ୍ୟ କାରଣ ହେଉଛି ଶିକ୍ଷାର ଅଭାବ । ଶିକ୍ଷା ହିଁ ସେମାନଙ୍କୁ ଅବହେଳିତ ହୋଇ ପଡ଼ି ରହିବାରୁ ମୁକ୍ତି ଦେଇପାରିବ । ଶିକ୍ଷା ମାଧ୍ୟମରେ ଆମେ ଆମର ବ୍ୟକ୍ତିଗତ ପରିବାର, ସମାଜ, ରାଜ୍ୟ ଓ ଦେଶର ବିକାଶ କରିପାରିବା ବୋଲି ଶ୍ରୀ ଫର୍ଣ୍ଣାଣ୍ଡୋ କହିଥିଲେ । ସେ କହିଲେ, ଶିକ୍ଷା ମାଧ୍ୟମରେ ହିଁ ସମାଜରୁ ଦାରିଦ୍ର୍ୟ ଦୂର ହୋଇ ପାରିବ । କିସ୍ ପରିଦର୍ଶନ କରିବା ପରେ ମୋର ହୃଦବୋଧ ହୋଇଛି ୟେ ଜଣେ ବ୍ୟକ୍ତି ଚାହିଁଲେ ସମାଜରେ ପରିବର୍ତ୍ତନ ଆଣିପାରିବ । ଏହା କିସ୍ ମାଧ୍ୟମରେ ଡ. ଅଚ୍ୟୁତ ସାମନ୍ତ ପ୍ରମାଣ କରି ଦେଖାଇଛନ୍ତି । ସେ ସମସ୍ତଙ୍କୁ ପାଇଁ ଉଦାହରଣ ସୃଷ୍ଟି କରିଛନ୍ତି । ପିଲାମାନଙ୍କୁ ଜୀବନରେ ଭଲ ମଣିଷ ହେବା ପାଇଁ ପରାମର୍ଶ ଦେଇ କହିଲେ, ନିଜକୁ ଏଭଳି ଭାବେ ଗଢି ତୋଳ ଯେଭଳି ଭବିଷ୍ୟତରେ ସମସ୍ତ ପ୍ରକାର ପ୍ରତିକୂଳ ପରିସ୍ଥିତିର ସଫଳ ମୁକାବିଲା କରିପାରିବ ।
ଆହୁରି ପଢନ୍ତୁ: ନେପାଳର ଫକୀର ଭାରତରେ ମାଲାମାଲ, ଆପଣଙ୍କ ପରିଚିତ ଲୋକଟିଏ ଜାଣନ୍ତୁ କିଏ?
ନିଜ ପାଠ ପଢ଼ି ନିଜ ପାଇଁ ରୋଜଗାର କରି ପ୍ରତିଷ୍ଠା ଅର୍ଜନ କଲେ କିଛି ଲାଭ ନାହିଁ । ତମେମାନେ ଯେଉଁ ଅନୁଷ୍ଠାନରେ ପାଠ ପଢୁଛ ସେହି ଅନୁଷ୍ଠାନ, ତୁମ ପରିବାର, ସମାଜ, ରାଜ୍ୟ ଓ ଦେଶକୁ ପ୍ରତିଦାନ ଦେବାର କଳା ତୁମର ପ୍ରତିଷ୍ଠାତା ଡ. ସାମନ୍ତଙ୍କ ଠାରୁ ଶିଖିବା ଉଚିତ୍ । ପ୍ରତ୍ୟେକଙ୍କ ଜୀବନରେ ଜଣେ ଜଣେ ଆଦର୍ଶ ମଣିଷ ଥାନ୍ତି । ତୁମ ମାନଙ୍କୁ ତୁମ ଜୀବନର ଆଦର୍ଶ ମଣିଷ ଖୋଜିବାକୁ ପଡ଼ିବ ନାହିଁ । କାରଣ ତୁମର ଆଦର୍ଶ ତୁମ ନିକଟରେ ସର୍ବଦା ରହିଛନ୍ତି । ସେ ହେଉଛନ୍ତି ଡ. ଅଚ୍ୟୁତ ସାମନ୍ତ ବୋଲି ଶ୍ରୀ ଫର୍ଣ୍ଣାଣ୍ଡୋ କହିଥିଲେ । ଶ୍ରୀ ଫର୍ଣ୍ଣାଣ୍ଡୋ, ପତ୍ନୀ ସିଲିଭିଆ ଫର୍ଣ୍ଣାଣ୍ଡୋ ଏବଂ ଭାରତ ସ୍ଥିତ ଶ୍ରୀଲଙ୍କା ହାଇକମିସନ କାର୍ଯ୍ୟାଳୟର କାଉନସିଲର ଅଚିନି ପେରେରା କିଟ୍ ଓ କିସ୍ ପରିଦର୍ଶନ କରିଥିଲେ । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପ୍ରତିଷ୍ଠାତା ଡ. ସାମନ୍ତ, କିଟ୍ ଓ କିସ୍ ସଂପାଦକ ଆର୍.ଏନ୍ ଦାଶ, କିସ୍ ବିଶ୍ୱବିଦ୍ୟାଳୟ କୁଳପତି ପ୍ରଫେସର ହରେକୃଷ୍ଣ ଶତପଥି, କିଟ୍ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଏଚ୍ କେ ମହାନ୍ତି, କିସ୍ର ମୁଖ୍ୟ ନିର୍ବାହୀ ଅଧିକାରୀ ଡ. ପି.କେ ରାଉତରାୟଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ